Click it and Unblock the Notifications
ಸ್ವೀಟ್ ಫಾಲ್ಸ್ ಎಂಬುದು ಶಿಲ್ಲಾಂಗ್ ನ ಅತಿ ಮೊನಚಾದ ಮತ್ತು ಸುಂದರವಾದ ಜಲಪಾತವಾಗಿದೆ. ಸ್ಥಳೀಯವಾಗಿ ಇದನ್ನು ವೈಟ್ಡೆನ್ ಎಂದು ಕರೆಯುತ್ತಾರೆ. ಈ ಜಲಪಾತವು 96 ಮೀ. ಗಳಷ್ಟು ಎತ್ತರದಿಂದ, ಕೆಳಗಡೆ ಇರುವ ಕಪ್ಪು ಬಂಡೆಗಳ ಮೇಲೆ ಧುಮುಕುತ್ತದೆ ಮತ್ತು ವಿವಿಧ ಹಂತಗಳಲ್ಲಿ ಸಣ್ಣ ಸಣ್ಣ ಶಾಖೆಗಳಾಗಿ ವಿಭಜನೆಗೊಳ್ಳುತ್ತದೆ. ಮಳೆಗಾಲದಲ್ಲಂತೂ, ಜಲಪಾತವು ವೇಗವನ್ನು ಪಡೆದುಕೊಂಡು, ರಭಸವಾಗಿ, ಮೈದುಂಬಿ ಹರಿಯುತ್ತದೆ. ಆ ದೃಶ್ಯವು ಉಸಿರು ಬಿಗಿಹಿಡಿದು ನೋಡುವಂತಹ ರೋಮಾಂಚಕಾರಿ ನೋಟವಾಗಿರುತ್ತದೆ.
ಈ ಜಲಪಾತವು ತನ್ನ ಭವ್ಯತೆ, ಅಗಾಧತೆಯ ಕಾರಣದಿಂದ ತನ್ನ ಹೆಸರನ್ನು ಪಡೆದುಕೊಂಡಿದೆಯೇ ಹೊರತು, ಪ್ರಾಯಶಃ ನೀರಿನ ರುಚಿಗೆ ಸಂಬಂಧಿಸಿ ಅಲ್ಲ. ಮಳೆಗಾಲದಲ್ಲಿ ಬಂಡೆಗಳ ತುದಿಗಳು ಒದ್ದೆಯಾಗಿದ್ದು, ಜಾರುತ್ತವೆಯಾದ್ದರಿಂದ ಈ ಸಂದರ್ಭದಲ್ಲಿ ಜಲಪಾತವನ್ನು ವೀಕ್ಷಿಸುವಾಗ ಎಚ್ಚರದಿಂದಿರಬೇಕು.
ಶಿಲ್ಲಾಂಗ್ ನ ಹೊರವಲಯದ ಹ್ಯಾಪಿ ವ್ಯಾಲಿ ಎಂಬಲ್ಲಿ ಸ್ವೀಟ್ ಫಾಲ್ಸ್ ಇದ್ದು ಇಲ್ಲಿಗೆ ಸುಲಭವಾಗಿ ತಲುಪಬಹುದು. ಈ ಪ್ರವಾಸಿ ತಾಣವನ್ನು ತಲುಪಲು ಸ್ಥಳೀಯವಾಗಿ ಲಭ್ಯವಿರುವ ಟ್ಯಾಕ್ಸಿಗಳನ್ನು ಕಾದಿರಿಸಬಹುದು. ಸ್ಥಳೀಯರು ಇಲ್ಲಿಗೆ ನಿಯಮಿತವಾಗಿ ಭೇಟಿ ಕೊಟ್ಟು ಪ್ರಕೃತಿಯನ್ನು ಆಸ್ವಾದಿಸುತ್ತಾರೆ. ಇತ್ತೀಚೆಗೆ ಮೇಘಾಲಯದ ಪ್ರವಾಸೋದ್ಯಮ ಇಲಾಖೆಯು ಜಲಪಾತದ ಸುತ್ತಮುತ್ತಲ ಪ್ರದೇಶವನ್ನು ಸುಂದರವಾಗಿ ಅಭಿವೃದ್ಧಿಗೊಳಿಸಿದೆ ಮತ್ತು ಪ್ರವಾಸಿಗರು ಸುಲಭವಾಗಿ ತಲುಪುವಂತೆ ಮಾಡಿದೆ.
