ನಮಗೆಲ್ಲಾ ತಿಳಿದಿರುವಂತೆ ಪ್ರಾಣಿ ಸಂಗ್ರಹಾಲಯಗಳಲ್ಲಿ ವನ್ಯ ಜೀವಿಗಳನ್ನು ಕಾಣಬಹುದು, ಅಲ್ಲದೆ ದೂರದಲ್ಲಿ ನಿಂತು ವೀಕ್ಷಿಸಿ ಆನಂದಿಸಬಹುದು. ಆದರೆ ಇಲ್ಲೊಂದು ವಿಶೇಷ ಪ್ರಾಣಿ ಸಂಗ್ರಹಾಲಯವಿದೆ, ಇಲ್ಲಿ ಪ್ರಾಣಿಗಳನ್ನು ಮುಟ್ಟಬಹುದು ಮತ್ತು ಅವುಗಳೊಂದಿಗೆ ಕಾಲ ಕಳೆಯಬಹುದು. ಈ ಪ್ರಾಣಿ ಉದ್ಯಾನವನವು ರಕ್ಷಿಸಲ್ಪಟ್ಟ ಪ್ರಾಣಿಗಳಿಗೆ ಅಭಯಾರಣ್ಯವಾಗಿದೆ.
ಈ ಸ್ಥಳವು ನಿಮಗೆ ಪ್ರಕೃತಿಯೊಂದಿಗೆ ಸಂಪರ್ಕ ಸಾಧಿಸಲು ಮತ್ತು ವಿವಿಧ ಪಕ್ಷಿಗಳು ಹಾಗೂ ಪ್ರಾಣಿಗಳೊಂದಿಗೆ ಅನ್ಯೋನ್ಯತೆಯನ್ನು ಅನುಭವಿಸಲು ಅವಕಾಶವನ್ನು ನೀಡುತ್ತದೆ. ಇಲ್ಲಿ ನೀವು ವಿಶೇಷವಾಗಿ ಪ್ರಾಣಿಗಳಿಗೆ ಆಹಾರ ನೀಡಬಹುದು ಮತ್ತು ಸ್ನಾನ ಮಾಡಿಸಬಹುದು. ಕುಟುಂಬದೊಂದಿಗೆ ವಾರಾಂತ್ಯದಲ್ಲಿ ಭೇಟಿ ನೀಡಲು ಸೂಕ್ತ ಸ್ಥಳವಿದಾಗಿದ್ದು, ಈ ಸ್ಥಳದ ಕುರಿತು ಸಂಪೂರ್ಣ ಮಾಹಿತಿಯನ್ನು ಇಲ್ಲಿ ತಿಳಿಯೋಣ.
ಪ್ರಾಣಿ : ದ ಪೆಟ್ ಸ್ಯಾಂಚುರಿ :
ಮೇಲೆ ತಿಳಿಸಿದಂತೆ ಪ್ರಾಣಿಗಳೊಂದಿಗೆ ಉತ್ತಮ ಸಮಯವನ್ನು ಕಳೆಯುವ ಅವಕಾಶವನ್ನು ಒದಗಿಸುವ ಪ್ರಾಣಿ ಸಂಗ್ರಹಾಲಯವೇ 'ಪ್ರಾಣಿ : ದ ಪೆಟ್ ಸ್ಯಾಂಚುರಿ'. ಪ್ರಾಣಿ - ಪೆಟ್ ಅಭಯಾರಣ್ಯವು ಒಂದು ರೀತಿಯ ಅನುಭವವನ್ನು ನೀಡುವ ಉದ್ಯಾನವಾಗಿದೆ. ಮನುಷ್ಯರು ಮತ್ತು ಪ್ರಾಣಿಗಳು ಸುರಕ್ಷಿತವಾಗಿ ಈ ಜಗತ್ತಿನಲ್ಲಿ ಸಹಬಾಳ್ವೆ ನಡೆಸಬಹುದು ಎಂಬುದನ್ನು ಈ ಸಂಗ್ರಹಾಲಯವು ಎತ್ತಿ ಹಿಡಿಯುತ್ತದೆ.
