ಉತ್ತರಖಂಡದ ಗಡ್ವಾಲ್ ಜಿಲ್ಲೆಯ ಸಮುದ್ರ ಮಟ್ಟದಿಂದ 2286 ಮೀ ಎತ್ತರದಲ್ಲಿರುವ ಸುಂದರವಾದ ತಾಣ ಧನೌಲ್ತಿ. ಈ ಸ್ಥಳವು ತನ್ನ ಶಾಂತ ವಾತಾವರಣದಿಂದ ಪ್ರಸಿದ್ಧವಾಗಿದ್ದು ಚಂಬಾದಿಂದ ಮಸ್ಸೂರಿಯ ದಾರಿಯ ಮಧ್ಯೆ ಇದೆ. ಇಲ್ಲಿಂದ ಮಸ್ಸೂರಿ ಕೇವಲ 24 ಕಿ.ಮೀ, ಹಾಗಾಗಿ ಪ್ರವಾಸಿಗರಲ್ಲಿ ಈ ತಾಣವೂ ಬಹಳ ಪ್ರಸಿದ್ಧವಾಗಿದೆ. ಇಲ್ಲಿಂದ ಕಾಣುವ ಡೂನ್ ಕಣಿವೆಯ ರಮಣೀಯ ಸೌಂದರ್ಯ ಎಲ್ಲರನ್ನು ಬೆರಗು ಗೊಳಿಸುತ್ತದೆ.

ಇಲ್ಲಿನ ಓಂದು ಪ್ರಮುಖ ಆಕರ್ಷಣೆ ಎಕೋ ಪಾರ್ಕ್. ಇದು ದೇವದಾರು ಮರಗಳಿಂದ ಆವೃತ್ತವಾಗಿದೆ. ಇಲ್ಲಿ ಮಸ್ಸೂರಿ ಅರಣ್ಯ ಇಲಾಖೆಯವರು ಕಟ್ಟಿಸಿದ ಅನೇಕ ಎಕೋ ಗುಡಿಸಲುಗಳಿವೆ. ಇಲ್ಲಿ ಸಿಗುವ ವಸತಿ ಆನಂದ ಬೇರೆಲ್ಲೂ ಸಿಗಲು ಸಾಧ್ಯವಿಲ್ಲ. ಇಲ್ಲಿನ ಸ್ಥಳೀಯ ಭಾಷೆಯಲ್ಲಿ ಆಲೂಖೇತ್ ಎಂದು ಕರೆಯಿಸಿಕೊಳ್ಳುವ ಆಲುಗಡ್ಡೆಯ ತೋಟ ಬಹಳ ಪ್ರಸಿದ್ಧವಾಗಿದೆ.

ದಶಾವತಾರ ದೇವಾಲಯ, ಹೊಸ ತೆಹ್ರಿ ಪಟ್ಟಣ, ಬರೇಹಿ ಪಾಣಿ ಮತ್ತು ಜೊರ್ದಾನಾ ಜಲಪಾತ, ದೇವೋರಾಗ್ ಕೋಟೆ ಮತ್ತು ಮಟಾತಿಲಾ ಜಲಾಶಯ ಇಲ್ಲಿನ ಪ್ರಮುಖ ಪ್ರವಾಸಿ ಆಕರ್ಷಣೆಗಳು. ಇಲ್ಲಿ ಪ್ರವಾಸಿಗರು ಇದರ ಜೊತೆಗೆ ಹಲವು ಸಾಹಸಿ ಕ್ರೀಡೆಗಳನ್ನೂ ಆನಂದಿಸಬಹುದು. ಅವುಗಳೆಂದರೆ ಬಂಡೆ ಕಲ್ಲು ಹತ್ತುವುದು, ನದಿ ದಾಟುವುದು, ಚಾರಣ ಇವೆಲ್ಲವೂ ಚಾಂಗ್ ಧರ್ ಕ್ಯಾಂಪ್ ನಲ್ಲಿ ಲಭ್ಯ. ಈ ಕ್ಯಾಂಪ್ ವಸತಿಯ ಜೊತೆಗೆ ಪ್ರವಾಸಿಗರಿಗೆ ಬೇಕಾದ ಎಲ್ಲಾ ಮೂಲಭೂತ ಅವಶ್ಯಕತೆಗಳನ್ನು ಒದಗಿಸುತ್ತದೆ.

ಧನೌಲ್ತಿಯು ವಿಮಾನ ಮಾರ್ಗ, ರೈಲು ಮತ್ತು ರಸ್ತೆ ಮಾರ್ಗವಾಗಿ ಸುಲಭವಾಗಿ ತಲುಪಬಹುದಾದ ತಾಣವಾಗಿದೆ. ಜಾಲಿ ಗ್ರಾಂಟ್ ಇಲ್ಲಿಗೆ ಸಮೀಪವಿರುವ ವಿಮಾನ ನಿಲ್ದಾಣವಾಗಿದೆ. ಡೆಹ್ರಾಡೂನ್ ಮತ್ತು ರಿಷಿಕೇಶ್ ದ ರೈಲ್ವೆ ನಿಲ್ದಾಣಗಳು ಸಮೀಪದ ರೈಲ್ವೆ ನಿಲ್ದಾಣಗಳಾಗಿವೆ. ಡೆಹ್ರಾಡೂನ್, ಮಸ್ಸೂರಿ, ಹರಿದ್ವಾರ್, ರಿಷಿಕೇಶ್, ರೂರ್ಕಿ ಮತ್ತು ನೈನಿತಾಲ್ ನಂತಹ ಸಮೀಪವಿರುವ ತಾಣಗಳಿಂದ ಬಸ್ಸು ಸೌಲಭ್ಯ ಕೂಡ ಇಲ್ಲಿಗಿದೆ.

ಧನೌಲ್ತಿಗೆ ಭೇಟಿ ನೀಡುವ ಪ್ರವಾಸಿಗರು ಬೇಸಿಗೆ ಅಥವಾ ಚಳಿಗಾಲದಲ್ಲಿ ಭೇಟಿ ನೀಡುವುದು ಸೂಕ್ತವಾಗಿದೆ. ಈ ಅವಧಿಯಲ್ಲಿ ಇಲ್ಲಿನ ವಾತಾವರಣ ಆಹ್ಲಾದಕರವಾಗಿರುತ್ತದೆ.