Click it and Unblock the Notifications
ಕೇರಳದ ಚಿತ್ರಸದೃಶ ಪ್ರಾಕೃತಿಕ ಸೌಂದರ್ಯಕ್ಕೆ ಕಳಶವಿಟ್ಟಂತೆ ಇರುವ ಪ್ರದೇಶ ಮಲಂಪುಳಾ. ಆಣೆಕಟ್ಟು, ಉದ್ಯಾನ ಹಾಗೂ ಗಗನಚುಂಬೀ ಪರ್ವತಗಳು ಇಲ್ಲಿನ ವಿಶೇಷತೆ. ಕೇರಳದ ಅನ್ನದ ಬಟ್ಟಲು ಎಂದೇ ಹೆಸರಾಗಿರುವ ಪಾಲಕ್ಕಾಡ್ ಜಿಲ್ಲೆಯಲ್ಲಿ ಈ ಪ್ರದೇಶವಿದ್ದು, ನಿಸರ್ಗಪ್ರೇಮಿಗಳು, ವಿಹಾರ ಪ್ರಿಯರನ್ನು ಕೈಬಿಸಿ ಕರೆಯುತ್ತದೆ.
ಇಲ್ಲಿರುವ ಆಣೆಕಟ್ಟಿನ ಮೂಲಕವೇ ಕೇರಳ ರಾಜ್ಯಕ್ಕೆ ನೀರು ಸರಬರಾಜಾಗುತ್ತದೆ. ಕೇರಳಕ್ಕೆ ಅಗತ್ಯವಿರುವ ವಿದ್ಯುತ್ ನ ಬಹತೇಕ ಪ್ರಮಾಣದ ವಿದ್ಯುತ್ ಇಲ್ಲಿಯೇ ಉತ್ಪಾದನೆಯಾಗುತ್ತಿದೆ. ವ್ಯಾಪಕ ರಾಜಕಾಲುವೆಗಳು ಇಲ್ಲಿದ್ದು, ಕೇರಳದ ಅತಿದೊಡ್ಡ ನೀರಾವರಿ ಆಣೆಕಟ್ಟು ಎಂದೇ ಈ ಪ್ರದೇಶ ಹೆಸರಾಗಿದೆ.
ಮಲಂಪುಳಾ, ಪಾಲಕ್ಕಾಡ್ ಪಟ್ಟಣದಿಂದ 10 ಕಿಮೀ ಅಂತರದಲ್ಲಿದೆ. ಇಲ್ಲಿ ಪ್ರವಾಸಿಗರನ್ನು ಸೆಳೆಯುವ ಸಾಕಷ್ಟು ಸಂಗತಿಗಳಿವೆ. ಮನುಷ್ಯ ಕೌಶಲ್ಯ ಮತ್ತು ಪ್ರಕೃತಿಯ ನೈಜತೆ ಬೆರೆತಿರುವ ಅಪರೂಪವಾದ ಪ್ರದೇಶ ಇದಾಗಿದ್ದು, ಪ್ರವಾಸಪ್ರಿಯರ ಮನಸಿಗೆ ಮುದ ನೀಡುತ್ತದೆ.
