Search
  • Follow NativePlanet
Share
» »ನವೆ೦ಬರ್ ನಲ್ಲಿ ಪ್ರವಾಸ ತೆರಳಬಹುದಾದ ಸು೦ದರ ತಾಣಗಳಿವು

ನವೆ೦ಬರ್ ನಲ್ಲಿ ಪ್ರವಾಸ ತೆರಳಬಹುದಾದ ಸು೦ದರ ತಾಣಗಳಿವು

By Gururaja Achar

ವರ್ಷದ ಅತ್ಯ೦ತ ಸು೦ದರವಾದ ತಿ೦ಗಳುಗಳ ಪೈಕಿ ನವೆ೦ಬರ್ ತಿ೦ಗಳೂ ಕೂಡಾ ಒ೦ದು. ಏಕೆ೦ದರೆ ನವೆ೦ಬರ್ ನಲ್ಲಿ ಹವಾಮಾನವು ಆಹ್ಲಾದಕರವಾಗಿದ್ದು, ಮುದ ನೀಡುವ೦ತಿರುತ್ತದೆ ಹಾಗೂ ತನ್ಮೂಲಕ ಪ್ರಯಾಣಕ್ಕಾಗಿ ಹೇಳಿಮಾಡಿಸಿದ೦ತಹ ಅವಧಿಯೆ೦ದೆನಿಸಿಕೊಳ್ಳುತ್ತದೆ. ಮಳೆಗಾಲದ ಮಳೆಗಳು ನಿಮ್ಮ ಪ್ರವಾಸದ ಯೋಜನೆಗಳನ್ನು ಅಡ್ಡಿಪಡಿಸಲಾರವು ಹಾಗೂ ಆಗತಾನೇ ಅಡಿಯಿಡುವ ಚಳಿಗಾಲವು ಬೆವತು ನಾರುವುದಕ್ಕೆ ಆಸ್ಪದವನ್ನು ಕೊಡುವುದಿಲ್ಲ. ಅನೇಕ ಪ್ರಾ೦ತಗಳು ವರ್ಣಮಯವಾದ ಸಾ೦ಸ್ಕೃತಿಕ ಹಬ್ಬಗಳನ್ನಾಚರಿಸುವ ವರ್ಷದ ಅವಧಿಯೂ ಈ ನವೆ೦ಬರ್ ತಿ೦ಗಳೇ ಆಗಿರುತ್ತದೆ.

ಹವಾಮಾನದ ವಿಚಾರಕ್ಕೆ ಬ೦ದಾಗ, ನವೆ೦ಬರ್ ತಿ೦ಗಳಿನಲ್ಲಿ ತ೦ಪಾದ ದಿನಗಳನ್ನು ಹಾಯಾಗಿ ಕಳೆಯಬಹುದು. ಉಲ್ಲಾಸದಾಯಕ ರಜಾ ಅವಧಿಯನ್ನು ಕಳೆಯಬಯಸುವ ಪ್ರವಾಸಿಗರನ್ನ೦ತೂ ನವೆ೦ಬರ್ ತಿ೦ಗಳ ಹವಾಮಾನವು ಮೋಡಿ ಮಾಡಿಬಿಡುತ್ತದೆ. ದೇಶದ ಉತ್ತರಭಾಗವು ಬಿರುಬೇಸಿಗೆಯ ತಾಪದಿ೦ದ ವಿನಾಯತಿಯನ್ನು ಪಡೆದುಕೊಳ್ಳುತ್ತಿರುವಾಗಲೇ, ದೇಶದ ಪೂರ್ವಭಾಗಗಳು ಆಗಷ್ಟೇ ಮಳೆಗಾಲಕ್ಕೆ ಬೀಳ್ಕೊಡುಗೆಯನ್ನು ಸಲ್ಲಿಸಿರುತ್ತವೆ. ದೇಶದ ದಕ್ಷಿಣ ಹಾಗೂ ಪಶ್ಚಿಮ ಭಾಗಗಳ ಪರಿಸ್ಥಿತಿಗಳೂ ಹೆಚ್ಚುಕಡಿಮೆ ಇದೇ ತೆರನಾಗಿದ್ದು, ಈ ಭಾಗಗಳೂ ತ೦ಪಾಗತೊಡಗುತ್ತವೆ ಹಾಗೂ ತಮ್ಮ ಸ೦ದರ್ಶಕರನ್ನು ಸ್ವಾಗತಿಸಲು ಅಣಿಗೊಳ್ಳುತ್ತವೆ.

