ಕರ್ನಾಟಕದ ಈ ಜಲಪಾತಗಳು ನಿಮಗೆ ಗೊತ್ತಾ?

ಗೊಡಚಿನಮಲ್ಕಿ:

ಬೆಳಗಾವಿ ಜಿಲ್ಲೆಯ ಗೋಕಾಕ್ ತಾಲೂಕಿನ ಬಳಿಯಲ್ಲಿದೆ ಈ ಸುಂದರ ಹಾಗೂ ಮನಮೋಹಕ ಜಲಪಾತ. ಮಳೆಗಾಲದ ಸಂದರ್ಭದಲ್ಲಂತೂ ಸೊಗಸಾಗಿ ಸಿಂಗರಿಸಲ್ಪಟ್ಟು ಮೆಟ್ಟಿಲುಗಳ ಆಕಾರದಲ್ಲಿ ಹರಿಯುತ್ತ ಕೊನೆಯದಾಗಿ ರಭಸದಿಂದ ಭೂಮಿಗೆ ಧುಮುಕುವ ದೃಶ್ಯ ಎಂಥವರನ್ನೂ ಆಶರ್ಯಚಕಿತರನ್ನಾಗಿ ಮಾಡುತ್ತದೆ.

ಚಿತ್ರಕೃಪೆ: Shil.4349

ಸೊಗಲ್:

ಸೊಗಲ್ ಬೆಳಗಾವಿ ಜಿಲ್ಲೆಯಲ್ಲಿರುವ ಒಂದು ಯಾತ್ರಾ ಸ್ಥಳವಾಗಿದೆ. ಸುಗೊಳ ಮುನಿ ಎಂಬುವವರು ಹಿಂದೆ ಇಲ್ಲಿ ನೆಲೆಸಿದ್ದರಿಂದ ಇದಕ್ಕೆ ಸೊಗಲ್ ಎಂಬ ಹೆಸರು ಬಂತೆಂದು ಹೇಳಲಾಗುತ್ತದೆ. ಅಲ್ಲದೆ ಮತ್ತೊಂದು ದಂತ ಕಥೆಯ ಪ್ರಕಾರ, ಇದು ಶಿವ-ಪಾರ್ವತಿಯರು ವಿವಾಹವಾದ ಸ್ಥಳ. ಇಲ್ಲಿಯೂ ಕೂಡ ಒಂದು ಜಲಪಾತವನ್ನು ಕಾಣಬಹುದಾಗಿದೆ.

ಸಾತೋಡಿ:

ಉತ್ತರ ಕನ್ನಡ ಜಿಲ್ಲೆಯ ಶಿರಸಿ ಬಳಿ ಕಲ್ಲರಮನೆ ಘಾಟ್ ಹತ್ತಿರ ಈ ಸುಂದರವಾದ ಜಲಪಾತವನ್ನು ಕಾಣಬಹುದು. ಸುಮಾರು 50 ಅಡಿಗಳಷ್ಟು ಎತ್ತರದಿಂದ ಧುಮುಕುವ ಇದರ ನೀರು ಹಲವು ಅಜ್ಞಾತ ನೀರಿನ ಮೂಲಗಳಿಂದ ರೂಪಗೊಂಡಿದೆ.

ಚಿತ್ರಕೃಪೆ: Adnan Alibaksh

ಮಲ್ಲಳ್ಳಿ:

ಮಲ್ಲಳ್ಳಿ ಜಲಪಾತ, ಕೊಡಗು ಜಿಲ್ಲೆಯಲ್ಲಿರುವ ಒಂದು ಸುಂದರ ಜಲಪಾತ. ಪುಷ್ಪಗಿರಿ ಬೆಟ್ಟಗಳ ಕಾಲ್ತುದಿಯಲ್ಲಿ ಈ ಜಲಪಾತ ತಾಣವಿದ್ದು ಸೋಮವಾರಪೇಟೆಯಿಂದ ಸುಮಾರು 25 ಕಿ.ಮೀ ಗಳಷ್ಟು ಅಂತರದಲ್ಲಿದೆ.

