ಸಮುದ್ರ ಮಟ್ಟದಿಂದ 1650 ಮೀ ಎತ್ತರದಲ್ಲಿರುವ ಪೌಡಿ ಒಂದು ನಿಸರ್ಗ ಸಹಜ ಸೌಂದರ್ಯದಿಂದ ಮನಸ್ಸೆಳೆಯುವ ತಾಣವಾಗಿದೆ. ಇದು ಉತ್ತರಾಖಂಡದ ಪೌಡಿ ಗಡ್ವಾಲ್ ಜಿಲ್ಲೆಯ ಜಿಲ್ಲಾಕೇಂದ್ರ ಸ್ಥಳವಾಗಿದೆ. ದೇವದಾರು ಮರಗಳಿಂದ ಆವೃತವಾಗಿರುವ ಹಾಗೂ ಕಂಡೋಲಿಯಾ ಬೆಟ್ಟಗಳ ಇಳಿಜಾರಿನ ಉತ್ತರಕ್ಕೆ ಇರುವ ಇದು ಪ್ರವಾಸಿಗರಿಗೆ ತನ್ನ ಪ್ರಕೃತಿ ಸೌಂದರ್ಯದಿಂದ ಸೆಳೆಯುತ್ತದೆ.

ಇದಲ್ಲದೆ ಮಂಜು ಆವೃತವಾದ ಬಂದರ್ ಪಂಚ್, ಜೊನ್ಲಿ, ಗಂಗೋತ್ರಿ, ನಂದಾದೇವಿ, ತ್ರಿಶುಲ್, ಚೌಂಖಂಬಾ, ಘೋರಿ ಪರ್ವತ, ಹಾಥಿ ಪರ್ವತ, ಸ್ವರ್ ಗರೋಹಿನಿ, ಜೋಗಿನ್ ಸಮೂಹ, ಥಾಲೈಯ್ಯ-ಸಾಗರ್, ಕೇದಾರ್ ನಾಥ್, ಸುಮೇರು ಮತ್ತು ನೀಲಕಂಠ ಬೆಟ್ಟಗಳ ಸೊಬಗೂ ಕೂಡ ಇಲ್ಲಿದೆ. ಅಲಕ್ ನಂದಾ ಮತ್ತು ನಾಯರ್ ಇಲ್ಲಿನ ಎರಡು ಪ್ರಮುಖ ನದಿಗಳಾಗಿವೆ.

ಇದು ಹಲವಾರು ದೇವಾಲಯಗಳಿಗೆ, ವೀಕ್ಷಣಾ ಸ್ಥಳಗಳಿಗೆ ಹಾಗೂ ಪಿಕ್ ನಿಕ್ ತಾಣಗಳಿಗೆ ಪ್ರಸಿದ್ಧವಾಗಿದೆ. ಚೌಖಂಬಾ ವೀಕ್ಷಣಾ ಸ್ಥಳದಿಂದ ಹಿಮಾಲಯ ಪರ್ವತದ ಶಿಖರಗಳ ವೀಕ್ಷಣೆ ಹಾಗೂ ಹಿಮನದಿಗಳ ಸೊಬಗು ಎಲ್ಲರನ್ನು ರಂಜಿಸದೇ ಇರದು. ಖಿರ್ಸು ಇಲ್ಲಿನ ಇನ್ನೊಂದು ಪ್ರಸಿದ್ಧ ಪ್ರವಾಸಿ ಸ್ಥಳ ಇದು ಸಮುದ್ರ ಮಟ್ಟದಿಂದ ಸುಮಾರು 1700 ಮೀ ಎತ್ತರದಲ್ಲಿದೆ. ದಿನನಿತ್ಯದ ಭರಾಟೆ ಮತ್ತು ಆಧುನಿಕ ಜೀವನದ ಗದ್ದಲಗಳಿಂದ ಸ್ವಲ್ಪ ಕಾಲ ದೂರವಿರಲು ಇದೊಂದು ಅತ್ಯುತ್ತಮ ತಾಣ. ಇಲ್ಲಿ ನೀವು ಹಕ್ಕಿಗಳ ಕಲರವ ಬಿಟ್ಟರೆ ಬೇರೆ ಯಾವ ಸದ್ದನ್ನೂ ಕೇಳಲಾರಿರಿ. ಧಾರ್ ದೇವಿ 16 ಕಿ.ಮೀ ದೂರವಿರುವ ಇನ್ನೊಂದು ಪ್ರಸಿದ್ಧ ತಾಣವಾಗಿದೆ. ಇಲ್ಲಿ ದೇವಿ, ಧಾರಿ ದೇವಿಯನ್ನು ಪೂಜಿಸಲಾಗುತ್ತದೆ. ಇದರ ಜೊತೆಗೆ ಪ್ರವಾಸಿಗರು ಪ್ರಸಿದ್ಧವಾದ ಕ್ಯುಂಕಲೇಶ್ವರ ಮಹಾದೇವ ದೇವಾಲಯವನ್ನೂ ಕೂಡ ನೋಡಬಹುದಾಗಿದೆ. ಇದನ್ನು ಆದಿ ಶಂಕರಾಚಾರ್ಯರು ಶಿವ ದೇವರಿಗೊಸ್ಕರ ಕಟ್ಟಿದ ದೇವಾಲಯವಾಗಿದೆ.