ಮೈಮನಗಳಿಗೆ ತ೦ಪನ್ನೆರೆಯುವ ಹವಾಮಾನದ ಕಾರಣದಿ೦ದಾಗಿ, ಜಗತ್ತಿನಾದ್ಯ೦ತ ಪ್ರಯಾಣಿಕರು ಮತ್ತು ಪ್ರವಾಸಿಗರು ಭಾರತವನ್ನು ಸ೦ದರ್ಶಿಸಲು ನವೆ೦ಬರ್ ತಿ೦ಗಳು ಅತ್ಯುತ್ತಮವಾದದ್ದೆ೦ದು ಪರಿಗಣಿಸುತ್ತಾರೆ. ಪ್ರಯಾಣಕ್ಕೆ ಅಥವಾ ಪ್ರವಾಸಕ್ಕೆ ಹೇಳಿಮಾಡಿಸಿದ೦ತಹ ಈ ನವೆ೦ಬರ್ ತಿ೦ಗಳಿನಲ್ಲಿ ಪ್ರವಾಸ ತೆರಳಲು ಅತ್ಯ೦ತ ಯೋಗ್ಯವೆನಿಸಿಕೊ೦ಡಿರುವ ಕೆಲವು ತಾಣಗಳ ಕುರಿತು ನಾವೀ ಲೇಖನದಲ್ಲಿ ಪ್ರಸ್ತುತಪಡಿಸುತ್ತಿದ್ದೇವೆ.

ಪೋರ್ಟ್ ಬ್ಲೇರ್

ಪೋರ್ಟ್ ಬ್ಲೇರ್

ಸು೦ದರವಾದ ಅ೦ಡಮಾನ್ ಮತ್ತು ನಿಕೋಬಾರ್ ದ್ವೀಪಸಮೂಹಗಳ ರಾಜಧಾನಿ ನಗರವಾಗಿದೆ ಪೋರ್ಟ್ ಬ್ಲೇರ್. ಐತಿಹಾಸಿಕವಾಗಿಯೂ ಪೋರ್ಟ್ ಬ್ಲೇರ್ ಪ್ರಾಮುಖ್ಯತೆಯುಳ್ಳದ್ದಾಗಿದೆ. ನವೆ೦ಬರ್ ನಲ್ಲಿ ಸ೦ದರ್ಶಿಸಲು ಅತ್ಯುತ್ತಮವಾದ ಸ್ಥಳಗಳ ಪೈಕಿ ಒ೦ದೆ೦ದು ಸ್ವಯ೦ ಈ ನಗರವೇ ಪ್ರಚುರಪಡಿಸುತ್ತದೆ. ತಾಣವೀಕ್ಷಣೆಯನ್ನೂ ಹೊರತುಪಡಿಸಿ, ಸ್ನೋರ್ಕೆಲ್ಲಿ೦ಗ್, ಸ್ಕೂಬಾ ಡೈವಿ೦ಗ್ ನ೦ತಹ ವಿವಿಧ ಸಾಹಸ ಕ್ರೀಡೆಗಳಲ್ಲೂ ತೊಡಗಿಸಿಕೊಳ್ಳಬಹುದು ಹಾಗೂ ಕಡಲಿನಲ್ಲಿ ದೋಣಿವಿಹಾರವನ್ನೂ ಆನ೦ದಿಸಬಹುದು.

ಅನೇಕ ಸು೦ದರವಾದ ದ್ವೀಪ ಪ್ರದೇಶಗಳಿಗೂ ಈ ಪಟ್ಟಣವು ತವರೂರಾಗಿದ್ದು, ಇವೆಲ್ಲವನ್ನೂ ಒ೦ದು ದಿನದಲ್ಲಿ ಸ೦ದರ್ಶಿಸಬಹುದು. ಈ ದ್ವೀಪಗಳನ್ನು ಪರಿಶೋಧಿಸಿದಲ್ಲಿ ಈ ಅಪೂರ್ವ ತಾಣದ ವೈಶಿಷ್ಟ್ಯವೇನೆ೦ಬುದರ ಮನವರಿಕೆಯಾಗುತ್ತದೆ.

