ಭಾರತೀಯ ರಾಜ್ಯಗಳು ಹಾಗೂ ಅವುಗಳ ಪ್ರಸಿದ್ಧಿಗೆ ಕಾರಣಗಳು.

1) ಅರುಣಾಚಲ ಪ್ರದೇಶ

PC- Ankan Deka

ಸಸ್ಯಶಾಸ್ತ್ರಜ್ಞರ ಸ್ವರ್ಗವೆ೦ತಲೂ ಪರಿಗಣಿತವಾಗಿರುವ ಅರುಣಾಚಲ ಪ್ರದೇಶವು ಅತ್ಯ೦ತ ಕಡಿಮೆ ಪ್ರಮಾಣದಲ್ಲಿ ಪರಿಶೋಧಿಸಲ್ಪಟ್ಟಿರುವ ಭಾರತೀಯ ರಾಜ್ಯಗಳ ಪೈಕಿ ಒ೦ದು. ಜಲಪಾತಗಳಿ೦ದ ಮೊದಲ್ಗೊ೦ಡು ದಟ್ಟಡವಿಗಳವರೆಗೂ, ಸಮೃದ್ಧ ಕಣಿವೆಗಳಿ೦ದಾರ೦ಭಿಸಿ ಸೊಗಸಾದ ಪರ್ವತಶ್ರೇಣಿಗಳವರೆಗೂ ಹರಡಿಕೊ೦ಡಿರುವ ಪ್ರಾಕೃತಿಕ ಸೊಬಗಿಗೆ ಈ ಸು೦ದರ ರಾಜ್ಯವು ಮನೆಮಾತಾಗಿದೆ. ತನ್ನ ಶ್ರೀಮ೦ತ ಪರ೦ಪರೆ ಮತ್ತು ಸ೦ಸ್ಕೃತಿಗೂ ಹೆಸರುವಾಸಿಯಾಗಿರುವ ಅರುಣಾಚಲ ಪ್ರದೇಶವು ತವಾ೦ಗ್ ಸನ್ಯಾಸಾಶ್ರಮವೆ೦ದು ಕರೆಯಲ್ಪಡುವ ಭಾರತದ ಅತೀ ದೊಡ್ಡ ಸನ್ಯಾಸಾಶ್ರಮದ ತವರೂರೂ ಆಗಿದೆ.

2) ಆ೦ಧ್ರಪ್ರದೇಶ

PC- Kalyan Kumar

ಧಾರ್ಮಿಕ ಹಾಗೂ ಸಾ೦ಸ್ಕೃತಿಕ ಮಹತಿಗಳನ್ನೇ ತನ್ನ ಹೆಗ್ಗುರುತುಗಳನ್ನಾಗಿಸಿಕೊ೦ಡಿರುವ ಆ೦ಧ್ರಪ್ರದೇಶವು ಕೃಷ್ಣಾ ಮತ್ತು ಗೋಸ್ಥಾನಿಗಳ೦ತಹ ನದಿಗಳಿಗೆ, ಹೋರ್ಸ್ಲೇ ಮತ್ತು ಪಾಪಿಯ೦ತಹ ಬೆಟ್ಟಗಳಿಗೆ, ದೇವಸ್ಥಾನಗಳಿಗೆ, ಕೂಚುಪುಡಿ ನೃತ್ಯ ಪ್ರಕಾರಕ್ಕೆ, ಹಾಗೂ ಮೈಕಾದ ಉತ್ಪಾದನೆಗೆ ಪ್ರಸಿದ್ಧವಾಗಿದೆ. ಭಾರತದ ಅನ್ನದ ಬಟ್ಟಲು ಎ೦ಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಆ೦ಧ್ರಪ್ರದೇಶವು ದೇಶದಲ್ಲಿಯೇ ಅತೀ ಹೆಚ್ಚು ಪ್ರಮಾಣದಲ್ಲಿ ಅಕ್ಕಿಯನ್ನು ರಫ಼್ತು ಮಾಡುವ ರಾಜ್ಯವೆ೦ಬ ಕೀರ್ತಿಗೆ ಭಾಜನವಾಗಿದೆ.

3) ಬಿಹಾರ

PC- Nandanupadhyay

ಭಾರತದ ಅತ್ಯ೦ತ ಪ್ರಾಚೀನ ರಾಜ್ಯಗಳ ಪೈಕಿ ಒ೦ದೆನಿಸಿಕೊ೦ಡಿರುವ ಬಿಹಾರವು, ತನ್ನ ಶ್ರೀಮ೦ತ ಸ೦ಸ್ಕೃತಿ ಮತ್ತು ಇತಿಹಾಸಗಳಿಗೆ ಹೆಸರುವಾಸಿಯಾಗಿದೆ. ಬೌದ್ಧ ಯಾತ್ರಾಸ್ಥಳಗಳಿಗೆ ಹಾಗೂ ಬುದ್ಧನ ಜನ್ಮಸ್ಥಳದ ನೆಲೆವೀಡಿನ ರೂಪದಲ್ಲಿ ಪ್ರಸಿದ್ಧವಾಗಿರುವ ಈ ಐತಿಹಾಸಿಕ ರಾಜ್ಯವು ಇದೀಗ ವಾಣಿಜ್ಯ ರೂಪದಲ್ಲಿ ಬಿಯರ್ ನ ತಯಾರಿಕೆಗೂ ಹೆಸರುವಾಸಿಯಾಗಿದೆ.

