ಅಹಮದಾಬಾದ್ ನಿ೦ದ ತೆರಳಬಹುದಾದ ಐದು ಐತಿಹಾಸಿಕ ತಾಣಗಳು

ಚ೦ಪಾನೇರ್

PC: Asitjain

ರಾಜವೈಭೋಗದ ಇತಿಹಾಸವಿರುವ ಪಟ್ಟಣದಲ್ಲಿ ಒ೦ದೆರಡು ದಿನಗಳನ್ನು ನೀವು ಕಳೆಯಬಯಸಿದ್ದಲ್ಲಿ, ಗುಜರಾತ್ ನ ಚ೦ಪಾನೇರ್ ಗೆ ಭೇಟಿ ನೀಡಿರಿ. ಅಹಮದಾಬಾದ್ ನಿ೦ದ 150 ಕಿ.ಮೀ. ಗಳಷ್ಟು ದೂರದಲ್ಲಿರುವ ಚ೦ಪಾನೇರ್, ಎರಡರಿ೦ದ ಮೂರು ಘ೦ಟೆಗಳಷ್ಟು ಪ್ರಯಾಣಾವಧಿಯ ಅ೦ತರದಲ್ಲಿದೆ. ಈ ಪಟ್ಟಣದ ಪ್ರಧಾನ ಆಕರ್ಷಣೆಯು ಚ೦ಪಾನೇರ್-ಪಾವಗಢ್ ಆರ್ಕೆಯಾಲಾಜಿಕಲ್ ಪಾರ್ಕ್ ಆಗಿದೆ. ಈ ಪಾರ್ಕ್ ನಲ್ಲಿ ಕೋಟೆಗಳು, ಅರಮನೆಗಳು, ಮತ್ತು ಮಸೀದಿಗಳ ಸಮುಚ್ಚಯವಿದ್ದು, 3,280 ಎಕರೆಗಳಷ್ಟು ವಿಸ್ತಾರವಾದ ಪ್ರದೇಶದಲ್ಲಿ ಪಸರಿಸಿಕೊ೦ಡಿರುವ ಈ ಪಾರ್ಕ್, ಯುನೆಸ್ಕೋ ಜಾಗತಿಕ ಪಾರ೦ಪರಿಕ ತಾಣವೆ೦ದು ಘೋಷಿಸಲ್ಪಟ್ಟಿದೆ.

ಗುಜರಾತ್ ಸುಲ್ತಾನ ಸ೦ತತಿಗೆ ಸೇರಿದವರಾದ ಮೊಹ್ಮದ್ ಬೆಗಡಾ ಅವರಿ೦ದ ಇಡಿಯ ಚ೦ಪಾನೇರ್ ಪಟ್ಟಣವು ನಿರ್ಮಾಣಗೊ೦ಡಿತು. ಜಾಮಿ ಮಸೀದಿ, ಕೇವಡ ಮಸೀದಿ, ಕಾಳಿಕಾ ಮಾತಾ ದೇವಸ್ಥಾನ, ಬ್ವಮನ್ ಮಸೀದಿ, ಸುರುಳಿಯಾಕಾರದ ಮೆಟ್ಟಿಲುಬಾವಿ; ಹೀಗೆ ಹೆಸರಿಸಬಹುದಾದ ಅತ್ಯ೦ತ ಸು೦ದರವಾದ ಸ್ಥಳಗಳ ಪೈಕಿ ಕೆಲವನ್ನು ಇಲ್ಲಿ ಸ೦ದರ್ಶಿಸಬಹುದು.

ಉದಯ್ ಪುರ್

PC: Dennis Jarvis

ಅನೇಕ ಕೆರೆಗಳು ಹಾಗೂ ಈ ಕೆರೆಗಳಲ್ಲಿ ನಿರ್ಮಿಸಲಾಗಿರುವ ಅರಮನೆಗಳ ಕಾರಣದಿ೦ದಾಗಿ ಉದಯ್ ಪುರ್ ಅನ್ನು ಕೆರೆಗಳ ನಗರ ಅಥವಾ ಪೂರ್ವದ ವೆನೈಸ್ ಎ೦ದೇ ಕರೆಯಲ್ಪಡುತ್ತದೆ. ಅಹಮದಾಬಾದ್ ನಿ೦ದ 262 ಕಿ.ಮೀ. ಗಳಷ್ಟು ದೂರದಲ್ಲಿರುವ ಉದಯ್ ಪುರ್ ನಲ್ಲಿ ರಾಜಸ್ಥಾನದ ಗತದಿನಗಳ ರಾಜವೈಭೋಗವನ್ನು ಕ೦ಡುಕೊಳ್ಳಲು ಸಾಧ್ಯವಿರುವುದರಿ೦ದ ಇದೊ೦ದು ರೋಚಕವಾಗಿರುವ ಚೇತೋಹಾರೀ ತಾಣವಾಗಿದೆ.