ಚಿತ್ರಕೃಪೆ: Premnath Thirumalaisamy

ಚುಂಚಿ:

ಬೆಂಗಳೂರು ನಗರ ಪ್ರದೇಶದಿಂದ ಸುಮಾರು 85 ಕಿ.ಮೀ ಗಳಷ್ಟು ದೂರದಲ್ಲಿ, ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಚುಂಚಿ ಎಂಬ ಹಳ್ಳಿಯಲ್ಲಿ ಈ ಜಲಪಾತವಿದೆ. ಕನಕಪುರ ರಸ್ತೆಯ ಮೇಲೆ ಮಾರ್ಗ ಫಲಕಗಳನ್ನು ಗಮನಿಸುತ್ತ ಮೇಕೆದಾಟುವಿಗೆ ತೆರಳಿ ನಂತರ ಅಲ್ಲಿಂದ ಆರು ಕಿ.ಮೀ ದೂರದಲ್ಲಿರುವ ಈ ಚುಂಚಿ ಜಲಪಾತಕ್ಕೆ ತೆರಳಬಹುದು. ನಿಮ್ಮ್ಮದೆ ಆದ ಸ್ವಂತ ವಾಹನವಿದ್ದಲ್ಲಿ ಉತ್ತಮ. ಅಲ್ಲದೆ ಈ ಜಲಪಾತ ತಾಣಕ್ಕೆ ತೆರಳಲು ಟ್ರೆಕ್ ಮಾಡಬೇಕಾಗಿರುವುದು ಅನಿವಾರ್ಯವಾಗಿದೆ. ಮುಂದೆ ಇದೆ ನದಿಯು (ಅರ್ಕಾವತಿ) ಕಾವೇರಿಯೊಂದಿಗೆ ಸೇರಿ ಸಂಗಮವಾಗುತ್ತದೆ.

ಚಿತ್ರಕೃಪೆ: lohit v

ಮುತ್ಯಾಲಮಡುವು:

ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಆನೇಕಲ್ ತಾಲೂಕಿನ ಮುತ್ಯಾಲಮಡುವು ಒಂದು ಆಕರ್ಷಕ ಪ್ರವಾಸಿ ಕೇಂದ್ರವಾಗಿದೆ. ಇದೆ ಹೆಸರಿನ ಜಲಪಾತ ಇಲ್ಲಿ ಕಾಣಬಹುದು.

ಚಿತ್ರಕೃಪೆ: Natesh Ramasamy

ಚೆಲಾವರ:

ಕೊಡಗಿನ ವಿರಾಜಪೇಟೆಯಿಂದ 16 ಕಿ.ಮೀ ದೂರದಲ್ಲಿದೆ ಚೆಲಾವರ ಜಲಪಾತ. ಸ್ಥಳೀಯರಿಂದ ಎಂಬೆಪಾರೆ ಅಂದರೆ ಆಮೆ ಬಂಡೆ ಎಮ್ದು ಕರೆಯಲ್ಪಡುವ ಈ ಜಲಪಾತ ನೋಡಲು ಮನಮೋಹಕವಾಗಿದ್ದು ಸುತ್ತಮುತ್ತಲಿನ ಪರಿಸರ ಹಚ್ಚ ಹಸಿರಿನ ವಾತಾವರಣದಿಂದ ಕೂಡಿದೆ.

ಚಿತ್ರಕೃಪೆ: V.v

ಒನಕೆ ಅಬ್ಬಿ:

ಒನಕೆ ಅಬ್ಬಿ ಜಲಪಾತವು 400 ಅಡಿಗಳಷ್ಟು ಎತ್ತರವಿದ್ದು, ಪಶ್ಚಿಮ ಘಟ್ಟದ ಆಗುಂಬೆಯ ಬಳಿಯಲ್ಲಿದೆ. ಪಶ್ಚಿಮ ಘಟ್ಟದ ದಟ್ಟ ಕಾಡಿನಲ್ಲಿ ಸುಮಾರು ಐದು ಕಿ.ಮೀ ಗಳಷ್ಟು ಟ್ರೆಕ್ ಮಾಡಿ ಈ ಜಲಪಾತ ತಾಣವನ್ನು ತಲುಪಬಹುದಾಗಿದೆ.

