ಮಲ್ಲೂರು ಗ್ರಾಮದಲ್ಲಿದೆ ಮಾನವ ದೇಹದಂತೆ ಮೃದು, ಎದೆಯ ಮೇಲೆ ಕೂದಲು ಹೊಂದಿರುವ ನರಸಿಂಹ ಸ್ವಾಮಿಯ ವಿಗ್ರಹ

ಭಾರತವು ಅನೇಕ ದೇವಾಲಯಗಳು ಮತ್ತು ಪವಾಡಗಳಿಗೆ ಹೆಸರುವಾಸಿಯಾದ ದೇಶವಾಗಿದೆ. ಇಲ್ಲಿ ಲೆಕ್ಕವಿಲ್ಲದಷ್ಟು ಹಿಂದೂ ದೇವಾಲಯಗಳಿವೆ. ವಿಶೇಷವಾಗಿ ತೆಲಂಗಾಣ ರಾಜ್ಯವು ಇಂತಹ ಅನೇಕ ಮಹತ್ವದ ದೇವಾಲಯಗಳನ್ನು ಹೊಂದಿದೆ. ಈ ದೇವಾಲಯಗಳಲ್ಲಿ ಮಲ್ಲೂರು ಶ್ರೀ ನರಸಿಂಹ ಸ್ವಾಮಿ ದೇವಾಲಯವು ಸಾಕಷ್ಟು ಜನಪ್ರಿಯತೆ ಗಳಿಸಿದೆ. ಮಲ್ಲೂರು ನರಸಿಂಹ ಸ್ವಾಮಿ ದೇವಾಲಯವು ತೆಲಂಗಾಣದ ವಾರಂಗಲ್ ಜಿಲ್ಲೆಯ ಮಲ್ಲೂರು ಗ್ರಾಮದಲ್ಲಿದೆ. ದೇವಾಲಯವನ್ನು ಹೇಮಾಚಲ ನರಸಿಂಹಸ್ವಾಮಿ ದೇವಾಲಯ ಎಂದೂ ಕರೆಯಲಾಗುತ್ತದೆ.

ಈ ದೇವಾಲಯವು ಹಲವಾರು ವೈಶಿಷ್ಟ್ಯಗಳನ್ನು ಹೊಂದಿದ್ದು, ಹಲವು ರಹಸ್ಯಗಳು ಅಡಗಿವೆ. ನವ ನರಸಿಂಹ ಕ್ಷೇತ್ರಗಳಲ್ಲಿ ಪ್ರಸಿದ್ಧವಾದದ್ದು ಮಲ್ಲೂರು ಹೇಮಾಚಲ ಲಕ್ಷ್ಮೀ ನರಸಿಂಹ ಸ್ವಾಮಿ ಕ್ಷೇತ್ರ. ದೇವಾಲಯದ ಇತಿಹಾಸವನ್ನು ಗಮನಿಸಿದರೆ, ಆರನೇ ಶತಮಾನಕ್ಕಿಂತ ಮೊದಲು ಈ ದೇವಾಲಯವನ್ನು ಸ್ಥಾಪಿಸಿದರು ಎಂದು ಹೇಳಲಾಗುತ್ತದೆ.

