ತಮಿಳುನಾಡಿನಲ್ಲಿ ಇತ್ತೀಚೆಗಷ್ಟೇ ರೂಪಗೊಂಡ ಒಂದು ಬಹುಮುಖ್ಯ ಜಿಲ್ಲೆ ತೇಣಿ. ಪಶ್ಚಿಮ ಘಟ್ಟಗಳ ಮಡಿಲಿನಲ್ಲಿರುವ ಈ ಊರು ಪ್ರವಾಸಕ್ಕೆ ಹೇಳಿಮಾಡಿಸಿದ ಪ್ರದೇಶ. ಈ ಹೊಸ ಜಿಲ್ಲೆಯು ಪೆರಿಯಾಕುಳಂ, ಉತ್ತಮಪಾಳ್ಯಂ ಮತ್ತು ಆಂಡಿಪಟ್ಟಿಗಳನ್ನು ಒಳಗೊಂಡಿದೆ. ಇವು ಕರಕುಶಲ ಕಲೆ ಮತ್ತು ಕೈಮಗ್ಗದ ವಸ್ತ್ರಗಳಿಗೆ ಹೆಸರುವಾಸಿಯಾದ ಊರುಗಳು. ತೇಣಿ ಮೃದುವಾದ ಟವಲ್ಲುಗಳು, ರಸಭರಿತ ಮಾವಿನಹಣ್ಣುಗಳು, ಉತ್ತಮ ಹತ್ತಿ ರೇಷ್ಮೆ ವಸ್ತ್ರಗಳು, ಏಲಕ್ಕಿ, ಕೆಂಪು ಮೆಣಸಿನಕಾಯಿ, ಕಾಫಿ ಬೀಜ ಮತ್ತು ಹಸಿರು ಟೀಗೆ ಪ್ರಸಿದ್ಧವಾದದ್ದು. ನೀವು ತೇಣಿಗೆ ಹೋದಾಗ ಇವುಗಳ ಖರೀದಿ ಮಾಡಲು ಮರೆಯದಿರಿ.
ತೇಣಿಯ ಸುತ್ತಮುತ್ತಲ ಪ್ರವಾಸಿ ತಾಣಗಳು- ಅಣೆಕಟ್ಟು, ದೇವಾಲಯಗಳು ಮತ್ತು ಜಲಪಾತಗಳ ತವರು
ತೇಣಿಯಲ್ಲಿ ಹಲವಾರು ಪ್ರವಾಸಿ ತಾಣಗಳಿವೆ. ಅವುಗಳಲ್ಲಿ ವಾಗೈ, ಸೊತ್ತುಪ್ಪಾರಿ, ಷಣ್ಮುಗನಾಥೈ ಆಣೆಕಟ್ಟುಗಳು ಅತಿಸುಂದರವಾದ ಪ್ರವಾಸಿ ತಾಣಗಳು. ಇವಲ್ಲದೆ ಸುರಳಿ, ಕುಂಬಕ್ಕರೈ ಮತ್ತು ಚಿನ್ನ ಸುರುಳಿಯಂತಹ ಮನಮೋಹಕ ಜಲಪಾತಗಳಿವೆ. ಹಲವು ಪ್ರಸಿದ್ಧವಾದ ಹಾಗೂ ಪುರಾತನವಾದ ದೇವಾಲಯಗಳೂ ಸಹ ಇಲ್ಲಿವೆ.
ಭಾರತದ ಎಲ್ಲ ಮೂಲೆಗಳಿಂದಲೂ ಭಕ್ತಾದಿಗಳು ಕುಚನೂರು, ಮಾವೊತ್ತು, ತೀರ್ಥ ತೊಟ್ಟಿ, ಕೌಮಾರಿಯಮ್ಮನ್ ದೇವಾಲಯ, ದೇವದಾನಪಟ್ಟಿ ಕಾಮಾಕ್ಷಿ ಅಮ್ಮನ್ ದೇವಾಲಯ ಮತ್ತು ಬಾಲಸುಬ್ರಮಣ್ಯ ದೇವಾಲಯಗಳಿಗೆ ಬರುತ್ತಾರೆ. ಮೇಘಮಲೈ ಗಿರಿಶ್ರೇಣಿ, ಬೋಡಿ ಮೆಟ್ಟು ಮತ್ತು ಪರವಸ ಉಲಗಂ ವಾಟರ್ ಥೀಮ್ ಪಾರ್ಕ್ ಇವು ತೇಣಿಯ ಇನ್ನುಳಿದ ಪ್ರವಾಸಿ ಆಕರ್ಷಣೆಗಳು.
ಹಬ್ಬಗಳು, ಜಾತ್ರಾ ವಿಶೇಷಗಳು
ತೇಣಿಯಲ್ಲಿ ಪೊಂಗಲ್, ಶಿವರಾತ್ರಿ ಮತ್ತು ಮಾಸಿ ಮಾಘಂ ಹಬ್ಬಗಳನ್ನು ಅದ್ದೂರಿಯಾಗಿ ಮಾಡುತ್ತಾರೆ. ಈ ಹಬ್ಬಗಳನ್ನು ಫೆಬ್ರವರಿ ಮತ್ತು ಮಾರ್ಚ್ ತಿಂಗಳುಗಳಲ್ಲಿ ಆಚರಿಸುತ್ತಾರೆ. ತೇಣಿಯ ಪ್ರಸಿದ್ಧವಾದ ಎತ್ತಿನಗಾಡಿ ಸ್ಪರ್ಧೆಯು ಈ ಹಬ್ಬದ ಅವಧಿಯಲ್ಲಿ ನಡೆಯುತ್ತದೆ.
ತೇಣಿಗೆ ವರ್ಷದ ಯಾವ ತಿಂಗಳಲ್ಲಿ ಬೇಕಾದರೂ ಹೋಗಬಹುದು. ಆದರೆ ಹಬ್ಬದ ಸಮಯದಲ್ಲಿ ನಿಮ್ಮ ಪ್ರವಾಸವನ್ನು ರೂಪಿಸಿಕೊಂಡರೆ ಹಬ್ಬದಲ್ಲಿ ಪಾಲ್ಗೊಳ್ಳಬಹುದು. ಈ ಸಮಯದಲ್ಲಿ ಸೆಖೆ ಹೆಚ್ಚಾಗಿರುವುದಿಲ್ಲ ಮತ್ತು ಹವಾಮಾನವು ಓಡಾಟಕ್ಕೆ ತಂಪಾಗಿ ಅನುಕೂಲವಾಗಿರುತ್ತದೆ. ಆದ್ದರಿಂದ ಇದು ತೇಣಿಗೆ ಭೇಟಿ ನೀಡಲು ಉತ್ತಮ ಸಮಯ.