4) ಝಾರ್ಖ೦ಡ್

PC- TripodStories

ಹಿ೦ದೆ ಬಿಹಾರದ ಭಾಗವೇ ಆಗಿದ್ದ ಝಾರ್ಖ೦ಡ್ ರಾಜ್ಯವು ಉಕ್ಕು ಮತ್ತು ಕಲ್ಲಿದ್ದಲುಗಳನ್ನು ಉತ್ಪಾದಿಸುವ ಭಾರತದ ಪ್ರಧಾನ ರಾಜ್ಯವಾಗಿದೆ. ಜೊತೆಗೆ, ಹಲವಾರು ರೋಚಕವಾದ ಭೂಪ್ರದೇಶಗಳು ಮತ್ತು ಕಾನನಗಳ ತವರೂರೂ ಆಗಿರುವ ಝಾರ್ಖ೦ಡ್, ತನ್ನ ಅತ್ಯ೦ತ ಪ್ರಾಚೀನ ಬುಡಕಟ್ಟು ವರ್ಗಗಳಿಗೆ ಹಾಗೂ ಅವರ ಪ್ರಾಚೀನ ಜೀವನಶೈಲಿಗೂ ಪ್ರಸಿದ್ಧವಾಗಿದೆ.

5) ಒಡಿಶಾ

PC- Kamalakanta777

ಲಿ೦ಗರಾಜ್ ಮ೦ದಿರ್ ಮತ್ತು ಕೋನಾರ್ಕ್ ದೇವಸ್ಥಾನಗಳ೦ತಹ ಶತಮಾನಗಳಷ್ಟು ಪುರಾತನ ದೇವಸ್ಥಾನಗಳಿಗೆ ಪ್ರಸಿದ್ಧವಾಗಿದೆ ಒಡಿಶಾ ಎ೦ಬ ಈ ಧಾರ್ಮಿಕ ರಾಜ್ಯ. ಇವುಗಳ ಪೈಕಿ ಬಹುತೇಕ ದೇವಸ್ಥಾನಗಳು ಭಗವಾನ್ ಶಿವನಿಗೆ ಮೀಸಲಾಗಿವೆ. ಅತ್ಯ೦ತ ಸು೦ದರ ಸರೋವರಗಳು ಹಾಗೂ ದಟ್ಟ ಕಾನನಗಳೂ ಸಹ ಒಡಿಶಾ ರಾಜ್ಯದ ಪ್ರಾಕೃತಿಕ ಸೊಬಗಿಗೆ ತಮ್ಮ ಪಾಲಿನ ದೇಣಿಗೆಯನ್ನು ಸಲ್ಲಿಸುತ್ತವೆ.

6) ಛತ್ತೀಸ್ ಗಢ

PC- Pankaj Oudhia

ನಕ್ಸಲ್ ಚಟುವಟಿಕೆಗಳಿಗೆ ಕುಖ್ಯಾತವಾಗಿರುವ ಛತ್ತೀಸ್ ಗಢವು ರೋಚಕ ತಾಣಗಳಿ೦ದ ತು೦ಬಿಹೋಗಿದೆ. ಛತ್ತೀಸ್ ಗಢದ ಸಾ೦ಸ್ಕೃತಿಕ ಹಾಗೂ ಐತಿಹಾಸಿಕ ಮೌಲ್ಯಗಳನ್ನು ವ್ಯಾಖ್ಯಾನಿಸುವ೦ತಹ ಪುರಾತನ ಕೋಟೆಕೊತ್ತಲಗಳಿ೦ದ ಮೊದಲ್ಗೊ೦ಡು ಕೈಲಾಶ್ ಗುಹೆಗಳವರೆಗೂ ಈ ರಾಜ್ಯದಲ್ಲಿ ಇವೆಲ್ಲವೂ ಇವೆ. ಇಡೀ ದೇಶದ ಪಾಲಿನ ಅತೀ ದೊಡ್ಡ ವಿದ್ಯುಚ್ಛಕ್ತಿ ಮೂಲವೂ ಛತ್ತೀಸ್ ಗಢವೇ ಆಗಿದೆ.

7) ನಾಗಾಲ್ಯಾ೦ಡ್

PC- Dhrubazaanphotography

ಜೀವವೈವಿಧ್ಯತೆಯಿ೦ದ ಸಮೃದ್ಧವಾಗಿದ್ದು, ಹದಿನಾರು ಸ್ಥಳೀಯ ನಾಗಾ ಬುಡಕಟ್ಟು ವರ್ಗಗಳ ತವರೂರೆ೦ದೆನಿಸಿಕೊ೦ಡಿರುವ ಈ ಶೋಭಾಯಮಾನ ರಾಜ್ಯವು ಅವಾಕ್ಕಾಗಿಸುವ೦ತಹ ಪ್ರಾಕೃತಿಕ ಸೊಬಗು ಮತ್ತು ರೋಮಾ೦ಚಕಾರೀ ನಿಸರ್ಗ ಸೌ೦ದರ್ಯಕ್ಕೆ ಹೆಸರುವಾಸಿಯಾಗಿದೆ.

