Click it and Unblock the Notifications
ನಾಗಾಲ್ಯಾಂಡ್ ಭಾರತದ ಇನ್ನೂ ಶೋಧಿತವಾಗದೆ ಉಳಿದ ಭಾಗಗಳಲ್ಲಿ ಒಂದು. ಇದು ತನ್ನ ಬೆಟ್ಟ, ಕಣಿವೆಗಳಲ್ಲಿ, ಭೂಪ್ರದೇಶಗಳಲ್ಲಿ ಹಲವು ವಿಶೇಷಗಳನ್ನು ಒಳಗೊಂಡಿದೆ. ನೀವು ಒಮ್ಮೆ ಇಲ್ಲಿಗೆ ಭೇಟಿ ನೀಡಿದರೆ ಮತ್ತೆ ಮತ್ತೆ ಭೇಟಿ ನೀಡಲು ಇಚ್ಛಿಸುವಿರಿ. ಇಲ್ಲಿ ಪ್ರಕೃತಿ ಸಂಸ್ಸೃತಿಗಳ ಅಪರೂಪದ ಸಂಗಮವನ್ನು ಕಾಣಬಹುದು. ಪೆಕ್ ನಾಗಾಲ್ಯಾಂಡಿನ ಆಗ್ನೇಯ ಭಾಗದಲ್ಲಿದೆ.
ಈ ಜಿಲ್ಲೆಯ ಪೂರ್ವಕ್ಕೆ ಮಾಯನ್ಮಾರ್, ದಕ್ಷಿಣಕ್ಕೆ ಮಣಿಪುರ, ಪಶ್ಚಿಮಕ್ಕೆ ಕೋಹಿಮ ಮತ್ತು ಉತ್ತರಕ್ಕೆ ಜುನ್ಹೆಬೊಟೋ ಮತ್ತು ತುಯೆನ್ಸ್ಯಾಂಗ್ ಜಿಲ್ಲೆಗಳಿವೆ. ಹಿಂದೆ ಪೆಕ್ ಕೋಹಿಮ ಜಿಲ್ಲೆಗೆ ಸೇರಿತ್ತು. ಇದು ಕೋಹಿಮಾ ನಗರದಿಂದ ೧೪೫ ಕಿ.ಮೀ ದೂರದಲ್ಲಿತ್ತು. ಪೆಕ್ ಎಂದರೆ ’ ನಿರೀಕ್ಷಣಾ ಗೋಪುರ’ ಎಂದರ್ಥ. ಈ ಪದವನ್ನು ’ಫೆಕ್ರೆಕೆಡ್ಜೆ’ ಎಂಬುದರಿಂದ ಪಡೆಯಲಾಗಿದೆ. ಇಲ್ಲಿನ ಮೂಲ ನಿವಾಸಿಗಳು ಚಖ್ಹೆಸಾಂಗ್ಸ್ ಮತ್ತು ಪೊಚೌರ್ಯಾಸ್. ಇಲ್ಲಿನ ಸ್ಥಳೀಯ ಭಾಷೆ ತೇನ್ಯಿಡೈ ಮತ್ತು ನಾಗಮೆಸೆ. ಕುತೂಹಲಕಾರಿ ವಿಷಯವೆಚಿದರೆ ಚಖ್ಹೆಸಾಂಗ್ಗಳೆಂದರೆ ಚೊಕ್ರಿ, ಖೇಜ ಮತ್ತು ಸಾಂಗ್ ಈ ಮೂರು ಬುಡಕಟ್ಟುಗಳ ಮಿಶ್ರಣ.
ನದೀ ತೀರದ ಸೌಂದರ್ಯ ಪ್ರವಾಸಿಗರ ಮನಸೂರೆಗೊಳ್ಳುತ್ತದೆ!
ಈ ಸುಂದರ ಜಿಲ್ಲೆಯಲ್ಲಿ ಮೂರು ಮುಖ್ಯನದಿಗಳಿವೆ_ ಟಿಜು, ಲಾನ್ಯೆ ಮತ್ತು ಸೆಡ್ಜು. ಇವಲ್ಲದೆ ಪ್ರವಾಸಿಗರನ್ನು ಸೆಳೆಯುವ ಮತ್ತೊಂದು ನೀರಿನ ಸೆಲೆಯೆಂದರೆ ಶಿಲ್ಲೋಯಿ, ಚಿಡಾ ಮತ್ತು ಡ್ಜುಡು ಸರೋವರಗಳು. ಪೆಕ್ ಇಲ್ಲಿನ ಕಣಿವೆಗಳಲ್ಲಿ ಕಂಡುಬರುವ ಅಪರೂಪದ ಆರ್ಕಿಡ್ಗಳಿಗೆ ಕೂಡ ಪ್ರಸಿದ್ಧವಾಗಿದೆ. ಇಲ್ಲಿ ಸಸ್ಯ ಮತ್ತು ಜೀವವೈವಿಧ್ಯವನ್ನು ಕೂಡ ಕಾಣಬಹುದು. ಇಲ್ಲಿ ಬ್ಲೈತ್ಸ್ ಟ್ರಾಗ್ಪಾನ್ ಎಂಬ ಪಕ್ಷಿ ಪ್ರಭೇದವನ್ನು ಕೂಡ ಕಾಣಬಹುದು. ಪೆಕ್ನಲ್ಲಿ ಆಚರಿಸಲಾಗುವ ಕೆಲವು ಹಬ್ಬಗಳು ಹೀಗಿವೆ: ಖುಥೊನ್ಯೆ, ಥುರಿನ್ಯೆ, ಟುರ್ಹಿನ್ಯೆ, ನ್ಗ್ಯುನ್ಯೆ, ಟುಖ್ಹುನ್ಯೆ ಮತ್ತು ಸುಖ್ಹ್ರುನ್ಯೆ.
ಹವಾಮಾನ
ಪೆಕ್ ವರ್ಷಪೂರ್ತಿ ಸಮಶೀತೋಷ್ಣ ಹವಾಮಾನವನ್ನು ಹೊಂದಿರುತ್ತದೆ. ಇಲ್ಲಿ ಹವಾಮಾನ ವೈಪರೀತ್ಯಗಳು ಕಂಡುಬರುವುದಿಲ್ಲ.
ಪ್ರವಾಸಕ್ಕೆ ಸೂಕ್ತ ಸಮಯ
ಬೇಸಿಗೆ ಕಾಲ ಪ್ರವಾಸಕ್ಕೆ ಸೂಕ್ತವಾದದ್ದು. ಈ ಸಮಯದಲ್ಲಿ ಹವಾಮಾನವು ಸಮಶೀತೋಷ್ಣತೆಯಿಂದಿರುತ್ತದೆಯಾದ್ದರಿಂದ ಪ್ರಕೃತಿ ಸೌಂದರ್ಯವನ್ನು ಸವಿಯಲು ಸುತ್ತಾಡಲು ಇದು ಸೂಕ್ತ ಸಮಯ. ಉಳಿದ ಕಾಲಗಳಲ್ಲಿ ಹವಾಮಾನವು ಸುತ್ತಾಟಕ್ಕೆ ಅನುಕೂಲಕರವಾಗಿರುವುದಿಲ್ಲ.
