Click it and Unblock the Notifications
ತಮಿಳುನಾಡಿನ ತಿರುಪುರ್ ನಲ್ಲಿ ಕಾಣಬಹುದಾದ ಮತ್ತೊಂದು ಮುಖ್ಯ ದೇವಾಲಯವೆಂದರೆ ಸುಕ್ರೀಸ್ವರರ್ ದೇವಾಲಯ. ತಿರುಪುರ್ ನಲ್ಲಿ ಹರಿದಿರುವ ನೊಯ್ಯಲ್ ನದಿಯ ಉಪನದಿಯಾದ ನಲ್ಲಾರ್ ನದಿಯ ದಂಡೆಯ ಮೇಲೆ ನೆಲೆಸಿದೆ ಈ ದೇವಾಲಯ. ಈ ಪ್ರದೇಶವನ್ನು ಆಳುತ್ತಿದ್ದ ಪಾಂಡ್ಯರಿಂದ ಸುಮಾರು ಹತ್ತನೇಯ ಶತಮಾನದಲ್ಲಿ ಈ ದೇವಸ್ಥಾನದ ನಿರ್ಮಾಣವಾಗಿದ್ದರೂ, ಈ ದೇವಾಲಯದ ಸಂಕೀರ್ಣದಲ್ಲಿರುವ ಇತರೆ ಹಲವು ರಚನೆಗಳು ಚೋಳ ರಾಜರಿಂದ ನಿರ್ಮಿಸಲ್ಪಟ್ಟಿವೆ. ತಮಿಳು ದೇವಾಲಯಗಳ ವಾಸ್ತುಶೈಲಿಗೆ ಇದೊಂದು ಉತ್ತಮ ಉದಾಹರಣೆಯಾಗಿದೆ.
ಈ ದೇವಾಲಯ ಸಂಕೀರ್ಣವು ಎರಡು ಗೋಪುರಗಳನ್ನು ಹೊಂದಿದ್ದು, ಅದನ್ನು ವಿಮಾನಂ ಎಂದು ಕರೆಯಲಾಗಿದೆ. ಒಂದು ಗೋಪುರವು ಅಮ್ಮನವರಿಗೆ ಮುಡಿಪಾಗಿದ್ದರೆ, ಮತ್ತೊಂದು ಶಿವನಿಗೆ ಸಮರ್ಪಿತವಾಗಿದೆ. ಒಟ್ಟು ಐದು ಶಿವಲಿಂಗಗಳಿವೆ ಈ ದೇವಾಲಯದಲ್ಲಿ. ಈ ದೇವಾಲಯವನ್ನು ಹತ್ತನೇಯ ಶತಮಾನದಲ್ಲಿ ನಿರ್ಮಾಣ ಮಾಡಲಾಗಿದ್ದರೂ ಸಹ, ಇಲ್ಲಿ ದೊರೆತಿರುವ ಶಾಸನ(ಕೆತ್ತನೆ)ಗಳ ಪ್ರಕಾರ, ಐದನೇಯ ಶತಮಾನದಲ್ಲೇ ಬುಡಕಟ್ಟು ಜನರು ಇಲ್ಲಿ ಶಿವನನ್ನು ಆರಾಧಿಸುತ್ತಿದ್ದರು ಎನ್ನಲಾಗಿದೆ.
