ಗೋವಾದ ರಾಜಧಾನಿಯಾದ ಪಣಜಿಯ ಉಪನಗರ ಇಲ್ಲವೆ ವಿಸ್ತೃತ ಭಾಗವೇ ಡೊನಾ ಪೌಲಾ. ಇಲ್ಲಿಗೂ ಕೂಡ ದೇಶೀಯ ಹಾಗು ವಿದೇಶೀಯ ಯಾತ್ರಿಕರು ಬರುತ್ತಲೆ ಇರುತ್ತಾರೆ. ಇಲ್ಲಿಯ ಜನಜೀವನವು ನಗರಕೇಂದ್ರಕ್ಕಿಂತ ಆರಾಮದಾಯಕವಾಗಿದ್ದು ವಿಮಾನ ನಿಲ್ದಾಣದಿಂದ ಕೇವಲ 23 ಕಿ.ಮೀ ದೂರದಲ್ಲಿದೆ.ಈ ಪ್ರದೇಶವು ಉತ್ತರ ಹಾಗು ದಕ್ಷಿಣ ಗೋವಾಕ್ಕೆ ಸಮಾನ ಅಂತರದಲ್ಲಿದ್ದು ಅಂದರೆ ಇವೆರಡರ ಕೇಂದ್ರ ಭಾಗದಲ್ಲಿರುವುದರಿಂದ ನೀವೇನಾದರು ಇಲ್ಲಿ ತಂಗಿದ್ದರೆ ನಿಮಗೆ ಇಲ್ಲಿಂದ ಯಾವುದೇ ಭಾಗಕ್ಕೆ ಹೋಗಲು ಅಷ್ಟೊಂದು ಕಷ್ಟವಾಗುವುದಿಲ್ಲ.

ಅಂದಿನ ಪೋರ್ಚುಗೀಸರ ಆಡಳಿತದಲ್ಲಿ 'ವೈಸರಾಯ್'ನ ಮಗಳಾದ ಡೊನಾ ಪೌಲಾ ಡಿ ಮೆನೆಜಸಳಿಂದ ಇದಕ್ಕೆ ಈ ಹೆಸರು ಬಂದಿದೆ. ದಂತಕಥೆಯ ಪ್ರಕಾರ ಅವಳೊಬ್ಬ ಸ್ಥಳೀಯ ಮೀನುಗಾರನ ಜೊತೆ ಮದುವೆಯಾಗಲು ಇಚ್ಛೆ ವ್ಯಕ್ತಪಡಿಸಿದ್ದಳು. ಇದಕ್ಕೆ ಅನುಮತಿ ದೊರೆಯದಿದ್ದಾಗ, ಬೇಸರಗೊಂಡು ಇಲ್ಲಿನ ಗುಡ್ಡದ ತುದಿಯಿಂದ ಹಾರಿ ತನ್ನ ಪ್ರಾಣ ತೆತ್ತಳು. ಈಗಲೂ ಕೂಡ ಡೊನಾ ಪೌಲಾ ಬೀಚಿನ ಹತ್ತಿರದಲ್ಲಿರುವ ಆ ಗುಡ್ಡದ ತುದಿಯನ್ನು ಪ್ರೇಮಿಗಳ ಸ್ವರ್ಗವೆಂದೇ ಕರೆಯಲಾಗುತ್ತದೆ. ಪಣಜಿಯಿಂದ ಇದು 7 ಕಿ.ಮೀ ದೂರದಲ್ಲಿದೆ.ಡೊನಾ ಪೌಲಾ ಬೀಚನಲ್ಲೂ ಕೂಡ ಜಲಕ್ರೀಡೆಗಳ ಸೌಲಭ್ಯವಿದ್ದು, ಸಾಲುಸಾಲಾಗಿರುವ ಶಾಪಿಂಗ್ ಮಳಿಗೆಗಳನ್ನೂ ಕಾಣಬಹುದಾಗಿದೆ.ಇಲ್ಲಿಗೆ ತಲುಪಲು ಕ್ಯಾಬ ಹಾಗು ಬಸ್ಸುಗಳು ಲಭ್ಯವಿದ್ದು, ಇಷ್ಟವಿದ್ದಲ್ಲಿ ಸ್ವಂತವಾಗಿಯೂ ಕೂಡ ಡ್ರೈವ್ ಮಾಡಬಹುದು.