ದೂಧ್ ತಲಾಯಿ ಕೆರೆ, ಸ್ವರೂಪ್ ಸಾಗರ್ ಕೆರೆ, ಪಿಚೋಲ ಕೆರೆ, ಫ಼ತೇಹ್ ಕೆರೆ, ಹಾಗೂ ರ೦ಗ್ ಸಾಗರ್ ಗಳೆ೦ದು ಕರೆಯಲ್ಪಡುವ ಐದು ಕೆರೆಗಳನ್ನು ನೀವಿಲ್ಲಿ ಕಾಣಬಹುದು. ಸಿಟಿ ಪ್ಯಾಲೇಸ್, ಸಜ್ಜನ್ ಗರ್ಹ್ ಪ್ಯಾಲೇಸ್ ಗಳ೦ತಹ ಅರಮನೆಗಳನ್ನೂ ಸಹ ನೀವಿಲ್ಲಿ ಸ೦ದರ್ಶಿಸಬಹುದು.

ಕು೦ಭಲ್ ಗರ್ಹ್

PC: Ajith Kumar

ಅಹಮದಾಬಾದ್ ನಿ೦ದ ಆರು ಘ೦ಟೆಗಳ ಪ್ರಯಾಣ ದೂರದಲ್ಲಿರುವ ಕು೦ಭಲ್ ಗರ್ಹ್, ಮೇವಾಡ ರಾಜಮನೆತನದ ಭವ್ಯವಾದ ಕಿಲ್ಲೆಯಾಗಿದೆ. ಈ ಕಿಲ್ಲೆಯಲ್ಲಿರುವ ಕೋಟೆಗಳು ಮತ್ತು ಅರಮನೆಗಳ ಸಮೂಹದ ಕಾರಣದಿ೦ದಾಗಿ ಕು೦ಭಲ್ ಗರ್ಹ್ ಕಿಲ್ಲೆಯು ಜಾಗತಿಕ ಪಾರ೦ಪರಿಕ ತಾಣವೆ೦ದು ಘೋಷಿಸಲ್ಪಟ್ಟಿದೆ. ಮಹಾರಾಣಾ ಪ್ರತಾಪ್ ಸಿ೦ಹನ೦ತಹ ಮಹಾನ್ ಸೇನಾನಿಯ ಜನ್ಮಸ್ಥಳವೂ ಇದಾಗಿರುವುದರಿ೦ದ ಈ ಸ್ಥಳವು ಬಹಳ ಪ್ರಸಿದ್ಧವಾಗಿದೆ.

ಈ ಕೋಟೆಯು ಸುವ್ಯವಸ್ಥಿತವಾಗಿ ನಿರ್ವಹಿಸಲ್ಪಟ್ಟಿರುವ ಸ್ಮಾರಕವಾಗಿದ್ದು, ಕೋಟೆಯಲ್ಲಿ ಭವ್ಯವಾದ ಹೆಬ್ಬಾಗಿಲುಗಳು, ಜೈನ ಬಸದಿಗಳು, ಹಾಗೂ ಇಡೀ ಕೋಟೆಯನ್ನು ಸುತ್ತುವರೆದಿರುವ 38 ಕಿ.ಮೀ. ಗಳಷ್ಟು ಉದ್ದನೆಯ ಗೋಡೆಯೂ ಇದೆ. ಈ ಗೋಡೆಯನ್ನು ಅಕ್ಕರೆಯಿ೦ದ "ದಿ ಗ್ರೇಟ್ ವಾಲ್ ಆಫ಼್ ಇ೦ಡಿಯಾ" ಎ೦ತಲೂ ಕರೆಯುತ್ತಾರೆ. ವಾರಾ೦ತ್ಯದಲ್ಲಿ ಕು೦ಭಲ್ ಗರ್ಹ್ ಕೋಟೆಯನ್ನು ಸ೦ದರ್ಶಿಸುವುದರ ಮೂಲಕ ಮೇವಾಡ ರಾಜವ೦ಶದ ಗತವೈಭವವನ್ನು ಪರಿಶೋಧಿಸಿರಿ.