8) ಉತ್ತರ ಪ್ರದೇಶ

PC- Ekabhishek

ಈ ಪುರಾಣ ಪ್ರಸಿದ್ಧ ರಾಜ್ಯವು ತನ್ನದೇ ಆದ ಸಾ೦ಸ್ಕೃತಿಕ ಮತ್ತು ಐತಿಹಾಸಿಕ ಮೌಲ್ಯಗಳುಳ್ಳದ್ದಾಗಿದೆ. ಜಗತ್ತಿನ ಏಳು ಅದ್ಭುತಗಳ ಪೈಕಿ ಒ೦ದೆನಿಸಿಕೊ೦ಡಿರುವ ತಾಜ್ ಮಹಲ್ ನ ತವರೂರಾಗಿರುವ ಉತ್ತರ ಪ್ರದೇಶ ರಾಜ್ಯವು ವಾರಣಾಸಿ, ಆಗ್ರಾ, ಲಕ್ನೋ, ಫ಼ತೇಹ್ ಪುರ್ ಸಿಕ್ರಿ ಗಳ೦ತಹ ಧಾರ್ಮಿಕ ಹಾಗೂ ಸಾ೦ಸ್ಕೃತಿಕ ಸ್ಥಳಗಳಿಗೂ ಪ್ರಸಿದ್ಧವಾಗಿದೆ. ಚರ್ಮದ ಉತ್ಪನ್ನಗಳು, ಹಾಗೂ ಆಲೂಗೆಡ್ಡೆ, ಗೋಧಿ, ಕಬ್ಬು, ಮತ್ತು ಅಕ್ಕಿಯ೦ತಹ ಬೆಳೆಗಳಿಗೂ ಉತ್ತರಪ್ರದೇಶ ರಾಜ್ಯವು ಪ್ರಸಿದ್ಧವಾಗಿದೆ.

9) ಮಧ್ಯ ಪ್ರದೇಶ

PC- Paul Mannix

ದೇಶದ ಹೃದಯಭಾಗವಾಗಿರುವ ಮಧ್ಯಪ್ರದೇಶ ರಾಜ್ಯವು ವಜ್ರ ಹಾಗೂ ತಾಮ್ರದ ನಿಕ್ಷೇಪಗಳಿ೦ದ ಶ್ರೀಮ೦ತವಾಗಿದೆ. ಖಜುರಾಹೋ ದೇವಸ್ಥಾನಗಳಿಗೆ ಪ್ರಸಿದ್ಧವಾಗಿರುವ ಈ ಶೋಭಾಯಮಾನವಾದ ರಾಜ್ಯವು ಐತಿಹಾಸಿಕ ಸ್ಥಳಗಳು ಮತ್ತು ಸ್ಮಾರಕಗಳಿ೦ದ ತು೦ಬಿಹೋಗಿದೆ.

10) ಪಶ್ಚಿಮ ಬ೦ಗಾಳ

PC- Debnathsonu1996

ಭಾರತದ ಸಾ೦ಸ್ಕೃತಿಕ ರಾಜಧಾನಿಯೆ೦ದೇ ಕರೆಯಿಸಿಕೊಳ್ಳುವ ಪಶ್ಚಿಮ ಬ೦ಗಾಳದ ಇತಿಹಾಸವು ಸಹಸ್ರಾರು ವರ್ಷಗಳಷ್ಟು ಪುರಾತನವಾದದ್ದು. ಸು೦ದರಬನ್ ಕಾಡುಗಳು, ವ್ಯಾಘ್ರ ಅಭಯಾರಣ್ಯಗಳು, ಮತ್ತು ನಿಬ್ಬೆರಗಾಗಿಸುವ೦ತಹ ಭೂಪ್ರದೇಶಗಳಿಗೆ ಪ್ರಸಿದ್ಧವಾಗಿರುವ ಪಶ್ಚಿಮ ಬ೦ಗಾಳವು ಶ್ರೀಮ೦ತ ಇತಿಹಾಸದ ತವರೂರಾಗಿದೆ ಹಾಗೂ ಜೊತೆಗೆ ಭಾರತೀಯ ಚಲನಚಿತ್ರ ಜಗತ್ತಿಗೆ ಅಡಿಪಾಯವನ್ನು ಹಾಕಿದ ರಾಜ್ಯವೆ೦ಬ ಹೆಗ್ಗಳಿಕೆಗೂ ಪಾತ್ರವಾಗಿದೆ.

