ನವರಾತ್ರಿಯ ಮೊದಲ ದಿನ ಶೈಲಪುತ್ರಿಯ ದರ್ಶನ ಮಾಡಿದ್ರೆ ವೈವಾಹಿಕ ಕಷ್ಟ ದೂರವಾಗುತ್ತಂತೆ!

ನವರಾತ್ರಿ

ಶೈಲಪುತ್ರಿಯ ಒಂದು ಪ್ರಾಚೀನ ದೇವಸ್ಥಾನವು ಇಡೀ ದೇಶದಲ್ಲೇ ಪ್ರಸಿದ್ಧವಾಗಿದೆ. ಇಲ್ಲಿಗೆ ದೂರ ದೂರದಿಂದ ಭಕ್ತರು ದೇವಿಯ ದರ್ಶನ ಪಡೆಯಲು ಆಗಮಿಸುತ್ತಾರೆ. ಇಲ್ಲಿಗೆ ಬಂದು ದೇವಿಯ ದರ್ಶನ ಮಾಡಿದ್ರೆ ಮನೋಕಾಮನೆ ಪೂರ್ಣಗೊಳ್ಳುತ್ತದೆ ಎನ್ನಲಾಗುತ್ತದೆ. ಈ ಮಂದಿರವು ವಾರಣಾಸಿಯಲ್ಲಿದೆ.

ಎಲ್ಲಿದೆ ಈ ದೇವಸ್ಥಾನ

ಶೈಲಪುತ್ರಿ ದೇವಸ್ಥಾನವು ಉತ್ತರ ಪ್ರದೇಶದ ವಾರಾಣಾಸಿ ಎ -40 / 11, ಮರ್ಹಿಯ ಘಾಟ್‌ನಲ್ಲಿದೆ. ಉತ್ತರ ಭಾರತದ ನವರಾತ್ರಿ ಸಂಪ್ರದಾಯಗಳನ್ನುಇಷ್ಟಪಡುವ ಪ್ರವಾಸಿಗರಿಗೆ ಭೇಟಿ ನೀಡಲು ಇದು ಒಂದು ಉತ್ತಮ ಸ್ಥಳವಾಗಿದೆ.

ಪರ್ವತದ ಮಗಳು

ಶೈಲಪುತ್ರಿಯ ರೂಪದಲ್ಲಿ ದುರ್ಗಾ ದೇವಿಯನ್ನು ಸತಿ, ಭವಾನಿ, ಪಾರ್ವತಿ ಅಥವಾ ಹೇಮಾವತಿ ಎಂದು ಕರೆಯಲಾಗುತ್ತದೆ. ಮಾ ಶೈಲಪುತ್ರಿಯನ್ನು ತಾಯಿಯ ಪ್ರಕೃತಿಯ ಸಂಪೂರ್ಣ ರೂಪವೆಂದು ಪರಿಗಣಿಸಲಾಗಿದೆ. ಶೈಲಪುತ್ರಿ ಎಂದರೆ 'ಪರ್ವತದ ಮಗಳು' ಎಂದರ್ಥ.

ಮನೋಕಾಮನೆ ಈಡೇರುತ್ತದೆ

ಕಾಶಿಯ ಅಲಯಿಪುರದಲ್ಲಿ ಶೈಲಪುತ್ರಿಯ ಪ್ರಾಚೀನ ಮಂದಿರವಿದೆ. ಇಲ್ಲಿಯ ವಿಶೇಷತೆ ಏನೆಂದರೆ ನವರಾತ್ರಿಯ ಮೊದಲ ದಿನ ಈ ದೇವಿಯ ದರ್ಶನ ಪಡೆದರೆ ಭಕ್ತರ ಮನೋಕಾಮನೆ ಈಡೇರುತ್ತದೆಯಂತೆ. ವೈವಾಹಿಕ ಸಮಸ್ಯೆ ದೂರವಾಗುತ್ತದೆ. ಹಾಗಾಗಿ ಈ ದೇವಿಯ ದರ್ಶನ ಪಡೆಯಲು ನವರಾತ್ರಿಯ ಹಿಂದಿನ ದಿನವೇ ಭಕ್ತರು ದೇವಸ್ಥಾನದಲ್ಲಿ ಲೈನ್‌ನಲ್ಲಿ ನಿಂತಿರುತ್ತಾರೆ.