ವಿಗ್ರಹದ ವಿಶೇಷತೆ

ಇಲ್ಲಿ ನರಸಿಂಹಸ್ವಾಮಿಯ ವಿಗ್ರಹವು ಮಾನವ ದೇಹದಷ್ಟೇ ಮೃದುವಾಗಿದೆ. ಇದಲ್ಲದೆ, ನರಸಿಂಹನ ಪ್ರತಿಮೆಯು ಹಣೆಯ ಮೇಲೆ ಕೂದಲನ್ನು ಹೊಂದಿದೆ. ನಾವು ತೋರು ಬೆರಳಿನಿಂದ ವಿಗ್ರಹದ ಎದೆಯನ್ನು ಸ್ಪರ್ಶಿಸಿದರೆ, ಅದು ದೇಹದಂತೆ ನಿಧಾನವಾಗಿ ಒಳಗೆ ಹೋಗುತ್ತದೆ. ಸ್ವಾಮಿಗೆ ಮನುಷ್ಯರಂತೆ ಬೆವರು ಬರುತ್ತದೆ. ನರಸಿಂಹ ಸ್ವಾಮಿಯ ಹೊಕ್ಕುಳಕ್ಕೆ ಗಾಯವಾಗಿದ್ದು, ಅದರಿಂದ ಸದಾ ದ್ರವ ಒಸರುತ್ತಿತ್ತು. ಆದರೆ ಪುರೋಹಿತರು ದ್ರವವನ್ನು ಕಟ್ಟಲು ಶ್ರೀಗಂಧವನ್ನು ಅಲ್ಲಿ ಹಾಕಿದರು. ಈ ಶ್ರೀಗಂಧವನ್ನು ಪ್ರತಿ ಶನಿವಾರ, ಭಾನುವಾರ ಮತ್ತು ಸೋಮವಾರದಂದು ಭಕ್ತರಿಗೆ ಪ್ರಸಾದವಾಗಿ ನೀಡಲಾಗುತ್ತದೆ. ಸಂತಾನಹೀನತೆಯಿಂದ ಬಳಲುತ್ತಿರುವವರಿಗೆ ಈ ಶ್ರೀಗಂಧವು ಮಕ್ಕಳ ಭಾಗ್ಯ ತರುತ್ತದೆ ಎಂದು ಭಕ್ತರು ಆಳವಾಗಿ ನಂಬುತ್ತಾರೆ.

ಪಾದದಿಂದ ಸದಾ ಹರಿಯುವ ನೀರು

ಸ್ವಾಮಿಯ ಪಾದದಿಂದ ನೀರು ಸದಾ ಹರಿಯುತ್ತಿರುತ್ತದೆ. ಇದನ್ನು ಚಿಂತಾಮಣಿ ಜಲಧಾರ ಎಂದು ಕರೆಯಲಾಗುತ್ತದೆ. ಔಷಧೀಯ ಗುಣವುಳ್ಳ ಈ ತಣ್ಣನೆಯ ನೀರನ್ನು ಕುಡಿದವರಿಗೆ ಹಲವಾರು ರೋಗಗಳಿಂದ ಮುಕ್ತಿ ಸಿಗುತ್ತದೆ ಎಂಬ ನಂಬಿಕೆ ಇದೆ. ನೀರು ಎಲ್ಲಾ ಋತುಗಳಲ್ಲಿ ನಿರಂತರವಾಗಿ ಹರಿಯುತ್ತದೆ. ರುದ್ರಮದೇವಿಯು ಒಮ್ಮೆ ತೀವ್ರ ಅನಾರೋಗ್ಯದಿಂದ ಬಳಲುತ್ತಿದ್ದಳು. ಆಗ ಚಿಂತಾಮಣಿ ಜಲಧಾರೆಯ ನೀರನ್ನು ಕುಡಿದು ನಂತರ ಅವಳು ತನ್ನ ಕಾಯಿಲೆಯಿಂದ ಮುಕ್ತಳಾಗಿದ್ದಳು ಎಂದು ಇನ್ನೂ ಅನೇಕರು ಹೇಳುತ್ತಾರೆ. ಮೇಲಾಗಿ ಹೊರ ದೇಶಗಳಲ್ಲಿರುವ ತಮ್ಮ ಜನರಿಗೆ ಚಿಂತಾಮಣಿ ನೀರನ್ನು ಕಳುಹಿಸುತ್ತಾರೆ. ಮಲ್ಲೂರು ದೇವಸ್ಥಾನದ ಸುತ್ತಲಿನ ಅರಣ್ಯ ಪ್ರದೇಶದಲ್ಲಿ ಔಷಧೀಯ ಸಸ್ಯಗಳ ವನವನ್ನು ಬೆಳೆಸಲಾಗುತ್ತಿದೆ. ಪ್ರಕೃತಿಯ ಸೊಬಗು ಮತ್ತು ಹಲವು ವೈಶಿಷ್ಟ್ಯಗಳೊಂದಿಗೆ ಕೂಡಿರುವ ಮಲ್ಲೂರು ದೇವಸ್ಥಾನಕ್ಕೆ ನಿಮ್ಮ ಜೀವನದಲ್ಲಿ ಒಮ್ಮೆಯಾದರೂ ಭೇಟಿ ನೀಡಿ.