ಚಿತ್ರಕೃಪೆ: Mylittlefinger

ಬರ್ಕಣ:

ಪಶ್ಚಿಮ ಘಟ್ಟದ ಆಗುಂಬೆ ಬಳಿಯಲ್ಲೆ ಮತ್ತೊಂದು ನಯನ ಮನೋಹರವಾದ ಜಲಪಾತವನ್ನು ಕಾಣಬಹುದಾಗಿದೆ. ಅದೆ ಬರ್ಕಣ ಜಲಪಾತ. ಸುಮಾರು 850 ಅಡಿಗಳಷ್ಟು ಎತ್ತರವನ್ನು ಈ ಜಲಪಾತ ಹೊಂದಿದೆ. ದೂರದಿಂದಲೂ ಕೂಡ ಭವ್ಯವಾದ ನೋಟವನ್ನು ನೋಡುಗರಿಗೆ ಕರುಣಿಸುತ್ತದೆ.

ಚಿತ್ರಕೃಪೆ: Lakshmipathi23

ಕೂಡ್ಲು ತೀರ್ಥ:

ಕೂಡ್ಲು ತೀರ್ಥ ಜಲಪಾತವು ಹೆಬ್ರಿಯಿ೦ದ 20 ಕಿ.ಮೀ. ದೂರದಲ್ಲಿದೆ. ಆಗುಂಬೆಯ ದಟ್ಟ ಕಾಡಿನ ಪ್ರದೇಶದಲ್ಲಿ ಉಗಮಿಸುವ ಸೀತಾ ನದಿಯಿಂದ ಉಂಟಾಗಿರುವ ಅತಿ ರಮಣೀಯ ಪ್ರವಾಸಿ ತಾಣವೇ ಈ ಕೂಡ್ಲು ತೀರ್ಥ. ರಸ್ತೆ ಸ೦ಪರ್ಕದಿ೦ದ 4 ಕಿ.ಮೀ. ದೂರದಲ್ಲಿದ್ದು, ಚಾರಣದ ಈ ಜಲಪಾತ ತಾಣಕ್ಕೆ ತಲುಪಬಹುದು.

ಚಿತ್ರಕೃಪೆ: Balajirakonda

ಅಣಶಿ:

ಅಣಶಿ ಜಲಪಾತವು ಅಣಶಿ ರಾಷ್ಟ್ರೀಯ ಉದ್ಯಾನವನದಲ್ಲಿ ಕಂಡುಬರುತ್ತದೆ. ಈ ಜಲಪಾತವು ಸುಮಾರು 150 ಅಡಿಗಳಷ್ಟು ಎತ್ತರದಿಂದ ಧುಮುಕುತ್ತದೆ. ಇದು ಕಾರವಾರ-ದಾಂಡೇಲಿ ಹೆದ್ದಾರಿಯಲ್ಲಿ ಕಾರವಾರದಿಂದ ಸುಮಾರು 32 ಕಿ.ಮೀ ದೂರದಲ್ಲಿ ರಸ್ತೆಯ ಒಂದು ಬದಿಯಲ್ಲಿ ರೂಪಗೊಂಡಿದೆ. ವಿಶೇಷವೆಂದರೆ ಇದು ಮಳೆಗಾಲದ ಜಲಪಾತ. ಪ್ರತಿ ಮಳೆಗಾಲದ ಸಂದರ್ಭದಲ್ಲಿಈ ಜಲಪಾತ ನೋಡಲು ಸಿಗುತ್ತದೆ. ಇದು ಕದ್ರಾ ಆಣೆಕಟ್ಟೆಯಿಂದ ಸುಮಾರು 8 ಕಿ.ಮೀ. ಗಳಷ್ಟು ದೂರದಲ್ಲಿದೆ.