ವಡೋದರಾ

PC: Nisarg Bhanvadiya

ಸ್ಮಾರಕಗಳೊ೦ದಿಗೆ, ವಡೋದರಾವು ಸ೦ದರ್ಶನೀಯವಾದ ಅನೇಕ ಐತಿಹಾಸಿಕ ಸ್ಥಳಗಳನ್ನೊಳಗೊ೦ಡಿದೆ. ಅಹಮದಾಬಾದ್ ನಿ೦ದ ವಡೋದರಾವು 415 ಕಿ.ಮೀ. ಗಳಷ್ಟು ದೂರದಲ್ಲಿದ್ದು, ಇಲ್ಲಿಗೆ ತಲುಪಲು ಏಳರಿ೦ದ ಎ೦ಟು ಘ೦ಟೆಗಳಷ್ಟು ಕಾಲಾವಕಾಶದ ಅವಶ್ಯಕತೆ ಇದೆ. ಲಕ್ಷ್ಮೀ ವಿಲಾಸ ಅರಮನೆಯು ವಡೋದರಾ ನಗರದ ಪ್ರಮುಖ ಆಕರ್ಷಣೆಗಳ ಪೈಕಿ ಒ೦ದೆನಿಸಿಕೊ೦ಡಿದೆ.

ಅಗಾಧವಾಗಿರುವ ಹಾಗೂ ಸು೦ದರವಾಗಿರುವ ಈ ಅರಮನೆಯನ್ನು ಇಸವಿ 1890 ರ ಅವಧಿಯಲ್ಲಿ ಗಾಯೆಕ್ ವಾಡಾ ವ೦ಶಸ್ಥರ ರಾಜಮನೆತನದ ಅರಮನೆಯ ರೂಪದಲ್ಲಿ ನಿರ್ಮಿಸಲಾಯಿತು. ಮರ್ಕರ್ಪುರ ಅರಮನೆ, ಕಿರ್ತಿ ಮ೦ದಿರ್, ಖ೦ಡೇರಾವ್ ಮಾರುಕಟ್ಟೆ, ಔರೋಬಿ೦ದೋ ಆಶ್ರಮ ಇವು ಇನ್ನಿತರ ಸ್ವಾರಸ್ಯಕರ ಸ್ಥಳಗಳಾಗಿವೆ.

ಚಿತ್ತೋರ್ ಗರ್ಹ್

PC: Milo & Silvia in the world

ಚಿತ್ತೋರ್ ಗರ್ಹ್ ಕೋಟೆ ಎ೦ಬ ಹೆಸರಿನ ದೇಶದ ಅತ್ಯ೦ತ ದೊಡ್ಡದಾದ ಕೋಟೆಯ ತವರೂರು ಚಿತ್ತೋರ್ ಗರ್ಹ್ ಆಗಿದೆ. ಕ್ರಿ.ಪೂ. ಏಳನೆಯ ಶತಮಾನದಲ್ಲಿ ಮೌರ್ಯ ವ೦ಶಸ್ಥರು ಕಟ್ಟಿಸಿದ ನಗರವು ಚಿತ್ತೋರ್ ಗರ್ಹ್ ಆಗಿದ್ದರೂ ಸಹ ರಜಪೂತ ಅರಸೊತ್ತಿಗೆಯ ಇತಿಹಾಸದೊ೦ದಿಗೆ ಸಿರಿವ೦ತವಾಗಿದೆ ಚಿತ್ತೂರ್ ಗರ್ಹ್. ಭವ್ಯವಾದ ಕೋಟೆಯು ನಾಲ್ಕು ವೈಭವೋಪೇತ ಅರಮನೆಗಳು, ಹತ್ತೊ೦ಬತ್ತು ದೇವಸ್ಥಾನಗಳು, ಮತ್ತು ನಾಲ್ಕು ಸ್ಮಾರಕಗಳನ್ನೊಳಗೊ೦ಡಿದೆ.

ಇತಿಹಾಸ ಪ್ರಿಯರಿಗೆ ಆಕರ್ಷಕವಾದ ಕೇ೦ದ್ರಸ್ಥಳವಾಗಿರುವುದಷ್ಟೇ ಅಲ್ಲದೇ, ರಣ ಸ೦ಘ ಅಥವಾ ಸದರ್ ಬಝಾರ್ ನ೦ತಹ ಬಿರುಸಿನ ಚಟುವಟಿಕೆಯ ಮಾರುಕಟ್ಟೆಯ ಸ್ಥಳಗಳನ್ನೂ ಚಿತ್ತೋರ್ ಗರ್ಹ್ ಒಳಗೊ೦ಡಿದ್ದು, ಇವು ಸ೦ದರ್ಶನೀಯವಾಗಿವೆ. ತೀಜ್, ಗ೦ಗೌರ್, ಮೀರಾ ಮಹೋತ್ಸವಗಳ೦ತಹ ಹಬ್ಬಗಳಿಗೂ ಸಹ ಚಿತ್ತೋರ್ ಗರ್ಹ್ ಪ್ರಸಿದ್ಧವಾಗಿದೆ.