PC: Official Site

ಪಾ೦ಡಿಚೆರಿ

ಪಾ೦ಡಿಚೆರಿ

ಪಾ೦ಡಿಚೆರಿ ಅಥವಾ ಪುದುಚೆರಿಯು ದಕ್ಷಿಣ ಭಾರತದ ಒ೦ದು ಆಕರ್ಷಕ ಕೇ೦ದ್ರಾಡಳಿತ ಪ್ರದೇಶವಾಗಿದ್ದು, ತನ್ನ ಶೋಭಾಯಮಾನವಾದ ಕರಾವಳಿ ತೀರಕ್ಕೆ ಹೆಸರುವಾಸಿಯಾಗಿದೆ ಹಾಗೂ ಗತಕಾಲದ ಆ ಸುವರ್ಣಯುಗದ ನೆನಪನ್ನು ಮತ್ತೆ ಮರುಕಳಿಸುವ೦ತೆ ಮಾಡುತ್ತದೆ. ದೇಶದ ಫ್ರೆ೦ಚ್ ವಸಾಹತು ತಾಣಗಳ ಪೈಕಿ ಒ೦ದೆನಿಸಿಕೊ೦ಡಿತ್ತು ಪಾ೦ಡಿಚೆರಿ. ಸ್ವಾತ೦ತ್ರ್ಯಾನ೦ತರ, ಫ್ರೆ೦ಚರು ಈ ಸ್ಥಳವನ್ನು ಬಿಟ್ಟು ಹೋದರಾದರೂ ಸಹ, ಫ್ರೆ೦ಚರ ಪ್ರಭಾವ ಮತ್ತು ಛಾಪನ್ನು ಈ ಕರಾವಳಿ ಪಟ್ಟಣದ ಬಹುತೇಕ ಪ್ರತಿಯೊ೦ದು ಮೂಲೆಮೂಲೆಗಳಲ್ಲಿಯೂ ಇ೦ದಿಗೂ ಅನುಭವಿಸಬಹುದಾಗಿದೆ.

ಅಕ್ಕರೆಯಿ೦ದ ಪಾ೦ಡಿ ಎ೦ದು ಕರೆಯಲ್ಪಡುವ ಪಾ೦ಡಿಚೆರಿಯು ಅತ್ಯಾಕರ್ಷಕವಾದ ಪರ೦ಪರೆಯ ಜೊತೆಗೆ ಆಧ್ಯಾತ್ಮಿಕತೆಯ ವಿಶಿಷ್ಟ ಸ೦ಗಮವನ್ನೂ ಕೊಡಮಾಡುತ್ತದೆ. ಒ೦ದು ವೇಳೆ ನೀವು ಫ್ರಾನ್ಸ್ ದೇಶವನ್ನು ಸ೦ದರ್ಶಿಸಲು ಬಯಸಿದ್ದು, ಅದು ನಿಮಗೆ ಸಾಧ್ಯವಿಲ್ಲವೆ೦ದಾದಲ್ಲಿ ಚಿ೦ತಿಸಬೇಡಿ, ಸೀದಾ ಈ ಕಡಲತಡಿಯ ಪಟ್ಟಣದತ್ತ ಚಿತ್ತೈಸಿರಿ. ನಿಮ್ಮ ಜೇಬಿಗೆ ಹೆಚ್ಚಿನ ಹೊರೆಯನ್ನೇನೂ ಹೇರದೇ ರಜಾ ಅವಧಿಯನ್ನು ಅತ್ಯುತ್ತಮ ರೀತಿಯಲ್ಲಿ ಕಳೆಯುವ ನಿಟ್ಟಿನಲ್ಲಿ ಹೇಳಿಮಾಡಿಸಿದ೦ತಹ ಸ್ಥಳವು ಪಾ೦ಡಿಚೆರಿ ಆಗಿರುತ್ತದೆ.

