ಬೆರಗು ಗೊಳಿಸುವ ಬೆಲ್ಲಂ ಗುಹೆ

ವಿಷ್ಮಯ ಗುಹೆ

ಭೂಮಿಯ ಆಳದಲ್ಲಿರುವ ಈ ಗುಹೆಗೆ ಪ್ರವೇಶಿಸುತ್ತಿದ್ದಂತೆ ಏನೋ ಒಂದು ರೀತಿಯ ಭಯ ಕಾಡಲಾರಂಭಿಸಿತು. ಆಕ್ಷಣಕ್ಕೆ ಚಿಕ್ಕವಳಿದ್ದಾಗ ಕೇಳಿದ ಗುಹೆಯ ಭಯಾನಕ ಕಥೆಗಳ ದೃಶ್ಯ ಒಮ್ಮೆ ಕಣ್ಣಿಗೆ ಕಟ್ಟಿದಂತಾಯಿತು. ಮರುಕ್ಷಣವೇ ಕಲ್ಪನೆಯಿಂದ ವಾಸ್ತವಕ್ಕೆ ಬಂದೆ. ವಾಸ್ತವದ ಈ ಗುಹೆಯಲ್ಲಿ ಅಂತರ್ಜಲದ ಹರಿವು ಹಾಗೂ ಉದ್ದನೆಯ ದಾರಿ ಇರುವುದು ಕಂಡಿತು.

ಗುಹೆಗೆ ಹೆಸರು

ಈ ಗುಹೆ ಪಾತಾಳಗಂಗೆಯ ಪ್ರವೇಶ ದ್ವಾರದಿಂದ ಸುಮಾರು 150 ಅಡಿ ಆಳದಲ್ಲಿದೆ. ಇದಕ್ಕೆ ಸಂಸ್ಕೃತದಲ್ಲಿ ಬಿಲಂ ಎಂದು ಕರೆಯುತ್ತಾರೆ. ಅಂದರೆ ಗುಹೆಗೌಳ ಎಂದರ್ಥ.

ಉದ್ದ ಅಳತೆ

3229 ಮೀ. ಉದ್ದ ಇರುವ ಇದು, ಭಾರತದ ಉದ್ದವಾದ ಗುಹೆಗಳಲ್ಲಿ ಎರಡನೇ ಸ್ಥಾನ ಪಡೆದಿದೆ. ಈ ಗುಹೆಯನ್ನು ಬ್ರಿಟೀಷ್ ಗೇಣಿದಾರ ರಾಬರ್ಟ್ ಬ್ರೂಸ್ ಫೊಟೆ ಎಂಬುವವರು ಕಂಡುಹಿಡಿದರು ಎನ್ನಲಾಗುತ್ತದೆ.

ಗುಹೆಯ ವಿಶಿಷ್ಟತೆ

3.5 ಕಿ.ಮೀ. ಇರುವ ಈ ಗುಹೆ ಒಳಗೆ ಕೇವಲ 1.5 ಕಿ.ಮೀ. ದೂರದ ವರೆಗೆ ಮಾತ್ರ ಪ್ರವೇಶ ಕಲ್ಪಿಸಲಾಗಿದೆ. ಇದಕ್ಕೆ 16 ಬಾಗಿಲುಗಳಿವೆ.

ಗುಹೆಗೆ ಅಲಂಕಾರ

ಗುಹೆಯ ಪ್ರವೇಶದ್ವಾರ ಬೆಣಚು ಕಲ್ಲುಗಳಿಂದ ಕೂಡಿದೆ. ಹಾಗೇ ಮುಂದೆ ಸಾಗಿದರೆ ಕಪ್ಪು ಸುಣ್ಣದ ಕಲ್ಲುಗಳಿಂದ ಮಾರ್ಪಟ್ಟಿರುವುದನ್ನು ಗಮನಿಸಬಹುದು. ಅಲ್ಲದೇ ಹೆಚ್ಚು ಆಕರ್ಷಕವಾಗಿ ಕಾಣಲು ಹಾಗೂ ಗುಹೆಯಲ್ಲಿ ಬೆಳಕನ್ನು ಕಲ್ಪಿಸುವ ಉದ್ದೇಶದಿಂದ ವಿದ್ಯುತ್ ದೀಪಗಳನ್ನು ಅಳವಡಿಸಲಾಗಿದೆ. ಈ ದೀಪವು ಬೀರುವ ಸೊಬಗು ಗುಹೆಯ ಸೌಂದರ್ಯವನ್ನು ಹೆಚ್ಚಿಸುತ್ತದೆ.

ಗುಹೆಯ ಒಳಗೆ

ನೈಸರ್ಗಿಕವಾಗಿ ಮಾರ್ಪಟ್ಟ ಈ ಗುಹೆಯ ಒಳಗೆ ಮರದ ತುಂಡಿನಿಂದ ಹೊಡೆದರೆ ಸಂಗೀತದ ಏಳು ಸ್ವರಗಳು ಕೇಳುತ್ತವೆ. ಅಲ್ಲಲ್ಲಿ ವಿಭಿನ್ನ ಬಗೆಯ ಆಕಾರವನ್ನು ಹೊಂದಿರುವ ಗೋಡೆಯನ್ನು ಕಾಣಬಹುದು. ಒಂದೆಡೆ ಶಿವಲಿಂಗದಂತಹ ಆಕಾರ, ಇನ್ನೊಂದೆಡೆ ಸಿಂಹದ ತಲೆಯಂತಹ ಆಕೃತಿ, ಹಾವಿನ ಹೆಡೆಯಂತಿರುವ ಆಕೃತಿಗಳೆಲ್ಲವೂ ಇವೆ.

ಇತಿಹಾಸ

ಪ್ರವೇಶ ದ್ವಾರದ ಬಳಿ ಹಾಸಿಗೆ ಹಾಗೂ ದಿಂಬಿನ ಆಕಾರವಿದೆ. ಸ್ಥಳೀಯರ ಪ್ರಕಾರ ಇದೇ ಧ್ಯಾನ ಮಂದಿರದಲ್ಲಿ ಹಲವಾರು ಸಾಧುಗಳು ವಾಸವಾಗಿದ್ದರು. ಅದಕ್ಕೆ ಸಾಕ್ಷಿಯಾಗಿ ಅನೇಕ ಬೌದ್ಧ ಸ್ತೂಪಗಳೂ ಇಲ್ಲಿ ದೊರೆತಿವೆ ಎನ್ನುತ್ತಾರೆ.

ಪ್ರವೇಶ ದ್ವಾರ

ಹೊರಗಿನಿಂದ ಒಂದು ಬಾವಿಯಂತೆ ಕಾಣುವ ಈ ಗುಹೆಯ ಒಳಕ್ಕೆ ಹೋದರೆ ಎರಡು ಬಾವಿಯಂತಿರುವುದು ಕಾಣುತ್ತದೆ. ಗುಹೆಯ ದ್ವಾರದಲ್ಲಿ ಸ್ವಯಂ ಚಾಲಿತ ಗೇಟ್‍ಗಳನ್ನು ಅಳವಡಿಸಲಾಗಿದೆ. ಇಲ್ಲಿ ಪ್ರವೇಶ ಶುಲ್ಕವೆಂದು 50 ರೂ. ಪಡೆಯುತ್ತಾರೆ.