ರಾಮಾಯಣ ಎಕ್ಸ್‌ಪ್ರೆಸ್‌; ಇದರ ವಿಶೇಷತೆ ಏನು? ಟಿಕೇಟ್‌ ಎಷ್ಟು?

ಒಂದೇ ಪ್ರವಾಸದಲ್ಲಿ ಅಯೋಧ್ಯೆ ಹಾಗೂ ರಾಮಾಯಣಕ್ಕೆ ಸಂಬಂಧಿಸಿದ ಸ್ಥಳಗಳನ್ನು ಸುತ್ತಾಡಲು ಐಆರ್ ಟಿಸಿಯು ರಾಮಾಯಣ ಎಕ್ಸ್ ಪ್ರೆಸ್ ರೈಲನ್ನು ಜಾರಿಗೆ ತಂದಿದೆ. ಇದು ಪ್ರಯಾಣಿಕರಿಗೆ ರಾಮನಿಗೆ ಸಂಬಂಧಿಸಿದ ಸ್ಥಳಗಳ ದರ್ಶನ ಮಾಡಿಸಲಿದೆ. ರಾಮಾಯಣ ಎಕ್ಸ್ ಪ್ರೆಸ್ ..ಹೆಸರು ಕೇಳುವಾಗಲೇ ರಾಮಾಯಣಕ್ಕೆ ಸಂಬಂಧಿಸಿದ್ದೇನೋ ಅನ್ನಿಸುವುದು ಸಹಜ. ಹೌದು ರಾಮಾಯಣ ಎಕ್ಸ್ ಪ್ರೆಸ್ ರೈಲು ರಾಮನಿಗೆ ಸಂಬಂಧಿಸಿದ ಕೆಲವು ಅಭೂತಪೂರ್ವ ತೀರ್ಥ ಸ್ಥಳಗಳ ದರ್ಶನ ಮಾಡಿಸಲಿದೆ. ನವಂಬರ್ 14ರಂದು ರಾಮಾಯಣ ಎಕ್ಸ್ ಪ್ರೆಸ್ ತನ್ನ ಮೊದಲ ಸವಾರಿಯನ್ನು ಪ್ರಾರಂಭಿಸಿದೆ. ದೆಹಲಿಯ ಸಫದರ್ ಜಂಗ್ ಸ್ಟೇಶನ್ ನಿಂದ ತನ್ನ ಮೊದಲ ಯಾತ್ರೆ ಪ್ರಾರಂಭಿಸಿದೆ. ಈ ಸಂದರ್ಭದಲ್ಲಿ ರೈಲು ನಿಲ್ದಾಣ ಹಾಗೂ ರೈಲನ್ನು ಸುಂದರವಾಗಿ ಅಲಂಕರಿಸಲಾಗಿದೆ. ಮಧ್ಯಾಹ್ನ 2.30 ಕ್ಕೆ ಹೊರಟಿರುವ ಈ ರೈಲು ಶ್ರೀರಾಮ ಹೋಗಿದ್ದ ಸ್ಥಳಗಳ ದರ್ಶನ ಮಾಡಿಸಲಿದೆ. ಭಾರತದಿಂದ ಹಿಡಿದು ಶ್ರೀಲಂಕಾವರೆಗೆ ರಾಮನಿಗೆ ಸಂಬಂಧಿಸಿದ ಸ್ಥಳಗಳನ್ನು ನೋಡುವುದರ ಜೊತೆಗೆ ಅದರ ಬಗ್ಗೆ ತಿಳಿಯಲು ಸಹಕಾರಿಯಾಗುತ್ತದೆ. 16 ದಿನಗಳ ಯಾತ್ರೆ ಇದಾಗಿದೆ. ಈ ರೈಲಿನಲ್ಲಿ ೮೦೦ ಜನರು ಪ್ರಯಾಣಿಸಬಹುದು. ಅವರಲ್ಲಿ ೪೦ ಯಾತ್ರಿಗಳು ಶ್ರೀಲಂಕಾವರೆಗೆ ಪ್ರಯಾಣಿಸಬಹುದು. ರೈಲಿನ ಮೊದಲ ಯಾತ್ರೆಗೆ ಎಲ್ಲಾ ಸೀಟುಗಳು ಫುಲ್ ಆಗಿವೆ. ಭಾರತದಲ್ಲಿ ಅಯೋಧ್ಯೆ, ನಂದಿಗ್ರಾಮ, ಜನಕ್ ಪುರ, ವಾರಣಾಸಿ, ಪ್ರಯಾಗ, ಶೃಂಗವೇರ್ ಪುರ್, ಚಿತ್ರಕೂಟ, ನಾಸಿಕ್, ಹಂಪಿ ಹಾಗೂ ರಾಮೇಶ್ವರ ದರ್ಶನ ಮಾಡಿಸಲಾಗುವುದು. ಭಾರತ ದರ್ಶನ ಮಾಡುವ ಯಾತ್ರಿಗಳಿಗೆ ಟಿಕೇಟ್ ಬೆಲೆ 15,120 ರೂ. ಶ್ರೀಲಂಕಾ ಹೋಗುವ ಯಾತ್ರಿಗಳಿಗೆ 36,970 ರೂ. ಯಾತ್ರೆಯ ಸಂದರ್ಭದಲ್ಲಿ ಎಲ್ಲಾ ರೀತಿಯ ಸುರಕ್ಷತೆಯನ್ನು ಒದಗಿಸಲಾಗುವುದು. ಜೊತೆಗೆ ಟೂರ್ ಮ್ಯಾನೇಜರ್ ಕೂಡಾ ಇರುತ್ತಾರೆ. ಈ ಪ್ರವಾಸದ ಎಲ್ಲಾ ಆಯೋಜನೆಯನ್ನು ಐಆರ್ ಸಿಟಿಸಿ ಮೂಲಕವೇ ನಡೆಸಲಾಗುವುದು. ಊಟ ಹಾಗೂ ವಾಸ್ತವ್ಯದ ವ್ಯವಸ್ಥೆ , ಬಟ್ಟೆ ಒಗೆಯುವುದು ಎಲ್ಲಾ ಪ್ಯಾಕೇಜ್ ನಲ್ಲೇ ಬರುತ್ತದೆ. ಶ್ರೀಲಂಕಾದ ಯಾತ್ರೆ ಮಾಡಬೇಕೋ ಬಿಡುವುದು ನಿಮಗೆ ಬಿಟ್ಟಿದ್ದು. ಒಂದು ವೇಳೆ ನೀವು ಶ್ರೀಲಂಕಾದ ಯಾತ್ರೆ ಮಾಡಬೇಕೆಂದಿದ್ದರೆ, ಐಆರ್ ಸಿಟಿಸಿ ಚೆನ್ನೈನಿಂದ ಫ್ಲೈಟ್ ಟಿಕೇಟ್ ಬುಕ್ ಮಾಡುತ್ತದೆ. ಶ್ರೀಲಂಕಾ ಪ್ರವಾಸವು 6 ದಿನ ಹಾಗೂ 5ರಾತ್ರಿಯದ್ದಾಗಿರುತ್ತದೆ.