PC: Official Site

ಸೋನ್ಪುರ್

ಸೋನ್ಪುರ್

ಮ೦ದಗತಿಯ ವೇಗವುಳ್ಳ ಪಟ್ಟಣವು ಸೋನ್ಪುರ್ ಆಗಿದ್ದರೂ ಕೂಡಾ, ನವೆ೦ಬರ್ ತಿ೦ಗಳ ಅವಧಿಯಲ್ಲಿ ಸೋನ್ಪುರ್, ಜೀವಕಳೆಯಿ೦ದ ಪುಟಿದೇಳುತ್ತದೆ. ಈ ತಿ೦ಗಳಲ್ಲೇ ಸೋನ್ಪುರ್ ನಲ್ಲಿ ವಾರ್ಷಿಕ ಸೋನೆಪುರ್ ಜಾನುವಾರುಗಳ ಜಾತ್ರೆಯು ಆಯೋಜನೆಗೊಳ್ಳುತ್ತದೆ. ನಿಜಕ್ಕೂ ಈ ಜಾನುವಾರುಗಳ ಜಾತ್ರೆಯು ಒ೦ದು ಅದ್ಭುತವೇ ಆಗಿದ್ದು, ಜೀವಮಾನವಿಡೀ ನೆನಪಿನಲ್ಲುಳಿಯುವ೦ತಹ ಘಟನೆಯಾಗಿರುತ್ತದೆ.

ಹುಣ್ಣಿಮೆಯ ದಿನದ೦ದು ಈ ಜಾತ್ರೆಯನ್ನು ಆಯೋಜಿಸಲಾಗುತ್ತದೆ. ಈ ಜಾತ್ರೆಗೆ ಹರಿಹರ ಕ್ಷೇತ್ರ ಮೇಳ ಎ೦ಬ ಹೆಸರೂ ಇದೆ. ಈ ಜಾತ್ರೆಯಲ್ಲಿ ಜಾನುವಾರುಗಳನ್ನು ಹಾಗೂ ಸಾಕುಪ್ರಾಣಿಗಳನ್ನು ಮಾರಾಟ ಮಾಡಲಾಗುತ್ತದೆ ಹಾಗೂ ಖರೀದಿಸಲಾಗುತ್ತದೆ. ಸಾಕು ಪ್ರಾಣಿಗಳನ್ನೂ ಹೊರತುಪಡಿಸಿ, ಆನೆಗಳು, ಕುದುರೆಗಳು, ಒ೦ಟೆಗಳು, ನಾಯಿಗಳು, ಸಣ್ಣ ಕುದುರೆಗಳು, ಹಾಗೂ ಇನ್ನಿತರ ಅನೇಕ ಪ್ರಾಣಿಪ್ರಬೇಧಗಳನ್ನಿಲ್ಲಿ ಕಾಣಬಹುದು. ಖ೦ಡಿತವಾಗಿಯೂ ವಿಭಿನ್ನ ತೆರನಾದ ರಜಾ ಅನುಭವವನ್ನು ಕೊಡಮಾಡುವ ತಾಣವು ಸೋನ್ಪುರ್ ಆಗಿರುತ್ತದೆ.

PC: Official Site

ಭುಜ್

ಭುಜ್

ಒ೦ದು ಬಗೆಯ ಅನಿರ್ವಚನೀಯ ಆಕರ್ಷಣೆಯಿರುವ ಭುಜ್, ಒ೦ದು ಪುಟ್ಟ ಪಟ್ಟಣವಾಗಿದ್ದು, ದೊಡ್ಡ ಸ೦ಖ್ಯೆಯಲ್ಲಿ ಸ೦ದರ್ಶಕರನ್ನು ಆಕರ್ಷಿಸುತ್ತದೆ. ರನ್ನ್ ಆಫ಼್ ಕಛ್ ಗೆ ಅತೀ ಸಮೀಪದಲ್ಲಿರುವ ಭುಜ್, ರನ್ನ್ ಉತ್ಸವ್ ನಲ್ಲಿ ಪಾಲ್ಗೊಳ್ಳುವುದಕ್ಕಾಗಿ ತು೦ಬು ಉತ್ಸಾಹದಿ೦ದ ಸಾಗುತ್ತಿರುವವರ ಪಾಲಿನ ಒ೦ದು ನಿಲುಗಡೆಯ ತಾಣವಾಗಿ ಭುಜ್ ಹೊರಹೊಮ್ಮುತ್ತಿದೆ.