ಬೆಟ್ಟದ ಮೇಲಿರುವ ದೇವಾಲಯ

ದೇವಾಲಯವು ಈ ಪ್ರದೇಶದ ಅತ್ಯಂತ ಪ್ರತಿಷ್ಠಿತ ಮತ್ತು ಪ್ರಸಿದ್ಧ ದೇವಾಲಯಗಳಲ್ಲಿ ಒಂದಾಗಿದೆ ಮತ್ತು ಭಾರತದಾದ್ಯಂತ ಪ್ರವಾಸಿಗರನ್ನು ಆಕರ್ಷಿಸುತ್ತದೆ. ಭಗವಾನ್ ವಿಷ್ಣುವಿನ ಅವತಾರವಾದ ನರಸಿಂಹ ದೇವರಿಗೆ ಸಮರ್ಪಿತವಾಗಿರುವ ಈ ದೇವಾಲಯವು ಸುಂದರವಾದ ಶಿಲ್ಪಕಲೆಗಳಿಗೆ ಹೆಸರುವಾಸಿಯಾಗಿದೆ. ದೇವಾಲಯವನ್ನು ಬೆಟ್ಟದ ಮೇಲೆ ನಿರ್ಮಿಸಲಾಗಿದೆ, ಆದ್ದರಿಂದ ಪ್ರವಾಸಿಗರು ಮುಖ್ಯ ದೇವಾಲಯವನ್ನು ತಲುಪಲು ಮೆಟ್ಟಿಲುಗಳನ್ನು ಹತ್ತಬೇಕಾಗುತ್ತದೆ. ಭಕ್ತರು ಸಹ ಇಲ್ಲಿ ಅತ್ಯಂತ ಗೌರವದಿಂದ ಮೆಟ್ಟಿಲುಗಳನ್ನು ಏರಿಕೊಂಡೇ ಹೋಗುತ್ತಾರೆ.

ಭೇಟಿ ನೀಡಲು ಉತ್ತಮ ಸಮಯ

ಈ ದೇವಾಲಯವು ಧಾರ್ಮಿಕ ಉತ್ಸವಗಳು ಮತ್ತು ಜಾತ್ರೆಗಳಿಗೂ ಹೆಸರುವಾಸಿಯಾಗಿದೆ. ವಾರ್ಷಿಕ ಬ್ರಹ್ಮೋತ್ಸವದ ಉತ್ಸವದಲ್ಲಿ, ದೇವತೆಗಳನ್ನು ಭವ್ಯವಾದ ಮೆರವಣಿಗೆಯಲ್ಲಿ ಕರೆದೊಯ್ಯಲಾಗುತ್ತದೆ. ಈ ಉತ್ಸವವನ್ನು ಕಣ್ತುಂಬಿಕೊಳ್ಳಲು ರಾಜ್ಯದ ವಿವಿಧೆಡೆಯಿಂದ ಭಕ್ತರು ಆಗಮಿಸಿ ಪೂಜೆ ಸಲ್ಲಿಸುತ್ತಾರೆ. ದೇವಾಲಯವು ಭಕ್ತರಿಗಾಗಿ ಬೆಳಗ್ಗೆ 6:00 ರಿಂದ ಮಧ್ಯಾಹ್ನ 1:00 ಮತ್ತು ಸಂಜೆ 4:00 ರಿಂದ ರಾತ್ರಿ 8:00 ರವರೆಗೆ ತೆರೆದಿರುತ್ತದೆ. ಈ ದೇವಾಲಯಕ್ಕೆ ಭೇಟಿ ನೀಡಲು ಉತ್ತಮ ಸಮಯವೆಂದರೆ ನರಸಿಂಹ ಜಯಂತಿಯ ಸಮಯದಲ್ಲಿ, ಇದನ್ನು ಸಾಮಾನ್ಯವಾಗಿ ಏಪ್ರಿಲ್ ತಿಂಗಳಲ್ಲಿ ಆಚರಿಸಲಾಗುತ್ತದೆ.

