Click it and Unblock the Notifications
ಅಂಬಸಮುದ್ರಂ, ಹೆಸರು ಕೇಳಿ ಸಮುದ್ರತಟದ ಸುಂದರ ಊರೊಂದನ್ನು ಕಲ್ಪಿಸಿಕೊಂಡಿರಾ!....... ನಿಮಗೆ ನಿರಾಶೆ ಕಾದಿದೆ. ಹೆಸರಿಗೆ ತದ್ವಿರುದ್ದವಾಗಿ ಪಶ್ಚಿಮ ಘಟ್ಟಗಳ ತಪ್ಪಲಿನಲ್ಲಿ ಹಸಿರಿನ ನಡುವೆ ಹುದುಗಿ ನವಿರಾಗಿ ಅಹ್ವಾನವೀಯುತ್ತಿದೆ ಅಂಬಸಮುದ್ರಂ ಎಂಬ ಪುಟ್ಟ ಪಟ್ಟಣ. ತಮಿಳುನಾಡಿನ ತಿರುನಲ್ವೇಲಿ ಜಿಲ್ಲೆಯ ಪುಟ್ಟ ಊರಾದ ಅಂಬಸಮುದ್ರಂ ತನ್ನ ಅಪ್ರತಿಮ ನಿಸರ್ಗಸೌಂದರ್ಯ ತಾಣಗಳು ಹಾಗೂ ಧಾರ್ಮಿಕ ಸ್ಥಳಗಳೊಂದಿಗೆ ಆತ್ಮೀಯವಾಗಿ ಆಹ್ವಾನ ನೀಡುತ್ತಿದೆ. ಪಶ್ಚಿಮಘಟ್ಟಗಳ ಕಡಿದಾದ ಅಂಚಿನಿಂದ ತೊಡಗಿ ಅನತಿ ದೂರದಲ್ಲಿ ಹರಿಯುತ್ತಿರುವ ತಮಿರಬರಣಿ ನದಿಯವರೆಗೆ ಈ ಪಟ್ಟಣದ ವಿಸ್ತಾರ. ನದಿಯ ಆಚೆ ದಡದಲ್ಲಿದೆ ಕಲ್ಲಿಡೈಕುರುಚ್ಚಿ ಪಟ್ಟಣ. ಒಂದರ್ಥದಲ್ಲಿ ಇವೆರಡೂ ಒಂದೇ ನದಿಯ ಅಕ್ಕಪಕ್ಕದಲ್ಲಿರುವ ಅವಳಿ ಪಟ್ಟಣಗಳು. ತಮಿಳಿನಲ್ಲಿ ತಮಿರ ಎಂದರೆ ತಾಮ್ರ. ಈ ನದಿಯ ಪಾತ್ರದಲ್ಲಿ ತಾಮ್ರದ ಅಂಶವಿದೆ ಎಂಬ ನಂಬಿಕೆಯಿಂದ ಈ ನದಿಗೆ ತಮಿರಬರಣಿ ಎಂಬ ಹೆಸರು ಬಂದಿದೆ.
ಅಂಬಸಮುದ್ರಕ್ಕೆ ವಿಲಂಕುರುಚ್ಚಿ ಎಂಬ ಹೆಸರೂ ಇದೆ. ಇಂದು ಶಾಸ್ತ್ರೀಯ ಸ್ಥಾನಮಾನ ದೊರಕಿರುವ ತಮಿಳು ಭಾಷೆಗೆ ಸುಮಾರು ಸಾವಿರ ವರ್ಷಗಳ ಹಿಂದೆಯೇ ಅಪಾರ ಕೊಡುಗೆ ನೀಡಿದ್ದ ಸಂತ ಅಗಸ್ತಿಯರ್ ಸಹಾ ಇದೇ ಊರಿನವರು. ಪಾಪನಾಸಂ ಪಾಪನಾಸರ್ ದೇವಾಲಯ, ಮೆಲಸೇವಲ್ ನವನೀತಕೃಷ್ಣನ್ ದೇವಾಲಯ, ಮೆಲಸೇವಲ್ ಮೆಗಲಿಂಗೇಶ್ವರ ದೇವಾಲಯ, ಮೆಲಸೇವಲ್ ವೇಣುಗೋಪಾಲಸ್ವಾಮಿ ದೇವಾಲಯ ಮೊದಲಾದ ಇತಿಹಾಸಪ್ರಸಿದ್ಧ ದೇವಾಲಯಗಳ ತವರೂರಾದ ಅಂಬಸಮುದ್ರಂನಲ್ಲಿ ಹಲವಾರು ರಮಣೀಯ ನಿಸರ್ಗತಾಣಗಳಿಗೂ ಇವೆ. ಮರದ ಸೂಕ್ಷ್ಮ ಕೆತ್ತನೆಯ ಕರಕುಶಲ ವಸ್ತುಗಳು ಇಲ್ಲಿ ಜೀವತಳೆಯುತ್ತವೆ.
ಇಲ್ಲಿನ ಪ್ರಮುಖ ಆಕರ್ಷಣೆಯೆಂದರೆ ಮುಂದಂತುರೈ-ಕಾಲಕಾಡ್ ಹುಲಿ ಧಾಮ. ಅಲ್ಲದೇ ಪಾಪನಾಸಂ ಅಣೆಕಟ್ಟು, ಅಗಸ್ತಿಯರ್ ಜಲಪಾತ, ಮಣಿಮುತ್ತಾರ್ ಅಣೆಕಟ್ಟು ಮತ್ತು ಜಲಪಾತ, ಕರೈಯರ್ ಅಣೆಕಟ್ಟು, ಮಂಜೊಳೈ ಗಿರಿ ಮತ್ತು ವಿಕ್ರಮಸಿಂಗಪುರಂ ಸಹಾ ಪ್ರವಾಸಿಗರನ್ನು ಸೆಳೆಯುತ್ತವೆ. ಈ ಊರಿನ ಗರಿಮುರಿ "ಕೈ ಮುರುಕ್ಕು" ತಿಂಡಿ ಬಹಳ ಜನಪ್ರಿಯ. ಅಲ್ಲದೇ ನುರಿತ ಕೆಲಸಗಾರರಿಂದ ನೇಯಲ್ಪಟ್ಟ ಕೈಮಗ್ಗದ ಹುಲ್ಲಿನ "ಪಾಯ್"ಎಂಬ ಚಾಪೆ ಸಹಾ ಪ್ರಸಿದ್ಧವಾಗಿದೆ. ಪಕ್ಷಿವೀಕ್ಷಣೆ, ಧಾರ್ಮಿಕ, ಇತಿಹಾಸಿಕ ಸ್ಥಳಗಳಿಗೆ ಭೇಟಿ, ಚಾರಣ ಮೊದಲಾದ ವಿವಿಧ ಅಭಿರುಚಿಯುಳ್ಳ ಪ್ರವಾಸಿಗರಿಗೆ ಅಂಬಸಮುದ್ರಂ ಹೇಳಿ ಮಾಡಿಸಿದ ತಾಣವಾಗಿದೆ.