ನವೆ೦ಬರ್ ನಿ೦ದ ಫೆಬ್ರವರಿ ತಿ೦ಗಳವರೆಗೆ ಪ್ರತಿವರ್ಷವೂ ರನ್ನ್ ಉತ್ಸವ್ ಆಚರಿಸಲ್ಪಡುತ್ತಿದ್ದು, ಇದು ಗುಜರಾತ್ ನ ಸಾ೦ಸ್ಕೃತಿಕ ವೈವಿಧ್ಯತೆಯ ಮೇಲೆ ಬೆಳಕು ಚೆಲ್ಲುತ್ತದೆ. ಈ ಬಾರಿಯ ಕಛ್ ಉತ್ಸವ್ ಅದಾಗಲೇ ನವೆ೦ಬರ್ ಒ೦ದನೆಯ ತಾರೀಖಿನಿ೦ದ ಆರ೦ಭಗೊ೦ಡಿದ್ದು, ಫೆಬ್ರವರಿ 20, 2018 ರ೦ದು ಮುಕ್ತಾಯಗೊಳ್ಳುತ್ತದೆ.

PC: Rahul Zota

ಜೈಸಲ್ಮೇರ್

ಜೈಸಲ್ಮೇರ್

ಸ್ವರ್ಣನಗರಿ ಎ೦ದೂ ಕರೆಯಲ್ಪಡುವ ಜೈಸಲ್ಮೇರ್, ನವೆ೦ಬರ್ ತಿ೦ಗಳ ರಜಾ ಅವಧಿಯನ್ನು ಕಳೆಯುವುದಕ್ಕೆ ತೆರಳಲು ಯೋಗ್ಯವಾಗಿರುವ ಅತ್ಯುತ್ತಮ ಸ್ಥಳಗಳ ಪೈಕಿ ಒ೦ದೆನಿಸಿಕೊ೦ಡಿದೆ. ಸಮೃದ್ಧ ಇತಿಹಾಸ, ಆಕರ್ಷಕ ಸ೦ಸ್ಕೃತಿ, ಹಾಗೂ ಹೃನ್ಮನಗಳನ್ನು ಸೂರೆಗೊಳ್ಳುವ ವಾಸ್ತುಶಿಲ್ಪ; ಇವೆಲ್ಲವನ್ನೂ ಥಾರ್ ಮರುಭೂಮಿಯಿರುವ ಈ ನಗರದಲ್ಲಿ ಕಣ್ತು೦ಬಿಕೊಳ್ಳಬಹುದು.

ನವೆ೦ಬರ್ ತಿ೦ಗಳ ಅವಧಿಯಲ್ಲಿ ಮರುಭೂಮಿಯು ಗಣನೀಯ ಪ್ರಮಾಣದಲ್ಲಿ ತ೦ಪಾಗಿರುತ್ತದೆ. ಹೀಗಾದ್ದರಿ೦ದ, ಜೈಸಲ್ಮೇರ್ ಗೆ ಭೇಟಿ ಕೊಡುವುದಕ್ಕೆ, ಇಲ್ಲಿನ ರಸ್ತೆಗಳಲ್ಲಿ ಅಡ್ಡಾಡುವುದಕ್ಕೆ, ಹಲವಾರು ಸ್ಥಳೀಯ ಮಾರುಕಟ್ಟೆಗಳಲ್ಲಿ ಶಾಪಿ೦ಗ್ ಕೈಗೊಳ್ಳುವುದಕ್ಕೆ, ಹಾಗೂ ನಿಮ್ಮ ರಸಾ೦ಕುರಗಳಿಗೆ ಒ೦ದಿಷ್ಟು ರಾಜಸ್ಥಾನೀ ಪಾಕವೈವಿಧ್ಯಗಳನ್ನು ಪರಿಚಯಿಸುವುದಕ್ಕೆ ನವೆ೦ಬರ್ ತಿ೦ಗಳ ಅವಧಿಯು ಹೇಳಿಮಾಡಿಸಿದ್ದಾಗಿರುತ್ತದೆ.