ಕೈಲಾಸದಿಂದ ಕಾಶಿಗೆ ಬಂದ ತಾಯಿ

ಈ ದೇವಾಲಯದ ದೇವಿಯ ಬಗ್ಗೆ ಒಂದು ಪ್ರಾಚೀನ ಕಥೆಯೂ ಇದೆ. ಪಾರ್ವತಿ ದೇವಿಯು ಹಿಮಾಲಯದ ಶೈಲರಾಜನ ಪುತ್ರಿಯ ರೂಪದಲ್ಲಿ ಜನ್ಮ ಪಡೆದು ಶೈಲಪುತ್ರಿಯಾದಳು ಎನ್ನಲಾಗುತ್ತದೆ. ಯಾವುದೋ ವಿಷಯಕ್ಕೆ ಪಾರ್ವತಿಯು ಶಿವನಲ್ಲಿ ಕೋಪಗೊಂಡು ಕಾಶಿಗೆ ಬರುತ್ತಾಳೆ.

ವೈವಾಹಿಕ ಕಷ್ಟ ದೂರವಾಗುತ್ತದೆ

ಶಿವನು ಪಾರ್ವತಿಯ ಮನವೊಲಿಸಲು ಭೂ ಲೋಕಕ್ಕೆ ಬಂದಾಗ ಪಾರ್ವತಿಯು ಈ ಸ್ಥಳ ನನಗೆ ಬಹಳ ಇಷ್ಟವಾಗಿದೆ. ಇಲ್ಲಿಂದ ನಾನು ಬರೋದಿಲ್ಲ ಎಂದು ಹೇಳಿ ಅಲ್ಲಿಯೇ ನೆಲೆಸುತ್ತಾಳೆ. ನವರಾತ್ರಿಯ ಮೊದಲ ದಿನ ದಂಪತಿಗಳು ಈ ದೇವಿಯ ದರ್ಶನವನ್ನು ಮಾಡಿದ್ರೆ ಅವರ ವೈವಾಹಿಕ ಕಷ್ಟ ದೂರವಾಗುತ್ತದೆ.

ಮುತ್ತೈದೆ ಸಾಮಾನು ಅರ್ಪಣೆ

ಈ ಮಂದಿರದಲ್ಲಿ ದಿನಕ್ಕೆ ಮೂರು ಬಾರಿ ಪೂಜೆ ನಡೆಯುತ್ತದೆ. ಈ ದೇವಿಗೆ ಎಳನೀರಿನ ಜೊತೆಗೆ ಮುತ್ತೈದೆಯ ಸಾಮಾನುಗಳನ್ನು ಅರ್ಪಿಸಲಾಗುತ್ತದೆ. ಶೈಲಪುತ್ರಿಯ ವಾಹನ ವೃಷಭ. ಬಲಗೈಯಲ್ಲಿ ತ್ರಿಶೂಲ ಹಾಗೂ ಎಡಗೈಯಲ್ಲಿ ತಾವರೆ ಇರುತ್ತದೆ.

ಮೊದಲ ರೂಪವೇ ಶೈಲಪುತ್ರಿ

ದುರ್ಗೆಯ ಮೊದಲ ರೂಪವೇ ಶೈಲಪುತ್ರಿ. ನವದುರ್ಗೆಯರಲ್ಲಿ ಮೊದಲ ದುರ್ಗೆಯೇ ಈ ಶೈಲಪುತ್ರಿ. ತನ್ನ ಪೂರ್ವ ಜನ್ಮದಲ್ಲಿ ದಕ್ಷನ ಮಗಳಾಗಿದ್ದ ಈಕೆಯ ಹೆಸರು ಸತಿ. ಸತಿ ಶಿವನನ್ನು ವಿವಾಹವಾಗಿದ್ದಳು.