ಇಂದಿನ ಅನೇಕ ಮಕ್ಕಳು ಕುದುರೆಯನ್ನು ನೋಡಿಲ್ಲ / ಮುದ್ದಿಸಿಲ್ಲ ಅಥವಾ ಕುರಿ ಮತ್ತು ಮೇಕೆ ನಡುವಿನ ವ್ಯತ್ಯಾಸವನ್ನು ಹೇಳಲು ಸಾಧ್ಯವಿಲ್ಲ. ಹಾಗಾಗಿ ಮಕ್ಕಳಿಗೆ ಪ್ರಾಣಿಗಳ ಜಗತ್ತಿನ ಪರಿಚಯ ನೀಡುವ ನಿಟ್ಟಿನಲ್ಲಿ ಈ ಸ್ಥಳವನ್ನು ನಿರ್ಮಿಸಲಾಗಿದೆ ಎಂದು ಅಧಿಕೃತವಾಗಿ ಹೇಳಲಾಗಿದೆ.
ಇಲ್ಲಿ 1.5 ಗಂಟೆಗಳ ಕಾಲ ಶೈಕ್ಷಣಿಕ ಪ್ರವಾಸವನ್ನು ಪಡೆಯಬಹುದು. ಇಲ್ಲಿ ನೀವು 40ಕ್ಕೂ ಅಧಿಕ ಜಾತಿಗಳಲ್ಲಿ ಮತ್ತು 700ಕ್ಕೂ ಅಧಿಕ ಸಂರಕ್ಷಿಸಿದ ಪಕ್ಷಿಗಳು ಮತ್ತು ಪ್ರಾಣಿಗಳೊಂದಿಗೆ ಸಂವಹನ ನಡೆಸಬಹುದು.
ಎಲ್ಲಿದೆ ? :
ಸೋಮನಹಳ್ಳಿ ಗ್ರಾಮ, ಕನಕಪುರ ರಸ್ತೆ ಸುಂಕದಕಟ್ಟೆ, ಬೆಂಗಳೂರು
ಭೇಟಿಯ ವಿವರಗಳು :
ಬುಕಿಂಗ್: ಸೋಮವಾರದಿಂದ ಶುಕ್ರವಾರದವರೆಗೆ ಆನ್ಲೈನ್ ಮೂಲಕ ಬುಕಿಂಗ್ ಮಾಡಿಕೊಳ್ಳಬಹುದು.
ಸಮಯ: 9:30 ರಿಂದ ಸಂಜೆ 5 ರವರೆಗೆ
ಪ್ರವೇಶ ಶುಲ್ಕ: ಪ್ರತಿ ವ್ಯಕ್ತಿಗೆ 400/-ರೂ
'ಪ್ರಾಣಿ'ಯನ್ನು ತಲುಪುವುದು ಹೇಗೆ ? :
ಮಾರ್ಗ : ಬನಶಂಕರಿಯಿಂದ ಸುಮಾರು 25 ಕಿ.ಮೀ. ಗೂಗಲ್ ನಕ್ಷೆಗಳನ್ನು ಅನುಸರಿಸಿ ನೀವು ಈ ಜಾಗಕ್ಕೆ ತಲುಪಬೇಕು. ಕನಕಪುರ ರಸ್ತೆಯಲ್ಲಿ ಆರ್ಟ್ ಆಫ್ ಲಿವಿಂಗ್ ಅನ್ನು ದಾಟಿ ಸುಮಾರು 5 ಕಿಮೀ ನಂತರ ಎಡಕ್ಕೆ ತಿರುಗಬೇಕು. ತದನಂತರ ಸೋಮನಹಳ್ಳಿ ಎಂಬ ಗ್ರಾಮದಲ್ಲಿ ಈ ಜಾಗವಿದೆ.
ಇತರೆ ಆಯ್ಕೆಗಳು: ಕನಕಪುರ ರಸ್ತೆಯಲ್ಲಿ ಸಾಕಷ್ಟು ಬಸ್ಗಳು ಲಭ್ಯವಿವೆ, ಕೊನೆಯ 4-5 ಕಿಮೀಗಳಲ್ಲಿ ನೀವು ಸ್ಥಳೀಯ ಆಟೋವನ್ನು ಪಡೆಯಲು ಪ್ರಯತ್ನಿಸಬಹುದು. ಕೆಲವು ಬಸ್ಸುಗಳು ಇನ್ನೂ ಹತ್ತಿರ ಹೋಗುತ್ತವೆ, ಆದರೆ ನಿಗಧಿತ ಸಮಯದ ಬಸ್ ವ್ಯವಸ್ಥೆಯ ಬಗ್ಗೆ ಮಾಹಿತಿ ನೀಡಲು ಸಾಧ್ಯವಿಲ್ಲ. ಈ ಜಾಗಕ್ಕೆ ತಲುಪಲು ಚಾಲನೆ ಮಾಡುವುದು ಅಥವಾ ಟ್ಯಾಕ್ಸಿ ತೆಗೆದುಕೊಳ್ಳುವುದು ಉತ್ತಮ.