ಚಿತ್ರಕೃಪೆ: Lakshmipathi23

ಮಾಣಿಕ್ಯಧಾರಾ:

ಮಾಣಿಕ್ಯಧಾರಾ ಜಲಪಾತ ದತ್ತಾತ್ರೇಯ ಪೀಠವಿರುವ ಬಾಬಾಬುಡನ್‌ಗಿರಿಯಿಂದ ಸುಮಾರು 3 ಕಿ.ಮೀ ದೂರದಲ್ಲಿದೆ ರೂಪಗೊಂಡಿದೆ. ಬಾಬಾ ಬುಡನ್‍ಗಿರಿ ಪ್ರದೇಶದ ಪರ್ವತ ಶ್ರೇಣಿಗಳಲ್ಲಿ ಹುಟ್ಟುವ ಒಂದು ಸಣ್ಣ ನೀರಿನ ತೊರೆಯು ಸುಮಾರು 100 ಅಡಿಗಳಿಗೂ ಮೀರಿದ ಜಲಪಾತವನ್ನು ನಿರ್ಮಿಸಿದೆ. ಈ ಜಲಪಾತದ ನೀರು ಮಾಣಿಕ್ಯದ ಮಣಿಗಳಂತೆ ಭುವಿಗೆ ಧುಮುಕುವುದರಿಂದ ಇದಕ್ಕೆ ಮಾಣಿಕ್ಯಧಾರಾ ಎಂಬ ಹೆಸರು ಬಂದಿದೆ. ಇದು ಚಿಕ್ಕಮಗಳೂರು ನಗರದಿಂದ ಸುಮಾರು 40 ಕಿಮೀ ಗಳಷ್ಟು ದೂರದಲ್ಲಿದೆ.

ಚಿತ್ರಕೃಪೆ: Lakshmipathi23

ಕೋಸಳ್ಳಿ:

ಕೋಸಳ್ಳಿ ಜಲಪಾತವು ಉಡುಪಿ ಜಿಲ್ಲೆಯ ಕುಂದಾಪುರ ತಾಲೂಕಿನ ಬೈಂದೂರಿನಿಂದ ಸುಮಾರು 11 ಕಿ.ಮೀ ದೂರದಲ್ಲಿದೆ. ಬೈಂದೂರಿನಿಂದ ಶಿರೂರು ಮಾರ್ಗವಾಗಿ ಚಲಿಸುತ್ತ ಸುಮಾರು 8 ಕಿ.ಮೀ ಗಳಷ್ಟು ದೂರವಿರುವ ತೂದಳ್ಳಿಗೆ ಬಂದು ಅಲ್ಲಿಂದ ಸುಮಾರು 3 ಕಿ.ಮೀ ಕಾಡುಮಾರ್ಗದಲ್ಲಿ ನಡೆದರೆ ಕೋಸಳ್ಳಿ ಜಲಪಾತ ಕಾಣಸಿಗುತ್ತದೆ. ಕೋಸಳ್ಳಿ ಜಲಪಾತವು 3 ರಿಂದ 5 ಹಂತಗಳಲ್ಲಿ ಧುಮುಕುತ್ತದೆ.

ಚಿತ್ರಕೃಪೆ: Vishuachar

ಉಂಚಳ್ಳಿ:

ಲುಷಿಂಗ್ಟನ್ ಜಲಪಾತ ಎಂತಲೂ ಕರೆಯಲ್ಪಡುವ ಉಂಚಳ್ಳಿ ಜಲಪಾತ ಅಘನನಾಶಿನಿ ನದಿಯಿಂದ ರೂಪಗೊಂಡಿರುವ ಜಲಪಾತವಾಗಿದೆ. ಇದರ ಎತ್ತರ ಸುಮಾರು 116 ಮೀಟರ್. ಈ ಜಲಪಾತವು ಕರ್ನಾಟಕದ ಉತ್ತರ ಕನ್ನಡ ಜಿಲ್ಲೆಯ ಶಿರಸಿಯಿಂದ 30 ಕಿ.ಮೀ ಗಳಷ್ಟು ದೂರದಲ್ಲಿದೆ.

ಚಿತ್ರಕೃಪೆ: Sukruth

ಬೆಣ್ಣೆ ಹೊಳೆ:

ಬೆಳ್ಳನೆಯ ಬೆಣ್ಣೆಯ ಮುದ್ದೆಯಂತೆ ಧಬ ಧಬ ಧುಮುಕುವ ಉತ್ತರ ಕನ್ನಡ ಜಿಲ್ಲೆಯ ಶಿರಸಿಯ ಬಳಿಯಿರುವ ಈ ಜಲಪಾತದ ಹೆಸರೆ ಬೆಣ್ಣೆ ಹೊಳೆ ಜಲಪಾತ. ಅಘನಾಶಿನಿ ನದಿಯಿಂದ ಸೃಷ್ಟಿಯಾಗುವ ಈ ಜಲಪಾತದ ಎತ್ತರ ಸುಮಾರು 200 ಅಡಿಗಳು.