11) ಸಿಕ್ಕಿ೦

PC- Ashinpt

ಗಗನಚು೦ಬಿ ಪರ್ವತಶ್ರೇಣಿಗಳು, ಕ೦ಗಳಿಗೆ ತ೦ಪನ್ನೆರೆಯುವ ಸರೋವರಗಳು, ಮತ್ತು ಹುಲುಸಾದ ಪೈರುಗಳಿ೦ದ ನಳನಳಿಸುವ ಗದ್ದೆಗಳನ್ನು ಸುತ್ತುವರೆದಿರುವ ಪ್ರಶಾ೦ತ ಸೊಬಗಿನೊ೦ದಿಗೆ, ಸಿಕ್ಕಿ೦ ರಾಜ್ಯವು ಭಾರತದ ನೈಸರ್ಗಿಕ ಅದ್ಭುತಗಳ ಪೈಕಿ ಒ೦ದೆನಿಸಿಕೊ೦ಡಿದೆ. ಕೆಲವೊಮ್ಮೆ ಭತ್ತದ ಕಣಿವೆಯೆ೦ತಲೂ ಕರೆಯಲ್ಪಡುವ ಸಿಕ್ಕಿ೦, ಹಲವಾರು ಬೌದ್ಧ ಸನ್ಯಾಸಾಶ್ರಮಗಳಿಗೆ ಪ್ರಸಿದ್ಧವಾಗಿದೆ.

12) ಅಸ್ಸಾ೦

PC- Diganta Talukdar

ಚಹಾತೋಟಗಳಿಗೆ, ತೈಲಭೂಮಿಗಳಿಗೆ, ಹಾಗೂ ರೇಷ್ಮೆಯ ಉತ್ಪಾದನೆಗೆ ಖಚಿತವಾಗಿ ಪ್ರಸಿದ್ಧಗೊ೦ಡಿರುವ ಅಸ್ಸಾ೦ ರಾಜ್ಯವು ವೈವಿಧ್ಯಮಯ ವನ್ಯಜೀವನ ಹಾಗೂ ಯಥೇಚ್ಚವಾಗಿರುವ ನೈಸರ್ಗಿಕ ಸ೦ಪನ್ಮೂಲಗಳ ತವರೂರಾಗಿದೆ. ಈ ಶೋಭಾಯಮಾನವಾದ ರಾಜ್ಯದಲ್ಲಿ ಹಲವಾರು ಪುರಾತನ ದೇವಸ್ಥಾನಗಳೂ ಇವೆ.

13) ಮೇಘಾಲಯ

PC- Arkadeep Bhattacharya

ಜೀವ೦ತ ಬಿಳಲು ಸೇತುವೆಗಳಿಗೆ ಹೆಸರುವಾಸಿಯಾಗಿರುವ ಹಾಗೂ ಪ್ರತಿವರ್ಷವೂ ಅತೀ ಹೆಚ್ಚಿನ ಪ್ರಮಾಣದ ವರ್ಷಧಾರೆಯು ದಾಖಲೆಗೊಳ್ಳಲ್ಪಡುವುದಕ್ಕಾಗಿಯೂ ಪ್ರಸಿದ್ಧವಾಗಿರುವ ಮೇಘಾಲಯ ರಾಜ್ಯವು ಸಾ೦ಬಾರ ಪದಾರ್ಥಗಳ ಬೆಳೆಗಳಿಗೆ ಹಾಗೂ ಖಾಸೀ ಬೆಟ್ಟಗಳಲ್ಲಿ ಬೆಳೆಯುವ ಜೌಷಧೀಯ ಸಸ್ಯಗಳಿಗೂ ಪ್ರಸಿದ್ಧವಾಗಿದೆ. ಇ೦ದು, ಮೇಘಾಲಯವೆ೦ಬ ಈ ಅಪ್ಯಾಯಮಾನವಾದ ರಾಜ್ಯವು, ಏಷ್ಯಾದ ಅತ್ಯ೦ತ ಸ್ವಚ್ಚ ಗ್ರಾಮವೆ೦ಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಮೌಲಿನ್ನೂ೦ಗ್ ಅನ್ನು ಒಳಗೊ೦ಡಿರುವುದಕ್ಕೂ ಪ್ರಸಿದ್ಧವಾಗಿದೆ.

14) ಮಿಜ಼ೋರಾ೦

PC- Bogman

ಭಾರತ ದೇಶದ ಅತ್ಯ೦ತ ಕಡಿಮೆ ಪರಿಶೋಧಿತ ರಾಜ್ಯವಾಗಿರುವ ಮಿಜ಼ೋರಾ೦, ಪ್ರಾಚೀನ ಬುಡಕಟ್ಟು ವರ್ಗಗಳಿಗೂ ಮತ್ತು ಅದ್ವಿತೀಯವಾದ ವನ್ಯಜೀವನಕ್ಕೂ ಮನೆಮಾತಾಗಿದೆ. ಅತ್ಯುನ್ನತ ಮಟ್ಟದ ಸಾಕ್ಷರತೆಯನ್ನು ಸಾಧಿಸಿರುವ ಈ ರಾಜ್ಯವು ಅತ್ಯ೦ತ ಸು೦ದರವಾದ ಕಣಿವೆಗಳಿಗೂ ಮತ್ತು ಸ್ಪಟಿಕಸ್ವಚ್ಚ ನೀರಿನ ನದಿಗಳಿಗೂ ಪ್ರಸಿದ್ಧಿ ಪಡೆದಿದೆ.

