Click it and Unblock the Notifications
ಚೌಲ್ ಹಿಂದಿನ ದಿನಗಳಲ್ಲಿ ಪೋರ್ಚುಗೀಸ್ ಭಾರತದ ಒಂದು ನಗರವಾಗಿತ್ತು. ಈಗ ಇದು ಪ್ರಮುಖವಾಗಿ ಅವಶೇಷಗಳು ಮತ್ತು ಸ್ಮಾರಕಗಳಿಂದ ತುಂಬಿದೆ. ಚೌಲ್ ಮಹಾರಾಷ್ಟ್ರದ ರಾಯಗಡ್ ಜಿಲ್ಲೆಯ ದಕ್ಷಿಣಕ್ಕೆ ಇದ್ದು, ಮುಂಬೈನಿಂದ 60 ಕಿ.ಮೀ ದೂರದಲ್ಲಿದೆ.
ಭಾರತದಲ್ಲಿ ಪೋರ್ಚುಗೀಸರು ಸುಮಾರು 500 ವರ್ಷಗಳ ಹಿಂದೆ 1521 ರಲ್ಲಿ ಚೌಲ್ ನಲ್ಲಿ ಪ್ರಥಮಬಾರಿಗೆ ತಮ್ಮ ನೆಲೆಯನ್ನು ಸ್ಥಾಪಿಸಿದರು ಎಂದು ಇತಿಹಾಸವು ನಮಗೆ ತಿಳಿಸುತ್ತದೆ. ನಂತರ ಈ ನಗರವನ್ನು ಅಹಮದ್ ನಗರದ ಸುಲ್ತಾನನಾದ ನಿಜಾಮ್ ಶಾಹಿಯು 1570 ರಲ್ಲಿ ನಾಶಗೊಳಿಸಿದನು. ಮುಂದೆ 1613 ರಲ್ಲಿ ಚೌಲ್ ನಗರವು ಪುನರ್ ನಿರ್ಮಾಣಗೊಂಡಿತು.
ಭೇಟಿ ನೀಡಬೇಕಾದ ಸ್ಥಳಗಳು
ಅಲಿಬಾಗ್ ಬಳಿಯಿರುವ ಈ ಯಾತ್ರಾ ಸ್ಥಳವು ಹಲವಾರು ರಾಜವಂಶಗಳ ಏಳಿಗೆಗೆ ಮತ್ತು ಪತನಕ್ಕೆ ಸಾಕ್ಷಿಯಾಗಿ ನಿಂತಿದೆ. ಈ ಊರಿನಲ್ಲಿ ಪೋರ್ಚುಗೀಸರ ಸ್ಮಾರಕಗಳು, ಹಳೆಯ ಚರ್ಚುಗಳು ಮತ್ತು ಸಿನಗಾಗ್ (ಯಹೂದ್ಯರ ಆರಾಧನಾ ಸ್ಥಳಗಳು) ಗಳು ತುಂಬಿ ತುಳುಕುತ್ತಿವೆ.
ಕೊರ್ಲೈ ಕೋಟೆಯ ಬಳಿಯಿರುವ ಚೌಲ ಕಡು ದೀಪದ ಗೋಪುರ (ಲೈಟ್ ಹೌಸ್) ನೋಡಲು ಅತ್ಯಂತ ಸುಂದರವಾದ ಸ್ಥಳವಾಗಿದೆ. ಕೊರ್ಲೈ ಕೋಟೆ ಮತ್ತು ಚೌಲ್ ಕೋಟೆಗಳೆರಡು ಒಟ್ಟಿಗೆ ನಿಮ್ಮನ್ನು ಗತಕಾಲಕ್ಕೆ ಕೊಂಡೊಯ್ಯುತ್ತವೆ.
ಪರಿಸರ ಪ್ರೇಮಿಗಳು ತಪ್ಪದೆ ಇಲ್ಲಿನ ರೆವ್ಡಂಡ ಬೀಚ್ ಗೆ ಭೇಟಿ ಕೊಡಬೇಕು. ನೀವು ಇಲ್ಲಿನ ನಯನ ಮನೋಹರವಾದ ದೃಶ್ಯ ವೈಭವವನ್ನು ಸವಿಯುತ್ತ, ದೂರ ದಿಗಂತವನ್ನು ವೀಕ್ಷಿಸುತ್ತ, ನಿಮ್ಮದೆ ಆದ ಆಲೋಚನೆಗಳ ನಡುವೆ ಏಕಾಂತದಲ್ಲಿ ಲೀನವಾಗಬಹುದು.
ಇಲ್ಲಿನ ದತ್ತ ಮಂದಿರವು ಕೇವಲ ಧಾರ್ಮಿಕ ಪ್ರಾಮುಖ್ಯತೆಯನ್ನಷ್ಟೆ ಅಲ್ಲದೆ ಐತಿಹಾಸಿಕ ಮಹತ್ವವನ್ನು ಪಡೆದಿದೆ. ಈ ಸ್ಥಳದ ಮೇಲ್ಭಾಗದಿಂದ ಸುತ್ತ ಮುತ್ತಲ ಪ್ರದೇಶವನ್ನು ವೀಕ್ಷಿಸಿದರೆ ನೀವು ಖಂಡಿತ ಮಂತ್ರ ಮುಗ್ಧರಾಗುತ್ತೀರಿ.
ಕೆಲವು ವಾಸ್ತವಾಂಶಗಳು
ಚೌಲ್ ನಲ್ಲಿ ವರ್ಷಾಪೂರ್ತಿ ಅತ್ಯಂತ ಆರಾಮದಾಯಕವಾದ ಹವಾಗುಣವಿರುತ್ತದೆ. ಇಲ್ಲಿನ ಹವಾಗುಣ ಯಾವುದೇ ಕಾಲದಲ್ಲೂ ಅಹಿತವನ್ನುಂಟು ಮಾಡುವುದಿಲ್ಲ. ಈ ಊರು ತನ್ನ ಬೆಚ್ಚನೆಯ ವಾತಾವರಣದಿಂದಾಗಿ ಪ್ರವಾಸಿಗರನ್ನು ಕೈ ಬೀಸಿ ಕರೆಯುತ್ತದೆ. ಚಳಿಗಾಲವು ಈ ಐತಿಹಾಸಿಕ ನಗರವನ್ನು ಸುತ್ತಿ ನೋಡಲು ತಕ್ಕ ಸಮಯವಾಗಿದೆ.
ಚೌಲ್ ನಗರವು ಎಲ್ಲ ಪ್ರಮುಖ ನಗರಗಳೊಂದಿಗೆ ಉತ್ತಮ ರಸ್ತೆ, ರೈಲು ಮತ್ತು ವಿಮಾನಯಾನ ಸಂಪರ್ಕವನ್ನು ಹೊಂದಿದೆ. ಈ ಪುಟ್ಟ ಚಿತ್ತಾಕರ್ಷಕವಾದ ನಗರವು ನೀವು ಸುತ್ತಾಡಲೆಂದು ನಿಮಗಾಗಿ ಕಾದು ಕುಳಿತಿದೆ. ಹೊರಡಿ ಚೌಲ್ ನಿಮಗಾಗಿ ಇತಿಹಾಸದಲ್ಲಿ ಲೀನವಾಗುವ ಅವಕಾಶವನ್ನು ಒದಗಿಸುತ್ತದೆ.
