ನಗರದ ಹೃದಯ ಭಾಗದಿಂದ 8 ಕಿ. ಮೀ. ದೂರದಲ್ಲಿರುವ ಎಲಿಫೆಂಟ್ ಜಲಪಾತವು ಅತಿ ಜನಪ್ರಿಯ ಪ್ರವಾಸಿ ತಾಣಗಳಲ್ಲೊಂದಾಗಿದೆ. ನಗರದಿಂದ ಜಲಪಾತದೆಡೆಗೆ ಪಯಣಿಸುವಾಗ, ಅತಿ ರಮಣೀಯವಾದ ರಸ್ತೆಯ ಮೂಲಕ ಸಾಗಬೇಕಾಗಿದ್ದು , ಮೇಘಾಲಯ ರಾಜ್ಯದ ಪ್ರಾಕೃತಿಕ ಸೌoದರ್ಯವನ್ನು ಸವಿಯಬಹುದು. ಜಲಪಾತದ ಸ್ಥಳೀಯ ಹೆಸರು ಕಾ ಕ್ಷೈದ್ ಲೈ ಪತೇಂಗ್ ಖೊಹಸೀವ್ (Ka Kshaid Lai Pateng Khohsiew) ಎಂದಾಗಿದ್ದು, ಇದರ ಭಾವಾರ್ಥವು ಮೂರು ಹಂತದ ಜಲಪಾತ ಎಂದಾಗಿದೆ. ಕಾರಣ ಈ ಜಲಪಾತವು ಮೂರು ಹಂತವನ್ನು ಹೊಂದಿದೆ. ಈ ಜಲಪಾತದ ಬಂಡೆಯೊಂದು ಆನೆಯನ್ನು ಹೋಲುವುದರಿಂದ, ಬ್ರಿಟಿಷರು ಈ ಜಲಪಾತವನ್ನು ಎಲಿಫೆಂಟ್ ಜಲಪಾತವೆಂದು ಹೆಸರಿಸಿದರು. ಈ ಬಂಡೆಯ ಒಂದು ಭಾಗವು 1897 ರಲ್ಲಿ ಈ ಪ್ರದೇಶದಲ್ಲಿ ಸಂಭವಿಸಿದ ವಿನಾಶಕಾರಿ ಭೂಕಂಪದ ಕಾರಣ ನಾಶಗೊಂಡಿದೆ. ಕಪ್ಪು ಬಂಡೆಗಳ ಮೇಲೆ ಹರಿಯುವ ಹಾಲಿನಂತಹ ನೀರು ಈ ಜಲಪಾತದ ವಿಶೇಷ.
ಎಲಿಫೆಂಟ್ ಜಲಪಾತ ಪ್ರದೇಶವು ಜೀವ ವೈವಿಧ್ಯಕ್ಕೆ ಸಾಕ್ಷೀಭೂತವಾಗಿದ್ದು, ವಿವಿಧ ಪ್ರಭೇಧಕ್ಕೆ ಸೇರಿರುವ ಸಸ್ಯ ಸಂಕುಲಗಳು ಇಲ್ಲಿವೆ ಮತ್ತು ಕೆಲವು ಪ್ರಭೇಧಗಳು ಈ ಪ್ರದೇಶದಲ್ಲಿ ಮಾತ್ರವೇ ಕಂಡು ಬರುವಂತವು. ಈ ಪ್ರಾಂತದಲ್ಲಿ ಸ್ಥಳೀಯ ಮಹಿಳೆಯರಿಂದ ನಡೆಸಲ್ಪಡುವ ಅನೇಕ ಅಂಗಡಿಗಳಿದ್ದು, ಇವರು ಇಲ್ಲಿ, ಆ ರಾಜ್ಯದ ಮತ್ತು ಸ್ಥಳೀಯವಾದ ಅನೇಕ ಸುಂದರ, ನಾಜೂಕಾದ ಕರಕುಶಲ ವಸ್ತುಗಳ್ಳನ್ನು ಮಾರುತ್ತಾರೆ. ಓರ್ವ ಪ್ರವಾಸಿಗರಾಗಿ, ನೀವು ಇಲ್ಲಿನ ಸ್ಥಳೀಯ ಉಡುಪನ್ನು ಧರಿಸಿ ಒಂದು ಛಾಯಾಚಿತ್ರವನ್ನು ತೆಗೆಸಲೇ ಬೇಕು. ಜಲಪಾತ ಸುತ್ತಲೂ ಇರುವ ಬಂಡೆಗಳನ್ನೇರಲು ಚಾರಣಿಗರಿಗೆ ಇದು ಮಹೋನ್ನತ ಸ್ಥಳವಾಗಿದೆ.