Click it and Unblock the Notifications
ಪೊಲ್ಲಾಚಿ ನಗರ ತಮಿಳುನಾಡಿನ ಕೊಯಮತ್ತೂರ್ ಜಿಲ್ಲೆಯಲ್ಲಿದೆ. ಕೊಯಮತ್ತೂರ್ ನ ದಕ್ಷಿಣ ಭಾಗದಲ್ಲಿರುವ ಪೊಲ್ಲಾಚಿ, ಜಿಲ್ಲೆಯ ಎರಡನೇ ಅತಿದೊಡ್ಡ ನಗರ. ಪಶ್ಚಿಮ ಘಟ್ಟದ ಸಮೀಪದಲ್ಲಿರುವ ಪೊಲ್ಲಾಚಿ ಕೇವಲ ಹಿತಕರ ವಾತಾವರಣ ಕೊಡುವುದು ಮಾತ್ರವಲ್ಲ, ಮನಮೋಹಕ ಸೌಂದರ್ಯದ ಖಣಿಯೂ ಹೌದು. ಸಿನಿಮಾ ಮಂದಿಗೂ ಪೊಲ್ಲಾಚಿ ಪ್ರಿಯವಾದ ಸ್ಥಳವಾಗಿದ್ದು ಸುಮಾರು 1500 ಕ್ಕೂ ಹೆಚ್ಚು ಸಿನಿಮಾ ಚಿತ್ರೀಕರಣ ಹಿಂದಿನ ಕೆಲವು ವರ್ಷಗಳಲ್ಲಿ ಇಲ್ಲಿ ನಡೆದಿದೆ.
ಪೊಲ್ಲಾಚಿಯ ಸುತ್ತಮುತ್ತಲಿನ ಪ್ರವಾಸಿ ತಾಣಗಳು:
ಸುಬ್ರಹ್ಮಣ್ಯಾರ್ ದೇವಸ್ಥಾನ ಪೊಲ್ಲಾಚಿಯಲ್ಲಿ ಪ್ರಸಿದ್ದವಾದ ಪ್ರವಾಸಿ ತಾಣ. ಪೊಲ್ಲಾಚಿಯ ಬೆಲ್ಲದ ಮಾರುಕಟ್ಟೆಯು ಏಷ್ಯಾದಲ್ಲಿಯೇ ದೊಡ್ಡದು ಮತ್ತು ತರಕಾರಿ ಮಾರುಕಟ್ಟೆಯೂ ಕೂಡ ದೊಡ್ಡದಾಗಿದ್ದು, ಕೇರಳದ ಮಧ್ಯ ಭಾಗದಲ್ಲಿಯೇ ಅತಿ ಹೆಚ್ಚಿನ ಮಟ್ಟಿಗೆ ತರಕಾರಿಗಳನ್ನು ಸರಬರಾಜು ಮಾಡುವ ಹೆಗ್ಗಳಿಕೆ ಪಡೆದಿದೆ. ದನಕರು ಮತ್ತು ಕಬ್ಬಿಣದ ಮಾರುಕಟ್ಟೆಯಲ್ಲೂ ದಕ್ಷಿಣ ಭಾರತದಲ್ಲಿಯೇ ಇದು ದೊಡ್ಡದು. ಜೊತೆಗೆ ಇಲ್ಲಿ ಹಲವಾರು ಆಣೆಕಟ್ಟುಗಳಿದ್ದು, ಬಹಳ ಪ್ರವಾಸಿಗರನ್ನು ಸೆಳೆಯುತ್ತದೆ.
