Click it and Unblock the Notifications
ವೈನಾಡು ಜಿಲ್ಲೆಯ ಅತ್ಯಂತ ಪ್ರಸಿದ್ಧ ಹಾಗೂ ಆಕರ್ಷಕ ಜಲಪಾತಗಳಲ್ಲಿ ಮೀನುಮುಟ್ಟಾ ಜಲಪಾತವೂ ಒಂದು. ಕೇರಳದ ಎರಡನೇ ಅತಿದೊಡ್ಡ ಜಲಪಾತ ಎನಿಸಿಕೊಂಡಿದೆ. ಈ ಜಲಪಾತದ ಹೆಸರಿನ ಹಿಂದೊಂದು ಅರ್ಥವಿದೆ. ಅದೇನೆಂದರೆ 'ಮೀನುಗಳನ್ನು ತಡೆ ಹಿಡಿದಿರುವ ತಾಣ'. ಮಲಯಾಳಂನಲ್ಲಿ ಇದನ್ನು ಮೀನುಮುಟ್ಟಾ ಅನ್ನಲಾಗುತ್ತದೆ. ಕೆಲ ನೈಸರ್ಗಿಕ ಕಾರಣದಿಂದ ಇದರಿಂದ ಮುಂದೆ ಮೀನುಗಳು ಈಜಿ ತಲುಪಲಾರವು. ಜಲಪಾತವು ಮೇಲಿಂದ ಮೂರು ಭಾಗವಾಗಿ ವಿಭಾಗದೊಂಡು 300 ಅಡಿ ಆಳಕ್ಕೆ ಬೀಳುತ್ತದೆ. ಇದರಿಂದಲೇ ಈ ಜಲಪಾತ ಅತ್ಯಂತ ಜನಪ್ರಿಯವಾಗಿದೆ.
ಕಲ್ಪೆಟ್ಟಾದಿಂದ ಈ ಜಲಪಾತ 29 ಕಿ.ಮೀ. ದೂರದಲ್ಲಿದೆ. ಊಟಿ ತೆರಳುವ ಹೆದ್ದಾರಿಯಲ್ಲಿ ಸಾಗುವಾಗ ಇದು ಸಿಗುತ್ತದೆ. ಮುಖ್ಯರಸ್ತೆಯಿಂದ 2 ಕಿ.ಮೀ. ಕಾಡಿನ ದಾರಿಯಲ್ಲಿ ಒಳಗೆ ತೆರಳಬೇಕು. ಜಲಪಾತದ ರಮಣೀಯ ನೋಟ ಈ ಎರಡು ಕಿ.ಮೀ. ಅಂತರದ ಪ್ರಯಾಣದ ಸುಸ್ತನ್ನು ಮರೆಸಿ ಬಿಡುತ್ತದೆ. ಜಲಪಾತ ತಲುಪಲು ಗೈಡ್ಗಳ ಸಹಕಾರ ಅತಿ ಮುಖ್ಯ. ಇವರಿಲ್ಲದೇ ತೆರಳುವುದು ಅಪಾಯಕಾರಿ. ತೆರಳುವ ಮಾರ್ಗದಲ್ಲಿ ಗುಹೆಗಳು ಕಾಣಸಿಗುತ್ತವೆ. ಇವೆಲ್ಲವೂ ಪುರಾತನ ಕಾಲದ ಗುಹೆಗಳಾಗಿದ್ದು, ಪರಿಣಿತರು ಇದರ ಬಗ್ಗೆ ವಿವರಣೆಯನ್ನು ನೀಡಿದಾಗಲೇ ಅರ್ಥವಾಗಲು ಸಾಧ್ಯ.