ಮಲಂಪುಳಾ ನದಿಗೆ ಅಡ್ಡಲಾಗಿ ನಿರ್ಮಿಸಿರುವ ಆಣೆಕಟ್ಟು ಮತ್ತು ಅದರ ಹಿನ್ನೀರು ಇಲ್ಲಿನ ಪ್ರಮುಖ ಆಕರ್ಷಣೆಯಾಗಿದೆ. ಜಲಾಶಯದಿಂದ ಕೇವಲ 2 ಕಿಲೋಮೀಟರ್ ಅಂತದಲ್ಲಿರುವ ಫ್ಯಾಂಟಸಿಪಾರ್ಕ್ ಮೋಜು ಮಸ್ತಿಯ ಜತೆ ಉತ್ತಮ ಮನರಂಜನೆ ನೀಡುವ ಸ್ಥಳವಾಗಿ ಪ್ರವಾಸಿಗರನ್ನು ಸೆಳೆಯುತ್ತದೆ. ಈ ಪ್ರದೇಶದ ಇತರೆ ಆಕರ್ಷಣೆಗಳೆಂದರೆ, ಥ್ರೆಡ್ ಗಾರ್ಡನ್, ಸ್ನೇಕ್ ಪಾರ್ಕ್, ಯಕ್ಷಿ ಪ್ರತಿಮೆ, ಬಂಡೆ ಉದ್ಯಾನ, ಫ್ಯಾಂಟಸಿ ಪಾರ್ಕ್, ಉಡನ್ ಖಟೋಲಾ ಮತ್ತು ಥೆಂಕುರುಸ್ಸಿ. ಮಲಂಪುಳಾ ಮತ್ತು ಪರಾಂಬಿಕುಲಂ ಅಭಯಾರಣ್ಯ ಪರಿಸರ ಮತ್ತು ವನ್ಯಜೀವಿ ಪ್ರಿಯರಿಗೆ ಖುಷಿ ಕೊಡುತ್ತದೆ. ಇಲ್ಲಿನ ಮೌನ ಕಣಿವೆ ರಾಷ್ಟ್ರೀಯ ಉದ್ಯಾನ, ನೆಲ್ಲಿಯಂಪತ್ತಿ ಕರಡಿ ಪಾರ್ಕ್, ಪೋಥುಂಡಿ ಜಲಾಶಯ ಮತ್ತು ಧೋನಿ ಅರಣ್ಯ ಮೀಸಲು ಕ್ಷೇತ್ರಗಳು ಇನ್ನಷ್ಟು ವೈವಿಧ್ಯಮಯ ಪ್ರವಾಸೀ ಸಾಧ್ಯತೆಗಳನ್ನು ನಿಮಗೆ ಉಣಬಡಿಸುತ್ತವೆ.
ಮಲಂಪುಳಾಗೆ ಭೇಟಿ ನೀಡಿದಾಗ...
ಬೇಸಿಗೆಯಲ್ಲಿ ಅತ್ಯಂತ ಬಿಸಿಯಾದ ವಾತಾವರಣ ಹೊಂದಿರುವ ಮಲಂಪುಳಾಕ್ಕೆ ಚಳಿಗಾಲದಲ್ಲಿಯೇ ಹೋಗುವುದು ಒಳಿತು. ಇಲ್ಲಿನ ಚಳಿಗಾಲ ಮನಸ್ಸಿಗೆ ಆಹ್ಲಾದವನ್ನು ನೀಡುತ್ತದೆ. ಈ ಹೊತ್ತಿನಲ್ಲಿ ಹೊರಾಂಗಣ ವೀಕ್ಷಣೆ ಮತ್ತು ಸುತ್ತಾಟ ಮಾಡುವುದಕ್ಕಾಗಿ ಸಾವಿರಾರು ಜನ ಪ್ರವಾಸಿಗರು ಬರುತ್ತಾರೆ. ಉತ್ಸವಗಳ ಪಟ್ಟಣ ಎಂದೇ ಹೆಸರಾಗಿರುವ ಪಾಲಕ್ಕಾಡಿನ ಕಳಪಥೀ ರಥೋತ್ಸವ ಮತ್ತು ಕಾಲಪೂಥು(ಎತ್ತಿನ ಓಟ) ಇಲ್ಲಿನ ಪ್ರಮುಖ ಆಕರ್ಷಣೆಗಳಾಗಿ ಗಮನ ಸೆಳೆಯುತ್ತವೆ. ಈ ವಿಶಿಷ್ಟವಾದ ಉತ್ಸವಗಳಲ್ಲಿ ನೀವೂ ಪಾಲ್ಗೊಂಡು ಮಿನುಗಬಹುದಾಗಿದೆ.
ಮಲಂಪುಳಾಗೆ ತಲುಪುವ ಬಗೆ
ಮಲಂಪುಳಾಗೆ ಗೆ ರೈಲು ಮತ್ತು ರಸ್ತೆ ಮಾರ್ಗಗಳ ಮೂಲಕವಾಗಿ ಬರಬಹುದಾಗಿದ್ದು, ನಿಮ್ಮ ಬಜೆಟ್ಗೆ ಅನುಗುಣವಾಗಿ ರಜಾದಿನಗಳನ್ನು ಇಲ್ಲಿ ಕಳೆಯಬಹುದಾಗಿದೆ. ವಿರಾಮದ ವೇಳೆಗೆ ಆರಾಮವನ್ನು ನೀಡುವ ಪರಿಶುದ್ಧ ಪ್ರವಾಸೀ ಅನುಭವವನ್ನು ಕಟ್ಟಿಕೊಡುವ ತಾಣ ಇದು.