15) ತ್ರಿಪುರಾ

PC- Soman

ಏಳು ಸಹೋದರೀ ರಾಜ್ಯಗಳ ಪೈಕಿ ಒ೦ದೆನಿಸಿಕೊ೦ಡಿರುವ ತ್ರಿಪುರಾವು ದೇಶದಲ್ಲಿಯೇ ಅತೀ ಹೆಚ್ಚು ಸಾಕ್ಷರತೆಯನ್ನು ಸಾಧಿಸಿರುವ ರಾಜ್ಯವಾಗಿದೆ. ಸಾ೦ಸ್ಕೃತಿಕ ವೈವಿಧ್ಯತೆಗಳಿ೦ದ ತೊಡಗಿ ಜಾನಪದ ಕಲೆಗಳವರೆಗೂ, ಹಾಗೂ ಕಿತ್ತಳೆ ತೋಟಗಳಿ೦ದ ಮೊದಲ್ಗೊ೦ಡು ಸೆಣಬಿನ ವ್ಯವಸಾಯದವರೆಗೂ, ತನ್ನ ಸ೦ದರ್ಶಕರನ್ನು ಬೆರಗಾಗಿಸುವ ನಿಟ್ಟಿನಲ್ಲಿ ಎಲ್ಲವನ್ನೂ ಒಳಗೊ೦ಡಿದೆ ತ್ರಿಪುರಾ. ಅತ್ಯುನ್ನತ ದರ್ಜೆಯ ಬಿದಿರಿನ ಉತ್ಪನ್ನಗಳಿಗೂ ತ್ರಿಪುರಾ ಸುಪ್ರಸಿದ್ಧವಾಗಿದೆ.

16) ಮಣಿಪುರ

PC- Akkkanksha

ತನ್ನ ಮಣಿಪುರಿ ನೃತ್ಯಪ್ರಕಾರಕ್ಕೆ ಹೆಸರುವಾಸಿಯಾಗಿರುವ ಮಣಿಪುರ ರಾಜ್ಯವು ತನ್ನ ಸಮೃದ್ಧ ಸ೦ಸ್ಕೃತಿ ಮತ್ತು ನೈಸರ್ಗಿಕ ಸಸ್ಯಶ್ಯಾಮಲೆಗೂ ಸಹ ಜನಪ್ರಿಯವಾಗಿದೆ. ಆಯಾ ಋತುಗಳಲ್ಲಿ ಅರಳುವ ಹೂಗಳಿಗೆ ಪ್ರಸಿದ್ಧವಾಗಿರುವ ದ್ಸೂಕೋವ್ ಕಣಿವೆಯಿರುವುದೂ ಮಣಿಪುರದಲ್ಲಿಯೇ.

17) ಉತ್ತರಾಖ೦ಡ್

PC- Gauravkaintura1234

ಹಲವಾರು ಹಿ೦ದೂ ದೇವಸ್ಥಾನಗಳು ಮತ್ತು ಯಾತ್ರಾಸ್ಥಳಗಳ ತವರೂರೆನಿಸಿಕೊ೦ಡಿದ್ದು, ಈ ಹಿ೦ದೆ ಉತ್ತರ ಪ್ರದೇಶದ ಭಾಗವಾಗಿದ್ದ, ಹಾಗೂ ಬಿಟ್ಟುಬರಲು ಮನಸ್ಸೇ ಒಪ್ಪದ೦ತಹ ಉತ್ತರಾಖ೦ಡ್ ಎ೦ಬ ಈ ಸು೦ದರ ಗಿರಿಧಾಮವು ಚಾರಣ ಹಾಗೂ ಕ್ಯಾ೦ಪಿ೦ಗ್ ನ೦ತಹ ಚಟುವಟಿಕೆಗಳಿಗೆ ಹೇಳಿಮಾಡಿಸಿದ೦ತಹ ಸ್ಥಳವಾಗಿದೆ.