ಚಿತ್ರಕೃಪೆ: Palachandra

ಕಲ್ಹತ್ತಿಗಿರಿ:

ಕಲ್ಹತ್ತಿಗಿರಿ ಜಲಪಾತವು ಬೀರೂರು ಹತ್ತಿರವಿರುವ ಲಿಂಗದಹಳ್ಳಿಯಿಂದ ಕೆಮ್ಮಣ್ಣುಗುಂಡಿಗೆ ಹೋಗುವ ಮಾರ್ಗದಲ್ಲಿ ಕೆಮ್ಮಣ್ಣುಗುಂಡಿ ತಲುಪುವ ಸುಮಾರು 10 ಕಿ.ಮೀ ಮೊದಲು ಸಿಗುತ್ತದೆ. ಕೆಮ್ಮಣ್ಣುಗುಂಡಿ ಮುಖ್ಯರಸ್ತೆಯಿಂದ 1 ಕಿ.ಮೀ ಒಳಗಡೆ ಚಲಿಸಿದರೆ ಜಲಪಾತವನ್ನು ತಲುಪಬಹುದು. ಜಲಪಾತವು ಸುಮಾರು 300 ಅಡಿ ಎತ್ತರದಿಂದ ಹಂತಹಂತವಾಗಿ ಧರೆಗೆ ಧುಮುಕುತ್ತದೆ.

ಚಿತ್ರಕೃಪೆ: Suhph

ವಿಭೂತಿ:

ಉತ್ತರ ಕನ್ನಡ ಜಿಲ್ಲೆಯ ಯಾಣ ಎಂಬ ಹಳ್ಳಿಯು ತನ್ನಲ್ಲಿರುವ ವಿಶಿಷ್ಟ ಬಗೆಯ ಶಿಲೆಯ ಬೆಟ್ಟಕ್ಕಾಗಿ ಹೆಸರುವಾಸಿಯಾಗಿದೆ. ಈ ಹಳ್ಳಿಯಲ್ಲಿ ಕಂಡುಬರುವ ಉಲ್ಕಾ ಶಿಲೆಯ ಬೆಟ್ಟವಲ್ಲದೆ ವಿಭೂತಿ ಜಲಪಾತವೂ ಕೂಡ ಖ್ಯಾತಿ ಪಡೆದಿದೆ. ವಿಭೂತಿ ಅಥವಾ ಭಸ್ಮದಂತೆ ಈ ಜಲಪಾತದ ನೀರು ಕಂಡುಬರುವುದರಿಂದ ಇದಕ್ಕೆ ವಿಭೂತಿ ಜಲಪಾತ ಎಂದು ಕರೆಯಲಾಗಿದೆ. ಅಲ್ಲದೆ ಇದರ ಸುತ್ತ ಮುತ್ತಲು ಸುಣ್ಣದ ಕಲ್ಲುಗಳನ್ನೂ ಸಹ ಕಾಣಬಹುದು.

ಚಿತ್ರಕೃಪೆ: Shash89

ದೇವರಗುಂಡಿ:

ದಕ್ಷಿಣ ಕನ್ನಡ ಜಿಲ್ಲೆಯ ಸುಳ್ಯ ತಾಲೂಕಿನ ತೊಡಿಕಾನ ಎಂಬ ಹಳ್ಳಿಯ ಸುತ್ತಲಿನ ಸುಂದರವಾದ ಪಶ್ಚಿಮ ಘಟ್ಟದ ಮೈಸಿರಿಯಲ್ಲಿ ಈ ಜಲಪಾತವನ್ನು ಕಾಣಬಹುದಾಗಿದೆ. ಮನುಷ್ಯನ ಚಲನವಲನ ಪ್ರದೇಶದಿಂದ ಅತ್ಯಂತ ದೂರವಿರುವುದರಿಂದ ಇದು ಪಾವಿತ್ರ್ಯತೆ ಹಾಗೂ ಶುದ್ಧ ಪರಿಸರವನ್ನು ಕಾದುಕೊಂಡಿದೆ. ಇದನ್ನು ತಲುಪಲು ತೊಡಿಕಾನದ ಮಲ್ಲಿಕಾರ್ಜುನ ದೇವಸ್ಥಾನದಿಂದ ಪಟ್ಟಿ ಬೆಟ್ಟದೆಡೆ ಸುಮಾರು 1.5 ಕಿ.ಮೀ ಚಲಿಸಿ ಅಡಿಕೆ ತೋಟದ ಮೂಲಕ ಸಾಗಿ ನೋಡಬಹುದು. ಈ ಜಲಪಾತದ ನೀರಿನ ಆಳ ತಿಳಿಯದೆ ಇರುವುದರಿಂದ ಇದರಲ್ಲಿಳಿಯುವುದು ಅಪಾಯಕಾರಿ.

ಸಿರಿಮನೆ:

ಪ್ರಸಿದ್ಧ ಧಾರ್ಮಿಕ ಕ್ಷೇತ್ರ ಶೃಂಗೇರಿ ಬಳಿಯಲ್ಲಿ ಕಿಗ್ಗ ಎಂಬ ಪುಟ್ಟ ಗ್ರಾಮವಿದೆ. ಈ ಗ್ರಾಮದಿಂದ ಐದು ಕಿ.ಮೀ ದೂರಕ್ಕೆ ಸಾಗಿದರೆ ಸಿಗುವುದೇ ಸಿರಿಮನೆ ಜಲಪಾತ. ಆದರೆ ಇಲ್ಲಿಗೆ ಸಾಗುವಾಗ ಸಾಕಷ್ಟು ಜಿಗಣೆಗಳಿರುವುದರಿಂದ ಎಚ್ಚರಿಕೆ ವಹಿಸುವುದು ಉತ್ತಮ.

ಚಿತ್ರಕೃಪೆ: Vaikoovery

ಬಲಮುರಿ ಮತ್ತು ಎಡಮುರಿ:

ಬಲಮುರಿ ಮತ್ತು ಎಡಮುರಿ ಎರಡು ಸುಂದರ ಜಲಪಾತಗಳಾಗಿದ್ದು ಮೈಸೂರಿನಿಂದ ಕೃಷ್ಣರಾಜ ಸಾಗರ ಜಲಾಶಯಕ್ಕೆ ಹೋಗುವ ಮುಖ್ಯ ದಾರಿಯಿಂದ ಸುಮಾರು ಮೂರು ಕಿ.ಮೀ ದೂರದಲ್ಲಿ ಕಂಡುಬರುತ್ತವೆ.

ಚಿತ್ರಕೃಪೆ: Mahesh Telkar

ಹಿಡ್ಲುಮನೆ:

ಕರ್ನಾಟಕದ ಸುಂದರ ಟ್ರೆಕ್ಕಿಂಗ್ ಶಿಖರವಾದ ಕೊಡಚಾದ್ರಿಯಿಂದ ಐದು ಕಿ.ಮೀ ದೂರದಲ್ಲಿ ಹಿಡ್ಲುಮನೆ ಜಲಪಾತವಿದೆ. ಕೊಡಚಾದ್ರಿಯಿಂದ ಅಮೋಘವಾದ ಚಾರಣದ ಮೂಲಕ ಈ ಜಲಪಾತ ತಣವನ್ನು ತಲುಪಬಹುದು.

ಚಿತ್ರಕೃಪೆ: Shrikanth n

ಕಡಾಂಬಿ:

ಚಿಕ್ಕಮಗಳೂರು ಜಿಲ್ಲೆಯ ಕುದುರೆಮುಖ ರಾಷ್ಟ್ರೀಯ ಉದ್ಯಾನದ ಪ್ರದೇಶದಲ್ಲಿ ಈ ಸುಂದರ ಕಡಾಂಬಿ ಜಲಪಾತವನ್ನು ಕಾಣಬಹುದಾಗಿದೆ.

ಚಿತ್ರಕೃಪೆ: Karunakar Rayker