ದೂಧಾತೋಲಿ ಸಮುದ್ರ ಮಟ್ಟದಿಂದ 3100 ಮೀ ಎತ್ತರದಲ್ಲಿದೆ. ಇಲ್ಲಿ ಕಂಡೋಲಿಯಾ, ಸಿದ್ಧಿಬಾಯಿ, ಶಂಕರ ಮಠ, ಕೆಷೋರಿ ಮಠ ಮತ್ತು ಜ್ವಲ್ಪಾ ದೇವಿ ದೇವಾಲಯಗಳು ನೋಡಲರ್ಹವಾದ ತಾಣಗಳಾಗಿವೆ. ಇದಲ್ಲದೆ ಲಾಲ್ ಧಂಗ್, ಅದ್ವಾನಿ, ತಾರಾಕುಂಡ್, ಕೊಡ್ವಾರಾ, ಭರತ್ ನಗರ ಮತ್ತು ಶ್ರೀನಗರ ಕೂಡ ನೋಡಲರ್ಹವಾದ ಸ್ಥಳಗಳಾಗಿವೆ. ದೇವಲ್ ಮತ್ತು ಕಾಂಡಾ ದಂತಹ ಸ್ಥಳಗಳಲ್ಲಿರುವ ಹಳೆಯ ಕಾಲದ ದೇವಾಲಯಗಳು ಇನ್ನೊಂದು ಆಕರ್ಷಣೆ.

ನಾಯರ್ ನದಿಯಲ್ಲಿ ಈಜುವುದರೊಂದಿಗೆ, ಆಗ್ಲಿಂಗ್ ಮತ್ತು ಸೈಕ್ಲಿಂಗ್ ಇಲ್ಲಿನ ಪ್ರಮುಖ ಆಟಗಳು. ಪೌಡಿಯನ್ನು ರೈಲು, ವಿಮಾನ ಮತ್ತು ರಸ್ತೆಯ ಮೂಲಕ ತಲುಪಬಹುದಾಗಿದೆ. ಡೆಹ್ರಾಡೂನಿನಲ್ಲಿರುವ ಜಾಲಿ ಗ್ರಾಂಟ್ ವಿಮಾನ ನಿಲ್ದಾಣ 155 ಕಿ.ಮೀ ದೂರದಲ್ಲಿದ್ದು ಹತ್ತಿರದ ವಿಮಾನ ನಿಲ್ದಾಣವಾಗಿದೆ. ಕೋಟ್ ದ್ವಾರಾ ಇಲ್ಲಿ ಸಮೀಪದಲ್ಲಿರುವ ರೈಲ್ವೆ ನಿಲ್ದಾಣವಾಗಿದೆ. ಈ ಎರಡು ನಿಲ್ದಾಣಗಳಿಂದ ಪೌಡಿ ಗೆ ಟಾಕ್ಸಿಗಳು ಲಭ್ಯವಿವೆ. ಪೌಡಿಯು ರಿಷಿಕೇಶ, ಹರಿದ್ವಾರ್, ಡೆಹ್ರಾಡೂನ್ ಮತ್ತು ಮಸ್ಸೂರಿಗೆ ಬಸ್ಸಿನ ಮೂಲಕ ಸಂಪರ್ಕ ಸಾಧಿಸುತ್ತದೆ. ಮಾರ್ಚ್ ನಿಂದ ನವೆಂಬರ್ ತನಕದ ಅವಧಿ ಇಲ್ಲಿಗೆ ಭೇಟಿ ನೀಡಲು ಅತ್ಯಂತ ಸೂಕ್ತವಾದ ಅವಧಿಯಾಗಿದೆ.