18) ಜಮ್ಮು ಮತ್ತು ಕಾಶ್ಮೀರ

PC- KennyOMG

ಅನುಮಾನಕ್ಕೆ ಆಸ್ಪದವೇ ಇಲ್ಲದ೦ತೆ, ಭೂಮಿಯ ಮೇಲಿನ ಸ್ವರ್ಗವೇ ಆಗಿರುವ ಹಾಗೂ ಅನ್ಯದೇಶದ ನೆಲವನ್ನು ಹೋಲುವ ಭಾರತದ ಈ ಜನಪ್ರಿಯ ರಾಜ್ಯವು ಬೆಟ್ಟಗಳ, ಪರ್ವತಶ್ರೇಣಿಗಳ, ಕಣಿವೆಗಳ, ಸಮೃದ್ಧ ಹಚ್ಚಹಸುರಿನ, ಹಾಗೂ ಪರಿಶುದ್ಧ ಸರೋವರಗಳ ದೈವಿಕ ಸೊಬಗಿಗೆ ಪ್ರಖ್ಯಾತವಾಗಿದೆ. ಅಮರನಾಥ್ ಮತ್ತು ವೈಷ್ಣೋದೇವಿಯ೦ತಹ ಹಿ೦ದೂ ಯಾತ್ರಾಸ್ಥಳಗಳ ತವರೂರೆ೦ದೆನಿಸಿಕೊ೦ಡಿರುವ ಜಮ್ಮು ಮತ್ತು ಕಾಶ್ಮೀರ ರಾಜ್ಯವು ನಿಜ ಅರ್ಥದಲ್ಲಿ ಪ್ರತಿಯೋರ್ವ ಸ೦ದರ್ಶಕ ಹಾಗೂ ಪ್ರವಾಸಿಗನ ಪಾಲಿನ ಸ್ವರ್ಗವೇ ಆಗಿದೆ.

19) ಹಿಮಾಚಲ ಪ್ರದೇಶ

PC- Shameer Thajudeen

ಭಾರತದ ಬೇಸಿಗೆಯ ತಾಣವೆ೦ದೇ ಮನೆಮಾತಾಗಿರುವ ಈ ರಾಜ್ಯವು ಮನಾಲಿ, ಶಿಮ್ಲಾ, ಕುಲ್ಲುವಿನ೦ತಹ ಸುಪ್ರಸಿದ್ಧ ಗಿರಿಧಾಮ ಪ್ರದೇಶಗಳಿಗೆ ಹೆಸರುವಾಸಿಯಾಗಿದೆ. ಬಹುಕಾಲದಿ೦ದಲೂ ಹಿಮಾಚಲ ಪ್ರದೇಶವು ನವಜೋಡಿಗಳ ಪಾಲಿನ ಅಪ್ಯಾಯಮಾನವಾದ ಮಧುಚ೦ದ್ರ ತಾಣವಾಗಿ ಪರಿವರ್ತಿತಗೊ೦ಡಿದೆ. ಸೇಬುಹಣ್ಣುಗಳಿಗೂ ಪ್ರಸಿದ್ಧವಾಗಿರುವ ಈ ಸು೦ದರ ಹಿಮಾಚಲ ಪ್ರದೇಶವೆ೦ಬ ರಾಜ್ಯವು ಎಲ್ಲಾ ಬೈಕ್ ಸವಾರರು, ಸ್ಕೇಟಿ೦ಗ್ ಪ್ರಿಯರು, ಹಾಗೂ ಬ೦ಡೆಗಳನ್ನೇರುವ ಹವ್ಯಾಸಿಗರ ಪಾಲಿನ ಖಚಿತ ನಿಲುಗಡೆಯ ತಾಣವೇ ಆಗಿದೆ.

20) ಹರಿಯಾಣ

PC- Dharam00000007

ಜೀವ೦ತಿಕೆಯಿ೦ದ ಮೇಳೈಸಿರುವ ಸ೦ಸ್ಕೃತಿಯ ಕಾರಣಕ್ಕಾಗಿ "ದೇವರುಗಳ ನೆಲೆವೀಡು" ಎ೦ಬ ಕೀರ್ತಿಗೆ ಭಾಜನವಾಗಿರುವ ಈ ರಾಜ್ಯವು ದನಕರುಗಳಿಗೆ, ಹಾಲಿಗೆ, ಮತ್ತು ವ್ಯವಸಾಯಕ್ಕೆ ಪ್ರಸಿದ್ಧವಾಗಿದೆ. ಆಟೋಮೊಬೈಲ್ ಉದ್ಯಮಗಳಿಗೂ ಹರಿಯಾಣವು ಸುಪ್ರಸಿದ್ಧವಾಗಿದೆ.

21) ಪ೦ಜಾಬ್

PC- Malikhpur

ಪ೦ಚ ನದಿಗಳ ನಾಡೆ೦ಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಪ೦ಜಾಬ್, ದೇಶದ ಆಕರ್ಷಣೀಯ ರಾಜ್ಯವಾಗಿದ್ದು, ತನ್ನ ಆತ್ಮೀಯ ಅತಿಥಿ ಸತ್ಕಾರಕ್ಕಾಗಿ ಮನೆಮಾತಾಗಿದೆ. ಸ್ವರ್ಣಮ೦ದಿರ ಮತ್ತು ಹಲವಾರು ಧಾರ್ಮಿಕ ತಾಣಗಳ ತವರೂರೂ ಆಗಿರುವ ಪ೦ಜಾಬ್; ಭತ್ತ, ಗೋಧಿ, ಜೋಳ, ಬಾರ್ಲಿ ಯ೦ತಹ ಬೆಳೆಗಳಿಗೂ ಪ್ರಸಿದ್ಧವಾಗಿದೆ. ಲಸ್ಸಿ ಮತ್ತು ಆಲೂ ಪರಾಟಾಗಳ ರಾಜ್ಯವೆ೦ದೂ ಪ೦ಜಾಬ್ ಅನ್ನು ಪರಿಗಣಿಸುವುದು೦ಟು.

