Click it and Unblock the Notifications
ಹಿಮಾಚಲ ಪ್ರದೇಶದ 5700 ಅಡಿ ಎತ್ತರದಲ್ಲಿರುವ ಒಂದು ಪುಟ್ಟ ಪಟ್ಟಣವೇ ಶೋಘಿ. ರಾಜ್ಯದ ಗಿರಿಧಾಮಗಳಲ್ಲೊಂದಾಗಿರುವ ಈ ಪಟ್ಟಣವು ಶಿಮ್ಲಾ ಜಿಲ್ಲೆಯಿಂದ ಕೇವಲ 13 ಕಿಮೀ ದೂರದಲ್ಲಿದೆ. ಓಕ್ ಮರಗಳು ಮತ್ತು ರೊಡೊಡೆಂಡ್ರೋನ್ಸ್ ಗಳಿಂದ ಸುತ್ತುವರಿದಿರುವ ಶೋಘಿಯು ತನ್ನ ನೈಸರ್ಗಿಕ ಸೌಂದರ್ಯದಿಂದಾಗಿ ಹೆಸರುವಾಸಿಯಾಗಿದೆ. ಅಲ್ಲದೆ ಸ್ಥಳೀಯ ಉತ್ಪನ್ನಗಳಾದ ಹಣ್ಣಿನ ರಸಗಳು, ಜೆಲ್ಲಿಗಳು, ಸಿರಪ್ ಗಳು ಮತ್ತು ಉಪ್ಪಿನಕಾಯಿಗಳಿಗೂ ಪ್ರಸಿದ್ಧವಾಗಿದೆ.
ಶೋಘಿಯ ಇತಿಹಾಸವು, 19 ನೇ ಶತಮಾನದಷ್ಟು ಹಿಂದಿನ ಆಂಗ್ಲೋ ಗೂರ್ಖಾ ಯುದ್ಧದ ಕಾಲದಿಂದಲೂ ಬೆಳೆದು ಬಂದಿದೆ. 15 ನೇ ಮೇ 1815 ರಂದು, ಗೂರ್ಖಾಗಳು ಮಲೌನ್ ಯುದ್ಧದಲ್ಲಿ ಚೀಫ್ಟನ್ ಗಳಿಂದ ಸೋಲು ಎದುರಿಸಬೇಕಾಯಿತು. ಈ ಸೋಲಿನ ಪರಿಣಾಮವಾಗಿ ಗೂರ್ಖಾಗಳ ಆಡಳಿತದಲ್ಲಿದ್ದ ಪ್ರದೇಶಗಳು ಅವುಗಳ ಮೂಲ ಆಡಳಿತಗಾರರು ಹಿಂತಿರುಗಿಸುವಂತಹ ಕರಾರುಳ್ಳ, ಸಂಜೌಲಿ ಒಪ್ಪಂದಕ್ಕೆ ಬ್ರಿಟಿಷ್ ಮತ್ತು ಚೀಫ್ಟನ್ ಗಳು ಒಗ್ಗೂಡಿ ಗೂರ್ಖಾಗಳಿಂದ ಬಲವಂತವಾಗಿ ಸಹಿಹಾಕಿಸಿಕೊಂಡರು. ತದನಂತರ, ಶಿಮ್ಲಾ ಸೇರಿದಂತೆ ಇಡೀ ಪ್ರದೇಶವನ್ನು, ತಮಗೆ ನೀಡಿದ ಸೇವೆಗಳ ಪ್ರತಿಯಾಗಿ ಬ್ರಿಟಿಷರು ಪಟಿಯಾಲದ ಮಹಾರಾಜನಿಗೆ ಕೊಡುಗೆಯಾಗಿ ನೀಡಿದರು.
ಹಲವಾರು ಪುರಾತನ ದೇವಾಲಯಗಳ ನೆಲೆಯೂ ಆಗಿದ್ದರಿಂದ ಶೋಘಿಯನ್ನು ದೇವಸ್ಥಾನಗಳ ನಗರಿ ಎಂತಲೂ ಕರೆಯುವುದುಂಟು. ಇತ್ತೀಚೆಗೆ ನವೀಕರಿಸಲ್ಪಟ್ಟ ಹನುಮಾನ್ ದೇವಾಲಯ, ಕಾಳಿ ದೇವಾಲಯ ಮತ್ತು ತಾರಾ ದೇವಿ ದೇವಾಲಯಗಳು ಸ್ಥಳೀಯ ಜನಪ್ರಿಯ ಧಾರ್ಮಿಕ ಕೇಂದ್ರಗಳಾಗಿವೆ. ಶೋಘಿಗೆ ಭೇಟಿ ನೀಡುವ ಪ್ರವಾಸಿಗರು ಇದರ ಹತ್ತಿರದಲ್ಲೇ ಇರುವ, ಪುರಾತನ ದೇವಾಲಯಗಳಿಗೆ ಹೆಸರುವಾಸಿಯಾಗಿರುವ ಝಾಕೂ ಬೆಟ್ಟಗಳಿಗೂ ಭೇಟಿ ನೀಡಬಹುದು.
ವಾಯು, ರೈಲು ಹಾಗು ರಸ್ತೆ ಈ ಮೂರೂ ಮಾರ್ಗಗಳಿಂದಲೂ ಶೋಘಿಯನ್ನು ಸುಲಭವಾಗಿ ತಲುಪಬಹುದಾಗಿದೆ. ಶೋಘಿಯ ಹತ್ತಿರದಲ್ಲಿರುವ ದೇಶೀ ವಿಮಾನ ನಿಲ್ದಾಣವೆಂದರೆ, 33 ಕಿಮೀ ದೂರದಲ್ಲಿ ಜುಬ್ಬರ್ಹಟ್ಟಿಯಲ್ಲಿರುವ ಶಿಮ್ಲಾ ವಿಮಾನನಿಲ್ದಾಣ ಹಾಗು ದೆಹಲಿಯ ಇಂದಿರಾ ಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವು (IGI) ಶೋಘಿಯ ಹತ್ತಿರದ ಅಂತಾರಾಷ್ಟ್ರೀಯ ವಾಯುನೆಲೆಯಾಗಿದೆ.
ಕಲ್ಕಾವು ಶೊಘಿಯ ಹತ್ತಿರದ ಪ್ರಮುಖ ರೈಲು ನಿಲ್ದಾಣವಾಗಿದ್ದು, ಇದು ಪ್ರಮುಖ ಭಾರತೀಯ ನಗರಗಳಿಗೆ ಒಳ್ಳೆಯ ಸಂಪರ್ಕ ಹೊಂದಿದೆ. ಪ್ರಸ್ತುತ, ಈ ಗಮ್ಯಸ್ಥಾನಕ್ಕೆ ಹಿಮಾಚಲ ಪ್ರದೇಶದ ಇತರ ನಗರಗಳಿಂದ ನಿರಂತರವಾಗಿ ಬಸ್ ಗಳು ಲಭ್ಯವಿವೆ.
ಶೋಘಿ ಪ್ರದೇಶವು ವರ್ಷವಿಡಿ ಆಹ್ಲಾದಕರ ಹವಾಗುಣವನ್ನು ಅನುಭವಿಸುತ್ತಿದ್ದು ಪ್ರಯಾಣಿಕರು ಯಾವ ಸಮಯದಲ್ಲಾದರೂ ಈ ಸ್ಥಳಕ್ಕೆ ಭೇಟಿ ನೀಡಬಹುದು.
