ಚೆಟ್ಟಿನಾಡ್ ಅರಮನೆಯನ್ನು ಭಾರತದ ಏಳು ಅದ್ಭುತಗಳಲ್ಲಿ ಒಂದೆಂದು ಪರಿಗಣಿಸಲಾಗಿದೆ. ಈ ಅರಮನೆಯು ಕಲೆ, ವಾಸ್ತುಶಿಲ್ಪ ಮತ್ತು ಸಂಪ್ರದಾಯದ ಒಂದು ಅದ್ಭುತ ಸಂಗಮವೆಂದು ಬಣ್ಣಿಸಲಾಗಿದೆ. ಈ ಅರಮನೆಯನ್ನು ಡಾ|| ಅಣ್ಣಾಮಲೈ ಚೆಟ್ಟಿಯಾರ್ ರವರು ವಿನ್ಯಾಸಗೊಳಿಸಿ 1912 ರಲ್ಲಿ ನಿರ್ಮಿಸಿದರು. ಈ ಅರಮನೆಯು ಭಾರತದ ಇತಿಹಾಸದಲ್ಲಿ ಒಂದು ಪ್ರಮುಖ ರಚನೆಯಾಗಿದೆ. ಏಕೆಂದರೆ ಇದು ಆ ಕಾಲದ ತಂತ್ರಜ್ಞಾನದ ಒಂದು ಅದ್ಭುತ ಮಾದರಿಯಾಗಿ ಇಂದಿಗು ನಿಂತಿದ್ದು, ಆಸಕ್ತರಿಗೆ ಹಲವಾರು ಮಾಹಿತಿಗಳನ್ನು ಒದಗಿಸುತ್ತದೆ. ಚೆಟ್ಟಿನಾಡ್ ಅರಮನೆಯು ಚೆಟ್ಟಿನಾಡಿನ ಜನರ ಸಾಂಸ್ಕೃತಿಕ ಪರಂಪರೆಯ ಒಂದು ಶ್ರೇಷ್ಠ ಉದಾಹರಣೆಯಾಗಿದೆ.

ಈ ಅರಮನೆಯ ವಿನ್ಯಾಸ ಶೈಲಿಯು ಚೆಟ್ಟಿಯಾರರ ಆಯ್ಕೆಯಂತೆ ಸಾಂಪ್ರದಾಯಿಕ ಶೈಲಿಯನ್ನು ಹೊಂದಿದೆ. ಈ ಅರಮನೆಯ ನಿರ್ಮಾಣದಲ್ಲಿ ಬಳಸಲಾದ ಕಚ್ಚಾ ವಸ್ತುಗಳು, ಅಲಂಕಾರಿಕ ವಸ್ತುಗಳು, ಪೀಠೋಪಕರಣಗಳು ಮತ್ತು ಮೆತ್ತೆಗಳಲ್ಲಿ ಪೂರ್ವ ಏಶಿಯಾ ಮತ್ತು ಯೂರೋಪಿಯನ್ ದೇಶಗಳ ಪ್ರಭಾವವು ಎದ್ದು ಕಾಣುತ್ತದೆ. ಏಕೆಂದರೆ ಈ ವಸ್ತುಗಳನ್ನೆಲ್ಲ ಈ ದೇಶಗಳಿಂದ ಆಮದು ಮಾಡಿಕೊಂಡು ಬಳಸಲಾಗಿದೆ. ಇವುಗಳ ಜೊತೆಗೆ ಶಾಂಡೇಲಿಯರ್, ಅಮೃತಶಿಲೆ, ಕನ್ನಡಿಗಳು, ನೆಲಹಾಸುಗಳು ಮತ್ತು ಸ್ಫಟಿಕಗಳನ್ನು ಸಹ ಆಮದು ಮಾಡಿಕೊಂಡು ಈ ಅರಮನೆಯಲ್ಲಿ ಬಳಸಿಕೊಳ್ಳಲಾಗಿದೆ. ಇವೆಲ್ಲದರ ನಡುವೆಯು ಈ ಅರಮನೆಯು ಕಲೆ ಮತ್ತು ಶೈಲಿಯಲ್ಲಿ ತನಗೆ ತಾನೇ ಸರಿಸಾಟಿಯೆಂಬಂತೆ ನಿಂತಿದೆ.