ನಮ್ಮ ದೇಶದಲ್ಲಿರುವ ಜನರು ಚಲನಚಿತ್ರಗಳನ್ನು ಬಿಟ್ಟರೆ ಅತಿಯಾಗಿ ಇಷ್ಟಪಡುವುದು ಕ್ರಿಕೆಟ್ ಆಟ. "ಹೊಟ್ಟೆಗೆ ಹಿಟ್ಟಿಲ್ಲಂದ್ರೂ ಜುಟ್ಟಿಗೆ ಮಲ್ಲಿಗೆ ಬೇಕು" ಎಂಬಂತೆ ಎಷ್ಟೊ ಜನರು ತಮ್ಮ ಮಿತ ಆದಾಯದ ಹೊರತಾಗಿಯೂ ಕ್ರಿಕೆಟ್ ಆಟವನ್ನು ನೋಡಲು ಮೈದಾನಕ್ಕೆ ಹೋಗಲು ಹಿಂಜರಿಯುವುದಿಲ್ಲ. ಇನ್ನು ಈ ಆಟದ ಮೈದಾನಗಳಂತೂ ಸುಸಜ್ಜಿತವಾಗಿ ನಿರ್ಮಾಣಗೊಂಡಿದ್ದು ಒಂದು ರೀತಿಯ ಪ್ರವಾಸಿ ಆಕರ್ಷಣೆಗಳಾಗಿಯೂ ಮಾರ್ಪಟ್ಟಿವೆ. ಭಾರತದಲ್ಲಿ ಸಾಕಷ್ಟು ಸಂಖ್ಯೆಯಲ್ಲಿ ಕ್ರೀಡಾಂಗಣಗಳನ್ನು ಕಾಣಬಹುದು. ಕೆಲವು ಕ್ರೀಡಾಂಗಣಗಳಂತೂ ನಗರದ ಹೆಮ್ಮೆಯ ಹೆಗ್ಗುರುತುಗಳಾಗಿವೆ ಎಂದರೂ ತಪ್ಪಾಗಲಾರದು. ಈ ಲೇಖನವು ಭಾರದಲ್ಲಿರುವ ಸಾಕಷ್ಟು ಕ್ರೀಡಾಂಗಣಗಳ ಪೈಕಿ ಕೆಲವು ಸುಂದರ ಕ್ರೀಡಾಂಗಣಗಳ ಪರಿಚಯ ಮಾಡಿಕೊಡೂತ್ತದೆ.
ಈಡನ್ ಗಾರ್ಡನ್:
ಪಶ್ಚಿಮ ಬಂಗಾಳದ ರಾಜಧಾನಿ ಕೊಲ್ಕತ್ತಾ ನಗರದಲ್ಲಿದೆ ಈ ಕ್ರಿಕೆಟ್ ಮೈದಾನ. ಈ ಕ್ರೀಡಾಂಗಣ ಭಾರತದ ಮೊದಲ ದೊಡ್ಡ ಹಾಗು ಪ್ರಪಂಚದ ಮೂರನೆಯ ದೊಡ್ಡ ಕ್ರಿಕೆಟ್ ಆಟದ ಮೈದಾನವಾಗಿದೆ. ಅನೇಕ ಅಂತಾರಾಷ್ಟ್ರೀಯ ಮಟ್ಟದ ಪಂದ್ಯಾವಳಿಗಳನ್ನು ಇಲ್ಲಿ ಆಡಲಾಗುತ್ತದೆ.
ಚಿತ್ರಕೃಪೆ: Aliven Sarkar
ವಾಂಖೇಡೆ ಕ್ರೀಡಾಂಗಣ:
ಭಾರತದ "ಆರ್ಥಿಕ ರಾಜಧಾನಿ"ಯಾದ ಮುಂಬೈ ನಗರದಲ್ಲಿದೆ ಈ ಭವ್ಯ ಕ್ರೀಡಾಂಗಣ. 45,000 ದಷ್ಟು ಪ್ರೇಕ್ಷಕರು ಕುಳಿತುಕೊಳ್ಳುವ ಸಾಮರ್ಥ್ಯವನ್ನು ಈ ಕ್ರೀಡಾಂಗಣ ಹೊಂದಿದೆ. ಹಲವು ಉನ್ನತ ದರ್ಜೆಯ ಕ್ರಿಕೆಟ್ ಪಂದ್ಯಾವಳಿಗಳನ್ನು ಇಲ್ಲಿ ಆಡಲಾಗಿದ್ದು ಹಿಂದೆ ರವಿ ಶಾಸ್ತ್ರಿ ಈ ಕ್ರೀಡಾಂಗಣದಲ್ಲೆ ಒವರಿನ ಆರೂ ಎಸೆತಗಳನ್ನು ಸಿಕ್ಸರ್ ಹೊಡೆದಿದ್ದರು.