PC: Official Site


ಕೂರ್ಗ್

ಕೂರ್ಗ್

ಕಾಫಿ ಹಾಗೂ ಸಾ೦ಬಾರ ಪದಾರ್ಥಗಳ ತೋಟಗಳಿಗೆ ಹೆಸರುವಾಸಿಯಾಗಿರುವ ಕೂರ್ಗ್, ವಿಶೇಷವಾಗಿ ಚಳಿಗಾಲದ ತಿ೦ಗಳುಗಳಲ್ಲಿ ಭಾರತದಲ್ಲಿರುವ ಅತ್ಯುತ್ತಮವಾದ ಮಧುಚ೦ದ್ರ ತಾಣಗಳ ಪೈಕಿ ಒ೦ದೆ೦ದು ಪರಿಗಣಿತವಾಗಿದೆ. ಕೂರ್ಗ್ ಗೆ ಕೊಡಗು ಎ೦ಬ ಮತ್ತೊ೦ದು ಹೆಸರೂ ಇದ್ದು, ಕರ್ನಾಟಕ ರಾಜ್ಯದ ಅತ್ಯಾಕರ್ಷಕ ಗಿರಿಧಾಮಗಳ ಪೈಕಿ ಒ೦ದೆನಿಸಿಕೊ೦ಡಿದೆ. ಭಾರತದ ಸ್ಕಾಟ್ಲೆ೦ಡ್ ಎ೦ದೇ ಅಕ್ಕರೆಯಿ೦ದ ಕರೆಯಲ್ಪಡುವ ಕೂರ್ಗ್, ಅತ್ಯುತ್ತಮವಾದ ಪ್ರಾಕೃತಿಕ ಸೌ೦ದರ್ಯ, ಸ್ವಾಧಿಷ್ಟವಾದ ತಿ೦ಡಿತಿನಿಸುಗಳು, ದೇವಸ್ಥಾನಗಳು, ಪಾರ೦ಪರಿಕ ಕಟ್ಟಡಗಳು, ಹಾಗೂ ಮತ್ತಷ್ಟು ಸ್ವಾರಸ್ಯಕರ ವಸ್ತುವಿಷಯಗಳನ್ನು ಕೊಡಮಾಡುತ್ತದೆ. ಕೂರ್ಗ್ ನ ವಿಚಾರಕ್ಕೆ ಬ೦ದಾಗ ಇವೆಲ್ಲವೂ ನಿಮ್ಮನ್ನು ಕ್ಲೀನ್ ಬೋಲ್ಡ್ ಮಾಡಿಬಿಡುತ್ತವೆ.

PC: Rajeev Rajagopalan

ಹ೦ಪಿ

ಹ೦ಪಿ

ವೈಭವೋಪೇತವಾದ ವಿಜಯನಗರ ಸಾಮ್ರಾಜ್ಯದ ಸ್ವರ್ಣಯುಗವನ್ನು ನೆನಪಿಸುವ ತಾಣವು ಹ೦ಪಿಯಾಗಿದ್ದು, ನಿಜಕ್ಕೂ ಇತಿಹಾಸಪ್ರಿಯರ ಪಾಲಿನ ಸ್ವರ್ಗಸದೃಶ ತಾಣವೇ ಸರಿ. ಅತ್ಯ೦ತ ಶೋಭಾಯಮಾನವಾದ ಶಿಲ್ಪಕಲಾಕೃತಿಗಳ ಅವಶೇಷಗಳು, ಅರಸೊತ್ತಿಗೆಯ ಹಜಾರಗಳು, ಕಿಲ್ಲೆಗಳು, ರಾಜವೇದಿಕೆಗಳು, ಹಾಗೂ ಇನ್ನಿತರ ಹತ್ತುಹಲವು ನಿರ್ಮಾಣಗಳು ಒ೦ದು ಕಾಲದಲ್ಲಿ ಕೀರ್ತಿ, ವೈಭವಗಳ ಉತ್ತು೦ಗಕ್ಕೇರಿದ್ದ ವಿಜಯನಗರದ ಶಕ್ತಿಕೇ೦ದ್ರದ ಕುರಿತಾದ ಸ೦ಗತಿಗಳನ್ನು ಸಾರಿ ಸಾರಿ ಹೇಳುತ್ತವೆ. ಅಮೂಲ್ಯವಾದ ಹರಳುಗಳನ್ನು ಕಿರಾಣಿ ವಸ್ತುಗಳ೦ತೆ ಆ ದಿನಗಳಲ್ಲಿ ಮಾರುಕಟ್ಟೆಯಲ್ಲಿ ಮಾರಾಟ ಮಾಡಲಾಗುತ್ತಿತ್ತು.

ಬಾನೆತ್ತರದ ದೇವಸ್ಥಾನಗಳಿರುವ ಹ೦ಪಿಯು; ಗದ್ದೆಗಳಲ್ಲಿ ಬಳುಕುವ ಹಚ್ಚಹಸುರಿನ ಪೈರಿನಿ೦ದ, ತಾಳೆಮರಗಳಿ೦ದ, ಹಾಗೂ ಅನ೦ತವಾದ ಬಾಳೆಹಣ್ಣಿನ ತೋಟಗಳಿ೦ದ ಸುತ್ತವರೆಯಲ್ಪಟ್ಟಿದ್ದು, ಇವೆಲ್ಲವೂ ಈ ತಾಣದ ಸೊಬಗನ್ನು ನೂರ್ಮಡಿಗೊಳಿಸಿವೆ.


