Click it and Unblock the Notifications
ಮಶೋಬ್ರ ಶಿಮ್ಲಾ ಜಿಲ್ಲೆಯಲ್ಲಿರುವ ಪ್ರಸಿದ್ದ ಪ್ರವಾಸಿ ತಾಣ. ಬೆಟ್ಟಗಳ ನಡುವಿನ ಪಟ್ಟಣವಾಗಿರುವ ಮಶೋಬ್ರ ಇಲ್ಲಿನ ಮನಮೋಹಕ ಸೌಂದರ್ಯ ಮತ್ತು ತಂಪಾದ ವಾತಾವರಣದಿಂದಾಗಿ ಪ್ರವಾಸಿಗರನ್ನು ಸೆಳೆಯುತ್ತದೆ. ಸಮುದ್ರ ಮಟ್ಟದಿಂದ 2500 ಮೀಟರ್ ಎತ್ತರದಲ್ಲಿರುವ ಮಶೋಬ್ರ ಇಂಡಸ್ ಮತ್ತು ಗಂಗಾ ನದಿಯ ದಡದಲ್ಲಿ ನೆಲೆ ನಿಂತಿದ್ದು ಏಷಿಯಾದ ಅತಿ ದೊಡ್ಡ ನೀರಾವರಿ ಪ್ರದೇಶ ಎನಿಸಿದೆ. ಲೇಡಿ ಮೌಂಟ್ ಬ್ಯಾಟನ್ ಮತ್ತು ಲೇಡಿ ಎಡ್ವಿನಾ ಅವರ ಜೀವನ ಚರಿತ್ರೆಗಳ ಪ್ರಕಾರ, ಮಶೋಬ್ರಾವನ್ನು ಮೊದಲು ಹುಡುಕಿದ್ದು 18 ನೇ ಶತಮಾನದಲ್ಲಿ ಲಾರ್ಡ್ ಡಾಲ್ ಹೌಸಿ. ಮಶೋಬ್ರಾ ಪಟ್ಟಣದ ಒಂದು ವಿಶೇಷವೆಂದರೆ ಹಣ್ಣುಗಳು. ಶಿಮ್ಲಾ ನಗರಕ್ಕೆ ಹಣ್ಣು ಮತ್ತು ತರಕಾರಿ ಪೂರೈಸುವ ಮುಖ್ಯ ನಗರವೆಂದರೆ ಅದು ಮಶೋಬ್ರಾ.
ಮಶೋಬ್ರ ಪಟ್ಟಣ ಶಿಮ್ಲಾದ ಸಾನ್ನಿಧ್ಯದಲ್ಲಿರುವುದರಿಂದ ಬಹಳಷ್ಟು ಪ್ರವಾಸಿಗರನ್ನು ಸೆಳೆಯುತ್ತದೆ. ಇಲ್ಲಿನ ಪ್ರಮುಖ ಆಕರ್ಷಣೆಗಳೆಂದರೆ ಸಂರಕ್ಷಿತ ಅರಣ್ಯ ಧಾಮ ಮತ್ತು ಮಹಸು ದೇವತಾ ದೇವಸ್ಥಾನ. ಮಹಸು ದೇವತೆ ಅಥವಾ ಸ್ಥಳೀಯ ಭಾಷೆಯಲ್ಲಿ ಶಿವನ ದೇವಸ್ಥಾನ ಪ್ರತಿವರ್ಷ ಲಕ್ಷಾಂತರ ಭಕ್ತರನ್ನು ಸೆಳೆಯುತ್ತದೆ. ಮಶೋಬ್ರಾವನ್ನು ಭೇಟಿ ಮಾಡಲು ಬರುವ ಪ್ರವಾಸಿಗರು ಸಂರಕ್ಷಿತ ಅರಣ್ಯ ಧಾಮವನ್ನೂ ನೋಡಲೇಬೇಕು. ಈ ಅರಣ್ಯದಲ್ಲಿ ಅಪರೂಪದ ವನರಾಶಿಗಳನ್ನು ಪಶುಪಕ್ಷಿಗಳನ್ನು ನೋಡಬಹುದು.
ಚಾರಣ, ಶಿಬಿರ, ವನವಿಹಾರ ಮುಂತಾದವುಗಳನ್ನು ಇಲ್ಲಿ ಪ್ರವಾಸಿಗರು ಆಸ್ವಾದಿಸುತ್ತಾರೆ. ಇದೆಲ್ಲವುಗಳ ಹೊರತಾಗಿ ಶಿಮ್ಲಾ ಮತ್ತೊಂದು ಪ್ರಮುಖ ಆಕರ್ಷಣೆಯಾಗಿದ್ದು ಮಶೋಬ್ರಾದಿಂದ ಕೇವಲ 10 ಕಿಲೋ ಮೀಟರ್ ದೂರದಲ್ಲಿದೆ. ಪರ್ವತಗಳ ರಾಣಿ ಎಂದೇ ಹೆಸರು ಪಡೆದಿರುವ ಈ ಸ್ಥಳ ಪ್ರವಾಸಿಗರಿಗೆ ಹಿಮಾಚಲ ರಾಜ್ಯ ಸಂಗ್ರಹಾಲಯ ಮತ್ತು ಗ್ರಂಥಾಲಯವನ್ನು ನೋಡುವ ಸೌಭಾಗ್ಯವನ್ನೂ ನೀಡುತ್ತದೆ.
ನಾಲ್ದೇರಾ, ವೈಲ್ಡ್ ಫ್ಲಾವರ್ ಹಾಲ್ ಮತ್ತು ಕಾರಿಗ್ನಾನೋಗಳು ಮಶೋಬ್ರಾದ ಮತ್ತಷ್ಟು ಆಕರ್ಷಣೆಗಳಾಗಿದ್ದು ಪ್ರತಿದಿನ ಪ್ರವಾಸಿಗರಿಗೆ ಕೈಬಿಸಿ ಕರೆಯುತ್ತವೆ. ಇದರೊಂದಿಗೆ, ಮಹಸು ಜಾತ್ರೆ ಈ ಪ್ರದೇಶದ ಪ್ರಮುಖ ಹಬ್ಬ. ಗ್ರಾಮದ ಅಧಿದೇವತೆಯಾದ ಮಹಸು ದೇವತೆಯ ಹೆಸರಿನಲ್ಲಿ ನಡೆಯುವ ಈ ಹಬ್ಬ ಮಹಸು ಜಾತ್ರೆ ಎಂದೇ ಪ್ರಸಿದ್ದಿ ಪಡೆದಿದೆ. ಇದು ಎರಡು ದಿನಗಳ ಉತ್ಸವವಾಗಿದ್ದು ಪ್ರತಿ ವರ್ಷ ಮೇ ತಿಂಗಳ ಮೂರನೇ ಮಂಗಳವಾರ ದುರ್ಗಾ ದೇವಿಯ ಮುಂದೆ ನೆರವೇರುತ್ತದೆ.
