ಜಾಗೇಶ್ವರ ಎನ್ನುವುದು ಉತ್ತರ್ ಖಂಡ್ ರಾಜ್ಯದಲ್ಲಿರುವ ಅಲ್ಮೋರಾ ಜಿಲ್ಲೆಯಲ್ಲಿರುವ ಒಂದು ಧಾರ್ಮಿಕ ಮಹತ್ವವನ್ನು ಹೊಂದಿರುವ ನಗರವಾಗಿದೆ. ಇದು ಸಮುದ್ರ ಮಟ್ಟದಿಂದ 1870 ಮೀಟರ್ ಎತ್ತರದಲ್ಲಿ ನೆಲೆಗೊಂಡಿದೆ. ಇತಿಹಾಸದ ಪ್ರಕಾರ, ಈ ಸ್ಥಳವು ಲಕುಲಿಶ್ ಶೈವರ ನೆಲೆಯಾಗಿ ಸೇವೆ ಸಲ್ಲಿಸಿತ್ತು. ಈ ಪಟ್ಟಣವು ಜಟಗಂಗಾ ನದಿ ಕಣಿವೆಯಲ್ಲಿ ನೆಲೆಗೊಂಡಿದೆ. ದಟ್ಟವಾಗಿ ಬೆಳೆದಿರುವ ಹಚ್ಚಹಸಿರಿನ ದೇವದಾರು ಮರಗಳಿಂದ ಕೂಡಿರುವ ಈ ಪ್ರಾಂತ್ಯವು ನೋಡುಗರ ಕಣ್ಣಿಗೆ ಹಬ್ಬವನ್ನುಂಟು ಮಾಡುತ್ತದೆ.

ಈ ಸ್ಥಳದಲ್ಲಿ 12 ಜ್ಯೋರ್ತೀಲಿಂಗಗಳ ಪೈಕಿ ಎಂಟನೇಯ ಜ್ಯೋತಿರ್ಲಿಂಗವಾದ ನಾಗೇಶ್ ಜ್ಯೋರ್ತೀಲಿಂಗವನ್ನು ನಾವು ಇಲ್ಲಿ ಕಾಣಬಹುದು. ಈ ಸ್ಥಳವು ತೀರ್ಥಕ್ಷೇತ್ರವೆಂದು ಸಹ ಪರಿಗಣಿಸಲ್ಪಟ್ಟಿದೆ. ಏಕೆಂದರೆ ಈ ನಗರದ ಸುತ್ತಲು ಶಿವನಿಗಾಗಿ ನಿರ್ಮಿಸಲಾಗಿರುವ 124 ಸಣ್ಣ ಮತ್ತು ದೊಡ್ಡ ದೇವಾಲಯಗಳು ಇವೆ. ಈ ದೇವಾಲಯಗಳ ನಿರ್ಮಾಣ ಕಾಲವು 9 ರಿಂದ 13ನೇ ಶತಮಾನದಷ್ಟು ಹಿಂದಕ್ಕೆ ಕೊಂಡೊಯ್ಯುತ್ತವೆ. ದಂಡೇಶ್ವರ್ ದೇವಾಲಯ, ಜಾಗೇಶ್ವರ ದೇವಾಲಯ, ಚಂಡೀ-ಕಾ-ದೇವಾಲಯ, ಮಹಾಮೃತ್ಯುಂಜಯ ದೇವಾಲಯ, ಕುಬೇರ್ ದೇವಾಲಯ, ನವಗ್ರಹ ದೇವಾಲಯ, ನಂದಾದೇವಿ ದೇವಾಲಯಗಳು ಇಲ್ಲಿರುವ ಪ್ರಸಿದ್ಧ ದೇವಾಲಯಗಳಾಗಿವೆ. ಇವುಗಳೆಲ್ಲದರಲ್ಲಿ ಮಹಾಮೃತ್ಯುಂಜಯ ದೇವಾಲಯವು ಅತ್ಯಂತ ಹಳೆಯದು ಮತ್ತು ದಂಡೇಶ್ವರ್ ದೇವಾಲಯವು ಅತ್ಯಂತ ದೊಡ್ಡದಾಗಿದೆ. ಬುಡ್ ಜಾಗೇಶ್ವರ ದೇವಾಲಯ, ಪುಷ್ಟಿ ಭಗವತಿ ಮಾ ಮತ್ತು ಪ್ರಾಚ್ಯ ವಸ್ತುಸಂಗ್ರಹಾಲಯವು ಈ ಸ್ಥಳದಲ್ಲಿರುವ ಪ್ರಮುಖ ಪ್ರವಾಸಿ ಆಕರ್ಷಣೆಗಳಾಗಿವೆ.

ಜಾಗೇಶ್ವರ ಮಳೆಗಾಲದ ಉತ್ಸವವು ಈ ಪ್ರಾಂತ್ಯದಲ್ಲಿನ ಪ್ರಸಿದ್ಧ ಉತ್ಸವವಾಗಿದೆ. ಇದನ್ನು ಪ್ರತಿವರ್ಷವು ಜುಲೈನಿಂದ 15 ರಿಂದ ಆಗಸ್ಟ್15 ರ ನಡುವೆ ಬರುವ ಶ್ರವಣ ಮಾಸದಲ್ಲಿ ಆಚರಿಸಲಾಗುತ್ತದೆ. ಇದರ ಜೊತೆಗೆ ಮಹಾಶಿವರಾತ್ರಿಯನ್ನು ಸಹ ಅತ್ಯಂತ ಶ್ರದ್ಧಾಭಕ್ತಿಯಿಂದ ಇಲ್ಲಿ ಆಚರಿಸಲಾಗುತ್ತದೆ.

ಈ ಸ್ಥಳಕ್ಕೆ ವಿಮಾನ, ರೈಲು ಮತ್ತು ರಸ್ತೆ ಮಾರ್ಗದ ಮೂಲಕ ಸುಲಭವಾಗಿ ತಲುಪಬಹುದು. ಕಠ್‍ಗೋಡಂ ರೈಲು ನಿಲ್ದಾಣ ಮತ್ತು ಪಂತನಗರ್ ವಿಮಾನ ನಿಲ್ದಾಣವು ಜಾಗೇಶ್ವರಕ್ಕೆ ಸಮೀಪದ ರೈಲು ಮತ್ತು ವಿಮಾನ ನಿಲ್ದಾಣಗಳಾಗಿವೆ. ಪ್ರವಾಸಿಗರು ಪಿಥೋರರಗಡ್, ಹಲ್ದ್ ವಾನಿ ಮತ್ತು ಅಲ್ಮೋರಾದಿಂದ ಜಾಗೇಶ್ವರಕ್ಕೆ ಬಸ್ಸಿನಲ್ಲಿ ಸಹ ಹೋಗಬಹುದು.

ಜಗೇಶ್ವರಕ್ಕೆ ಹೋಗಲು ಯೋಚಿಸುವ ಪ್ರವಾಸಿಗರು ಇಲ್ಲಿಗೆ ಬೇಸಿಗೆ ಕಾಲದಲ್ಲಿ ಭೇಟಿಕೊಡುವುದು ಉತ್ತಮ. ಆಗ ಇಲ್ಲಿನ ವಾತಾವರಣವು ತುಂಬಾ ಆಹ್ಲಾದಕರವಾಗಿರುತ್ತದೆ.