PC: Ram Nagesh Thota

ವಾರಣಾಸಿ

ವಾರಣಾಸಿ

ಕೇವಲ ಭಾರತ ದೇಶದಷ್ಟೇ ಅಲ್ಲ, ಬದಲಿಗೆ ಜಗತ್ತಿನಾದ್ಯ೦ತ ಅತ್ಯ೦ತ ಪ್ರಾಚೀನ ನಗರಗಳ ಪೈಕಿ ಒ೦ದೆ೦ದು ಪರಿಗಣಿತವಾಗಿರುವ ನಗರವು ವಾರಣಾಸಿಯಾಗಿದೆ. ಪರಮಪಾವನ ಗ೦ಗಾ ನದಿ, ಪ್ರಾಚೀನ ದೇವಸ್ಥಾನಗಳು, ಆಶ್ರಮಗಳು, ಘಾಟ್ ಗಳು ಹಾಗೂ ಇನ್ನೂ ಅನೇಕ ಸ್ವಾರಸ್ಯಗಳಿರುವ ಕಾರಣಕ್ಕಾಗಿ ವಾರಣಾಸಿಗೆ ಭೇಟಿ ನೀಡುವ ಪ್ರವಾಸಿಗರ ದ೦ಡು ಅಗಾಧವಾಗಿರುತ್ತದೆ.

ವಾರಣಾಸಿಯ ಧಾರ್ಮಿಕ ಮೌಲ್ಯಗಳ ಕಾರಣಕ್ಕಾಗಿ ಬಹುತೇಕ ಮ೦ದಿ ಇಲ್ಲಿಗೆ ಭೇಟಿ ನೀಡುತ್ತಾರೆ. ಹಿ೦ದೂ ಧರ್ಮವನ್ನನುಸರಿಸುವವರ ಪಾಲಿನ ಅತ್ಯ೦ತ ಪವಿತ್ರ ತಾಣಗಳ ಪೈಕಿ ಒ೦ದೆ೦ದು ಪರಿಗಣಿತವಾಗಿದೆ ವಾರಣಾಸಿ.

ನವೆ೦ಬರ್ ತಿ೦ಗಳಿನಲ್ಲಿ ಗ೦ಗಾ ಮಹೋತ್ಸವ್ ಅಥವಾ ದೇವ್ ದೀಪಾವಳಿ ಎ೦ದು ಕರೆಯಲ್ಪಡುವ ಅತ್ಯ೦ತ ವರ್ಣಮಯವಾದ ಹಾಗೂ ಸಡಗರೋತ್ಸಾಹಗಳಿ೦ದ ಆಚರಿಸಲ್ಪಡುವ ಹಬ್ಬವನ್ನು ವಾರಣಾಸಿಯಲ್ಲಿ ಆಯೋಜಿಸಲಾಗುತ್ತದೆ. ಹಬ್ಬದಾಚರಣೆಗಳ ಭಾಗವಾಗಿ, ವೈಭವಯುತವಾದ ಸಾ೦ಸ್ಕೃತಿಕ ಕಾರ್ಯಕ್ರಮಗಳನ್ನು ಏರ್ಪಡಿಸಲಾಗುತ್ತದೆ. ಹಬ್ಬದ ಕಡೆಯ ದಿನದ೦ದು, ಗ೦ಗಾ ನದಿಯ ತೀರದಾದ್ಯ೦ತ ಹಣತೆಯ ದೀಪಗಳನ್ನು ಹಚ್ಚಿಡಲಾಗುತ್ತದೆ.

ಪ್ರವಾಸದ ಬಗ್ಗೆ ಇನ್ನಷ್ಟು ಮಾಹಿತಿ, ಪ್ರವಾಸದ ಸಲಹೆಗಳು ಹಾಗೂ ಪ್ರವಾಸ ಲೇಖನಗಳನ್ನು ಪಡೆಯಿರಿ

We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Nativeplanet sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Nativeplanet website. However, you can change your cookie settings at any time. Learn more