ಪಶ್ಚಿಮ ಘಟ್ಟಗಳ ಅತ್ಯಂತ ದಕ್ಷಿಣ ಭಾಗದಲ್ಲಿ ಸುಮಾರು ಎಂಟುನೂರು ಚದರ ಕಿ.ಮೀ ವಿಸ್ತಾರದಲ್ಲಿ ಹರಡಿಹೊಂಡಿರುವ ಈ ಅಭಯಾರಣ್ಯದಲ್ಲಿ ಹುಲಿ ಮಾತ್ರವಲ್ಲದೇ ಚಿರತೆ, ನರಿ, ಕತ್ತೆಕಿರುಬ, ಕಾಡುಬೆಕ್ಕು, ವಿವಿಧ ಪ್ರಜಾತಿಯ ಮಂಗಗಳು, ಕಾಡುಹಂದಿಗಳು ಹಾಗೂ ಕೆಲವು ವಿಧಧ ಜಿಂಕೆಗಳೂ ಆಶ್ರಯ ಪಡೆದಿವೆ. 81 ವಿಧದ ಸರೀಸೃಪಗಳು, 37 ವಿಧದ ಉಭಯಜೀವಿಗಳು ಹಾಗೂ 273 ಪ್ರಜಾತಿಯ ಹಕ್ಕಿಗಳು, 77 ವಿಧದ ಸಸ್ತನಿಗಳು ಈ ಅಭಯಾರಣ್ಯದಲ್ಲಿ ವಾಸಿಸುತ್ತಿವೆ. ಈ ಅಭಯಾರಣ್ಯದಲ್ಲಿ ಹರಿಯುವ ಸುಮಾರು ಹದಿನಾಲ್ಕು ನದಿಗಳು ಮತ್ತು ಉಪನದಿಗಳಲ್ಲಿ 33 ವಿಧದ ಮೀನುಗಳಿವೆ. ನೂರೈವತ್ತಕ್ಕೂ ಹೆಚ್ಚಿನ ವಿಧದ ಸಸ್ಯಗಳನ್ನು ಗುರುತಿಸಲಾಗಿದೆ.
1962ರಲ್ಲಿ ಕಾಲಕಾಡ್ ಅಭಯಾರಣ್ಯ (251 ಚ.ಕಿ.ಮೀ) ಹಾಗೂ ಮುಂದಂತುರೈ ಅಭಯಾರಣ್ಯ (567 ಚ.ಕಿ.ಮೀ) ಸ್ಥಾಪನೆಯಾಗಿದ್ದವು. ಎರಡೂ ಅಭಯಾರಣ್ಯಗಳನ್ನು 1988ರಲ್ಲಿ ಒಂದಾಗಿಸಿ ಈ ಅಭಯಾರಣ್ಯಕ್ಕೆ 1988ರಲ್ಲಿ ರಾಷ್ಟ್ರೀಯ ಹುಲಿ ಧಾಮದ ಮಾನ್ಯತೆ ದೊರಕಿದೆ. 2010ರಲ್ಲಿ ರಾಷ್ಟ್ರೀಯ ಹುಲಿ ಸಂರಕ್ಷಣಾ ಪ್ರಾಧಿಕಾರದ ಮಹತ್ವದ 'ಪ್ರಾಜೆಕ್ಟ್ ಟೈಗರ್' ಯೋಜನೆಗೂ ಇಲ್ಲಿ ಅನುಮೋದನೆ ದೊರಕಿದೆ.
ಈ ಅಭಯಾರಣ್ಯದಲ್ಲಿ 24ಕ್ಕೂ ಹೆಚ್ಚು ಟ್ರೆಕ್ಕಿಂಗ್ ದಾರಿಗಳಿದ್ದು ಅರಣ್ಯ ಇಲಾಖೆಯ ಸಿಬ್ಬಂದಿ ಈ ದಾರಿಗಳಲ್ಲಿ ಪ್ರವಾಸಿಗರನ್ನು ಕರೆದೊಯ್ಯುತ್ತಾರೆ. ಅರಣ್ಯ ಇಲಾಖೆಯ ಕಾಟೇಜ್ ಸಹಾ ಲಭ್ಯವಿದ್ದು ವಸತಿಯ ಅನುಕೂಲವೂ ಇದೆ. ವಾರದ ಏಳೂ ದಿನ ಬೆಳಿಗ್ಗೆ ಆರರಿಂದ ಸಂಜೆ ಆರರವರೆಗೆ ಈ ಅಭಯಾರಣ್ಯವನ್ನು ಸಂದರ್ಶಿಸಬಹುದು.