ಚಿತ್ರಕೃಪೆ: G patkar
ಎಂ.ಚಿನ್ನಸ್ವಾಮಿ ಕ್ರೀಡಾಂಗಣ:
ಭಾರತದ ಮಾಹಿತಿ ತಂತ್ರಜ್ಞಾನ ರಾಜಧಾನಿ ಬೆಂಗಳೂರಿನಲ್ಲಿದೆ ಈ ಕ್ರೀಡಾಂಗಣ. ನಾಲ್ಕು ದಶಕಗಳಷ್ಟು ಹಳೆಯದಾದ ಈ ಕ್ರೀಡಾಂಗಣವು ನಗರದ ಹೃದಯ ಭಾಗದಲ್ಲಿ ನೆಲೆಸಿದ್ದು ಸುತ್ತಲೂ ಆಕರ್ಷಕ ಪ್ರವಾಸಿ ಆಕರ್ಷಣೆಗಳಾದ ಕಬ್ಬನ್ ಪಾರ್ಕ್, ಎಂ.ಜಿ ರಸ್ತೆ ಹಾಗು ಕ್ವೀನ್ಸ್ ರಸ್ತೆಗಳಿಂದ ಆವೃತ್ತವಾಗಿದೆ. 40,000 ದಷ್ಟು ಪ್ರೇಕ್ಷಕರು ಕುಳಿತುಕೊಳ್ಳುವ ಸಾಮರ್ಥ್ಯವನ್ನು ಈ ಕ್ರೀಡಾಂಗಣ ಹೊಂದಿದೆ. ಕರ್ನಾಟಕ ಕ್ರಿಕೆಟ್ ಅಸೋಸಿಯೇಷನ್ ಗೆ ನಾಲ್ಕು ದಶಕಗಳ ಕಾಲ ಅಧ್ಯಕ್ಷರಾಗಿದ್ದ ಹಾಗು 1977-80 ಬಿ.ಸಿ.ಸಿ.ಐ ಗೆ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದ ಎಂ.ಚಿನ್ನಸ್ವಾಮಿಯ ಗೌರವಾರ್ಥವಾಗಿ ಕ್ರೀಡಾಂಗಣಕ್ಕೆ ಈ ಹೆಸರನ್ನಿಡಲಾಗಿದೆ.
ಚಿತ್ರಕೃಪೆ: Amarnath.de
ಎಂ.ಎ ಚಿದಂಬರಂ ಕ್ರೀಡಾಂಗಣ:
ತಮಿಳುನಾಡಿನ ಚೆನ್ನೈ ನಗರದಲ್ಲಿರುವ ಈ ಕ್ರಿಕೆಟ್ ಮೈದಾನಕ್ಕೆ ತಮಿಳುನಾಡು ಕ್ರಿಕೆಟ್ ಅಸೋಸಿಯೇಷನ್ ಹಾಗು ಬಿ.ಸಿ.ಸಿ.ಐ ನ ಮಾಜಿ ಅಧ್ಯಕ್ಷರಾಗಿದ್ದ ಎಂ.ಎ ಚಿದಂಬರಂ ಅವರ ನೆನಪಿನಾರ್ಥವಾಗಿ ಕ್ರೀಡಾಂಗಣಕ್ಕೆ ಅವರ ಹೆಸರನ್ನಿಡಲಾಗಿದೆ. ಈ ಕ್ರೀಡಾಂಗಣವು ಚಿಪೌಕ್ ಎಂಬ ಪ್ರದೇಶದಲ್ಲಿರುವುದರಿಂದ ಇದನ್ನು ಚಿಪೌಕ್ ಎಂಬ ಹೆಸರಿನಿಂದಲೂ ಕರೆಯಲಾಗುತ್ತದೆ.
ಚಿತ್ರಕೃಪೆ: Chandrachoodan Gopalakrishnan
ಫಿರೋಜ್ ಶಾ ಕೋಟ್ಲಾ ಮೈದಾನ:
ಹಲವು ಅಂತಾರಾಷ್ಟ್ರೀಯ ಏಕದಿನ ಹಾಗು ಟೆಸ್ಟ್ ಪಂದ್ಯಾವಳಿಗಳನ್ನು ಆಡಲಾಗಿರುವ ಫಿರೋಜ್ ಶಾ ಕೋಟ್ಲಾ ಮೈದಾನವಿರುವುದು ದೇಶದ ರಾಜಧಾನಿ ದೆಹಲಿಯಲ್ಲಿ. ಈ ಮೈದಾನದಲ್ಲಿ ಮೊದಲ ಟೆಸ್ಟ್ ಪಂದ್ಯಾವಳಿಯನ್ನು ಭಾರತವು, ವೆಸ್ಟ್ ಇಂಡೀಸ್ ತಂಡದೊಂದಿಗೆ ನವಂಬರ್ 10, 1948 ರಲ್ಲಿ ಆಡಿತ್ತು. ಈ ಮೈದಾನದಲ್ಲೆ ಅನೀಲ್ ಕುಂಬ್ಳೆ ಒಂದೆ ಇನ್ನಿಂಗ್ಸ್ ನಲ್ಲಿ ಪಾಕಿಸ್ತಾನದ ಹತ್ತು ವಿಕೆಟ್ ಗಳನ್ನು ಕಬಳಿಸಿದ್ದರು.