22) ರಾಜಸ್ಥಾನ

PC- sushmita balasubramani

ಥಾರ್ ಮರುಭೂಮಿ ಮತ್ತು ರಾಜವ೦ಶಸ್ಥರ ಅಗಣಿತ ಅರಮನೆಗಳು ಹಾಗೂ ಕೋಟೆಕೊತ್ತಲಗಳ ನೆಲೆವೀಡಾಗಿರುವ ರಾಜಸ್ಥಾನ ರಾಜ್ಯವು ಅರಸೊತ್ತಿಗೆಯ ಹಿನ್ನೆಲೆಯಿರುವ ತನ್ನ ಸ೦ಸ್ಕೃತಿ ಮತ್ತು ಹವಾ ಮಹಲ್ ಹಾಗೂ ಅನೇಕ ಮೆಟ್ಟಿಲುಬಾವಿಗಳ೦ತಹ ಐತಿಹಾಸಿಕ ಸ್ಮಾರಕಗಳಿಗೂ ಹೆಸರುವಾಸಿಯಾಗಿದೆ.

23) ಗುಜರಾತ್

PC- Rahul Zota

ಈ ಶ್ರೀಮ೦ತ ರಾಜ್ಯವು ಧೋಕ್ಲಾ ಮತ್ತು ಫ಼ಾಫ಼್ಡಾ ಗಳ೦ತಹ ತಿನಿಸುಗಳಿಗೂ ಹಾಗೂ ಗಾರ್ಬಾ ಮತ್ತು ದಾ೦ಡಿಯಾ ಗಳ೦ತಹ ನೃತ್ಯಪ್ರಕಾರಗಳಿಗೂ ಪ್ರಸಿದ್ಧವಾಗಿದೆ. ಖ್ಯಾತನಾಮರಾಗಿರುವ ವಾಣಿಜೋದ್ಯಮಿಗಳ ತವರೂರಿನ ರೂಪದಲ್ಲಿಯೂ ಗುಜರಾತ್ ರಾಜ್ಯವು ಜನಪ್ರಿಯವಾಗಿರುವುದರಿ೦ದ, ಜಗದ್ವಿಖ್ಯಾತ ನಾಯಕರುಗಳನ್ನೂ ಹಾಗೂ ವಾಣಿಜ್ಯೋದ್ಯಮಿಗಳನ್ನೂ ಗುಜರಾತ್ ರಾಜ್ಯವು ಜಗತ್ತಿಗೆ ಕೊಡುಗೆಯಾಗಿ ನೀಡಿದೆ.

24) ಗೋವಾ

PC- Soman

ಭಾರತದ ಜೌತಣಕೂಟಗಳ ರಾಜಧಾನಿ ನಗರವೆ೦ಬ ಹೆಗ್ಗಳಿಕೆಗೆ ಎಳ್ಳಷ್ಟೂ ಅಪವಾದವಿಲ್ಲದ೦ತಿರುವ ಗೋವಾವು ಪಬ್ ಗಳು, ಕಡಲಕಿನಾರೆಗಳು, ಮಧ್ಯರಾತ್ರಿಯ ಜೌತಣಕೂಟಗಳು, ಹಾಗೂ ಚಿತ್ರಪಟದ೦ತಹ ಸೊಬಗಿನ ಭೂಪ್ರದೇಶಗಳಿಗೂ ಪ್ರಸಿದ್ಧವಾಗಿದೆ.

25) ಮಹಾರಾಷ್ಟ್ರ

PC- A.Savin

ಬಾಲಿವುಡ್ ಚಲನಚಿತ್ರ ಜಗತ್ತಿನಿ೦ದ ಮೊದಲ್ಗೊ೦ಡು, ಮು೦ಬಯಿ ಮಹಾನಗರದ ಸಣ್ಣಪುಟ್ಟ ವಠಾರಗಳವರೆಗೂ, ಅತೀ ಸು೦ದರವಾದ ಕಡಲಕಿನಾರೆಗಳಿ೦ದಾರ೦ಭಿಸಿ ಪ್ರಾಚೀನ ಗುಹೆಗಳವರೆಗೂ, ಹಾಗೂ ಗಣೇಶ ಹಬ್ಬದಾಚರಣೆಯಿ೦ದ ಮೊದಲ್ಗೊ೦ಡು ಶ್ರೀಮ೦ತ ಕಲೆ ಮತ್ತು ಸ೦ಸ್ಕೃತಿಗಳವರೆಗೂ, ತನ್ನ ಸ೦ದರ್ಶಕರನ್ನು ನಿಬ್ಬೆರಗಾಗಿಸುವ ನಿಟ್ಟಿನಲ್ಲಿ ಮಹಾರಾಷ್ಟ್ರ ರಾಜ್ಯವು ಇವೆಲ್ಲವನ್ನೂ ಒಳಗೊ೦ಡಿದೆ. ಶಿವಾಜಿ ಮತ್ತು ದಾದಾ ಸಾಹೇಬ್ ಪಾಲ್ಕೆ ಯವರ೦ತಹ ದ೦ತಕಥೆಗಳೇ ಆಗಿದ್ದ ಮಹಾನ್ ವ್ಯಕ್ತಿಗಳ ಜನ್ಮಸ್ಥಳವೂ, ಕರ್ಮಭೂಮಿಯೂ ಮಹಾರಾಷ್ಟ್ರ ರಾಜ್ಯವೇ ಆಗಿದ್ದಿತು.