ದೇವಸ್ಥಾನವನ್ನು ತಲುಪುವುದು ಹೇಗೆ?

ವಿಮಾನದ ಮೂಲಕ : ದೇವಸ್ಥಾನಕ್ಕೆ ಹತ್ತಿರದ ವಿಮಾನ ನಿಲ್ದಾಣವೆಂದರೆ ಹೈದರಾಬಾದ್‌ನಲ್ಲಿರುವ ರಾಜೀವ್ ಗಾಂಧಿ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ, ಸುಮಾರು 180 ಕಿಮೀ ದೂರದಲ್ಲಿದೆ. ವಿಮಾನ ನಿಲ್ದಾಣದಿಂದ ದೇವಸ್ಥಾನವನ್ನು ತಲುಪಲು ಟ್ಯಾಕ್ಸಿ ಅಥವಾ ಬಸ್ ಅನ್ನು ಬಾಡಿಗೆಗೆ ಪಡೆಯಬಹುದು.

ರೈಲುಮಾರ್ಗದ ಮೂಲಕ : ಮಲ್ಲೂರು ನರಸಿಂಹ ಸ್ವಾಮಿ ದೇವಸ್ಥಾನಕ್ಕೆ ಸಮೀಪದ ರೈಲು ನಿಲ್ದಾಣವೆಂದರೆ ಕಾಜಿಪೇಟ್ ರೈಲು ನಿಲ್ದಾಣ, ಇದು ಸುಮಾರು 22 ಕಿ.ಮೀ ದೂರದಲ್ಲಿದೆ. ರೈಲ್ವೆ ನಿಲ್ದಾಣದಿಂದ ದೇವಸ್ಥಾನವನ್ನು ತಲುಪಲು ಟ್ಯಾಕ್ಸಿ ಅಥವಾ ಬಸ್ ಮೂಲಕ ಬಾಡಿಗೆಗೆ ಪಡೆಯಬಹುದು.

ರಸ್ತೆಯ ಮೂಲಕ : ಈ ದೇವಾಲಯವು ವಾರಂಗಲ್-ಖಮ್ಮಂ ರಸ್ತೆಯಲ್ಲಿದೆ. ದೇವಸ್ಥಾನವನ್ನು ತಲುಪಲು ವಾರಂಗಲ್‌ನಿಂದ ಬಸ್ಸು ಅಥವಾ ಟ್ಯಾಕ್ಸಿಯನ್ನು ಬಾಡಿಗೆ ಪಡೆಯಬಹುದು.

ಹತ್ತಿರದ ವಸತಿ

ವಾರಂಗಲ್ ನಗರದಲ್ಲಿ ಅನೇಕ ಹೋಟೆಲ್‌ಗಳು ಮತ್ತು ಲಾಡ್ಜ್‌ಗಳು ಪ್ರವಾಸಿಗರಿಗೆ ಆರಾಮದಾಯಕ ಮತ್ತು ಕೈಗೆಟುಕುವ ವಸತಿ ಸೌಕರ್ಯವನ್ನು ಒದಗಿಸುತ್ತವೆ. ಕೆಲವು ಜನಪ್ರಿಯ ಹೋಟೆಲ್‌ಗಳು ದೇವಸ್ಥಾನದ ಸಮೀಪದಲ್ಲಿವೆ.