ಪ್ರಸಿದ್ದವಾದ ಕೆಲವು ಡ್ಯಾಂಗಳೆಂದರೆ ನಿರಾರ್ ಡ್ಯಾಂ, ಅಳಿಯರ್ ಡ್ಯಾಂ, ಮೀಂಕಾರಾ ಡ್ಯಾಂ, ಶೋಲಯರ್ ಡ್ಯಾಂ ಮತ್ತು ಪೆರುವರಿ ಪಳ್ಳಂ ಡ್ಯಾಂ. ಇನ್ನು ದೇವಸ್ಥಾನಗಳೆಂದರೆ ರಾಮಲಿಂಗ ಸೌದೇಶ್ವರಿ ಅಮ್ಮನ ದೇವಸ್ಥಾನ, ಸುಬ್ರಹ್ಮಣ್ಯ ಸ್ವಾಮಿ ದೇವಸ್ಥಾನ, ಮಾಸನಿ ಅಮ್ಮನ ತಿರುಕೊಯಲ್, ಅಲಗುನಾಚಿ ಅಮ್ಮನ್ ದೇವಸ್ಥಾನ, ತಿರುಮೂರ್ತಿ ದೇವಸ್ಥಾನ, ಸುಲಕ್ಕಲ್ ಮಾರಿಯಮ್ಮನ್ ತಿರುಕೊಯ್ಲ್, ಶ್ರೀ ವೇಲಾಯುಧ ಸ್ವಾಮಿ ತಿರುಕೊಯ್ಲ್, ಎಚಾನರಿ ವಿನಯಾಗರ್ ತಿರುಕೊಯಿಲ್, ಅಂಬಾರಪಾಳ್ಯಮ್ ದರ್ಗಾ ಮತ್ತು ಅರುಳ್ಮಿಗು ಪ್ರಸಂದ ವಿನಯಾಗರ್ ದೇವಸ್ಥಾನಗಳು ಪ್ರಸಿದ್ದವಾದವು.
ಅಳಿಯರ್ ಸಿದ್ದಾಶ್ರಮ, ಅಣ್ಣಾಮಲೈ ಅಭಯಾರಣ್ಯ, ಟಾಪ್ ಸ್ಲಿಪ್, ವಾಲ್ಪಾರೈ, ಮಾಸನಿಯಮ್ಮನ್ ದೇವಸ್ಥಾನ, ಅಮರಾವತಿ ಡ್ಯಾಂ ಮತ್ತು ಮೊಸಳೆ ಪಾರ್ಕ್ಗಳೂ ಕೂಡ ಪ್ರವಾಸಿಗರನ್ನು ಸೆಳೆಯುತ್ತವೆ.
ಇತಿಹಾಸದ ಪುಟಗಳು:
ಪೊಲ್ಲಾಚಿಯ ಹಳೆಯ ಹೆಸರು ಪೊರುಲ್ ಆಚಿ ಎಂದಾಗಿತ್ತು. ಇದರರ್ಥ ನೈಸರ್ಗಿಕ ಸಂಪತ್ತು ಮತ್ತು ಉನ್ನತಿಯ ಆಗರ ಎಂಬುದು. ಮೂರನೇ ಕೊಳೋತ್ತುಂಗ ಚೋಳನ ಕಾಲದಲ್ಲಿ ಈ ಪಟ್ಟಣಕ್ಕೆ ಮುದಿ ಕೊಂಡ ಚೋಳ ನಲ್ಲೂರ್ ಎಂಬ ಹೆಸರೂ ಇತ್ತು. ಇಲ್ಲಿರುವ ಸುಬ್ರಮಣ್ಯಾರ್ ದೇವಾಲಯವು ಸುಮಾರು 8 ಶತಮಾನಗಳಷ್ಟು ಹಳೆಯದು. ಐತಿಹಾಸಿಕವಾಗಿ ಈ ಹಿಂದೆ ಈ ದೇವಸ್ಥಾನವು ಶಿವನ ದೇವಸ್ಥಾನವಾಗಿದ್ದಿರಬೇಕು ಎಂದು ಹೇಳಲಾಗುತ್ತದೆ. ಇತಿಹಾಸದಲ್ಲಿ ಪ್ರಸಿದ್ದಿ ಪಡೆದುಕೊಂಡ ಪೊಲ್ಲಾಚಿ ಮಾರುಕಟ್ಟೆಗೆ ಪೊಲ್ಲಾಚಿ ಸಂದೈ ಎಂಬ ಹೆಸರೂ ಇತ್ತು.