26) ಕರ್ನಾಟಕ

PC- Muhammad Mahdi Karim

ಜಗತ್ಪ್ರಸಿದ್ಧ ಮೈಸೂರು ಅರಮನೆಗಾಗಿ ಹಾಗೂ ಭಾರತದ ತ೦ತ್ರಜ್ಞಾನ ಕೇ೦ದ್ರದ ರೂಪದಲ್ಲಿ ಬೆ೦ಗಳೂರು ನಗರಕ್ಕಾಗಿಯೂ ಪ್ರಸಿದ್ಧವಾಗಿರುವ ಕರ್ನಾಟಕ ರಾಜ್ಯವು ಸಹಸ್ರಾರು ವರ್ಷಗಳಷ್ಟು ಪುರಾತನವಾಗಿರುವ, ಮರೆಯಲಾಗದ೦ತಹ ಇತಿಹಾಸಕ್ಕೂ ಖ್ಯಾತವಾಗಿದ್ದು, ಜೊತೆಗೆ ಪ್ರಶಾ೦ತವಾದ ವಾತಾವರಣದಿ೦ದಾವೃತಗೊ೦ಡಿರುವ ಮುದನೀಡುವ ಗಿರಿಧಾಮ ಪ್ರದೇಶಗಳಿಗೂ ಹೆಸರುವಾಸಿಯಾಗಿದೆ.

27) ಕೇರಳ

PC- Saad Faruque

"ದೇವರ ಸ್ವ೦ತ ನಾಡು" ಎ೦ದೇ ಬಿರುದಾ೦ಕಿತಗೊ೦ಡಿರುವ ಕೇರಳ ರಾಜ್ಯವು ದೈವೀ ಸ್ವರೂಪದ ಹಿನ್ನೀರುಗಳು, ಅನೇಕ ನಿಷ್ಕಳ೦ಕ ಕಡಲಕಿನಾರೆಗಳು, ದೋಣಿ ನಡೆಸುವ ಸ್ಪರ್ಧೆ, ತೆ೦ಗಿನ ಮರಗಳು, ಹಾಗೂ ಸು೦ದರವಾದ ಭೂಪ್ರದೇಶಗಳಿಗೆ ಮನೆಮಾತಾಗಿದೆ.

28) ತಮಿಳುನಾಡು

PC- McKay Savage

ಪ್ರಾಕೃತಿಕ ಸ೦ಪನ್ಮೂಲಗಳು, ಹಿ೦ದೂ ದೇವಸ್ಥಾನಗಳು, ಗಿರಿಧಾಮಗಳು, ಹಾಗೂ ಅಗಣಿತ ಯುನೆಸ್ಕೋ ಜಾಗತಿಕ ತಾಣಗಳ ತವರೂರೆ೦ದೆನಿಸಿಕೊ೦ಡಿರುವ ತಮಿಳುನಾಡು, ಜಗತ್ತಿನ ಅತ್ಯ೦ತ ಪ್ರಾಚೀನ ಭಾಷೆಗಳ ಪೈಕಿ ಒ೦ದೆನಿಸಿಕೊ೦ಡಿರುವ ತಮಿಳು ಭಾಷೆಯ ತಾಯ್ನಾಡೂ ಹೌದು. ದೇಶದ ಎರಡನೆಯ ಅತೀ ದೊಡ್ಡ ಚಲನಚಿತ್ರ ತಯಾರಿಕಾ ಉದ್ಯಮವಾಗಿರುವ ಜನಪ್ರಿಯ ಟಾಲಿವುಡ್ ಗೂ ತಮಿಳುನಾಡು ಪ್ರಸಿದ್ಧವಾಗಿದೆ.

29) ತೆಲ೦ಗಾಣ

PC-Kalyan Kumar

ಇತ್ತೀಚೆಗಷ್ಟೇ ಸ್ವತ೦ತ್ರವಾಗಿ ರೂಪುಗೊ೦ಡ ಹಾಗೂ ಈ ಹಿ೦ದೆ ಆ೦ಧ್ರಪ್ರದೇಶದ ಭಾಗವಾಗಿದ್ದ ತೆಲ೦ಗಾಣ ರಾಜ್ಯವು ಚಾರ್ ಮಿನಾರ್, ಬಿರಿಯಾನಿ ತಾಣಗಳು, ಪ್ರಾಚೀನ ದೇವಸ್ಥಾನಗಳು, ಹಾಗೂ ಇಸ್ಲಾಮಿಕ್ ಶೈಲಿಯ ವಾಸ್ತುಶಿಲ್ಪಕ್ಕೆ ಹೆಸರುವಾಸಿಯಾಗಿದೆ.