ಚಿತ್ರಕೃಪೆ: Vineetmbbs
ಸರ್ದಾರ್ ಪಟೇಲ್ ಕ್ರೀಡಾಂಗಣ:
ಈ ಭವ್ಯ ಕ್ರಿಕೆಟ್ ಕ್ರೀಡಾಂಗಣವು ಗುಜರಾತಿನ ಅಹ್ಮದಾಬಾದ್ ನಗರದ ಮೋಟೆರಾ ಎಂಬ ಪ್ರದೇಶದಲ್ಲಿದೆ.
ಚಿತ್ರಕೃಪೆ: Hardik jadeja
ಜವಾಹರ ಲಾಲ್ ನೆಹರೂ ಕ್ರೀಡಾಂಗಣ:
ಅಂತಾರಾಷ್ಟ್ರೀಯ ಕ್ರಿಕೆಟ್ ಪಂದ್ಯಗಳನ್ನು ಆಡಲಾಗುವ ಜವಾಹರ ಲಾಲ್ ನೆಹರೂ ಕ್ರೀಡಾಂಗಣವು ಕೇರಳದ ಕೊಚ್ಚಿ ನಗರದಲ್ಲಿದೆ. 75,000 ದಷ್ಟು ಪ್ರೇಕ್ಷಕರು ಕುಳಿತುಕೊಳ್ಳಬಹುದಾದ ಸಾಮರ್ಥ್ಯವನ್ನು ಈ ಕ್ರೀಡಾಂಗಣವು ಹೊಂದಿದೆ.
ಚಿತ್ರಕೃಪೆ: Zafurockzzz
ಡಿ.ವೈ.ಪಾಟೀಲ್ ಕ್ರೀಡಾಂಗಣ:
ಮುಂಬೈ ನಗರದಲ್ಲಿದೆ ಈ ಕ್ರಿಕೆಟ್ ಮೈದಾನ. 60,000 ದಷ್ಟು ಪ್ರೇಕ್ಷಕರು ಕುಳಿತುಕೊಳ್ಳಬಹುದಾದ ಸಾಮರ್ಥ್ಯವನ್ನು ಈ ಕ್ರೀಡಾಂಗಣವು ಹೊಂದಿದೆ. ಹಫೀಜ್ ಕಂಟ್ರ್ಯಾಕ್ಟರ್ ಎಂಬ ಪ್ರಸಿದ್ಧ ವಾಸ್ತುಶಿಲ್ಪಿಯಿಂದ ಈ ಕ್ರೀಡಾಂಗಣದ ವಿನ್ಯಾಸ ಮಾಡಲಾಗಿದೆ.
ಚಿತ್ರಕೃಪೆ: Redtigerxyz
ಪಿ.ಸಿ.ಎ ಕ್ರೀಡಾಂಗಣ:
ಪಂಜಾಬ್ ಕ್ರಿಕೆಟ್ ಅಸೋಸಿಯೇಷನ್ ಕ್ರೀಡಾಂಗಣವು ಚಂಡೀಗಡ್ ನಗರದ ಹೊರವಲಯದಲ್ಲಿರುವ ಅಜೀತ್ಗಡ್ ಎಂಬಲ್ಲೆ ಸ್ಥಿತವಿದೆ. ಹಿಂದೆ ಮೊಹಾಲಿ ಕ್ರಿಕೆಟ್ ಮೈದಾನ ಎಂದು ಕರೆಯಲಾಗುತ್ತಿತ್ತು. 30,000 ದಷ್ಟು ಪ್ರೇಕ್ಷಕರು ಕುಳಿತುಕೊಳ್ಳಬಹುದಾದ ಸಾಮರ್ಥ್ಯವನ್ನು ಈ ಕ್ರೀಡಾಂಗಣವು ಹೊಂದಿದೆ.
ಗ್ರೀನ್ ಪಾರ್ಕ್ ಕ್ರೀಡಾಂಗಣ:
ಅಂತಾರಾಷ್ಟ್ರೀಯ ಟೆಸ್ಟ್ ಹಾಗು ಏಕದಿನ ಕ್ರಿಕೆಟ್ ಪಂದ್ಯಾವಳಿಗಳಿಗೆ ಆತಿಥೇಯವಹಿಸಿದ ಉತ್ತರ ಪ್ರದೇಶದ ಏಕೈಕ ಕ್ರೀಡಾಂಗಣ ಇದಾಗಿದೆ. ಈ ಕ್ರೀಡಾಂಗಣ ಇರುವುದು ಉತ್ತರ ಪ್ರದೇಶ ರಾಜ್ಯದ ಕಾನಪೂರ್ ನಲ್ಲಿ. 60,000 ದಷ್ಟು ಪ್ರೇಕ್ಷಕರು ಕುಳಿತುಕೊಳ್ಳಬಹುದಾದ ಸಾಮರ್ಥ್ಯವನ್ನು ಈ ಕ್ರೀಡಾಂಗಣವು ಹೊಂದಿದೆ.
ಚಿತ್ರಕೃಪೆ: Prashubh Mishra