Click it and Unblock the Notifications
ಸಂಕೂ ಎಂಬುದು ಜಮ್ಮು ಕಾಶ್ಮೀರದ ಒಂದು ನಗರವಾಗಿದ್ದು, ಕಾರ್ಗಿಲ್ ನಗರದಿಂದ 42 ಕಿ.ಮೀ ದೂರದಲ್ಲಿ ನೆಲೆಗೊಂಡಿದೆ. ಇದು ಪ್ರಕೃತಿಯ ರಮ್ಯ ವಾತಾವರಣದ ನಡುವೆ ನೆಲೆಸಿದ್ದು, ವಿಹಾರಕ್ಕೆ ಬರುವವರಿಗೆ ಹೇಳಿ ಮಾಡಿಸಿದ ತಾಣವಾಗಿದೆ. ಈ ನಗರವು ಬಟ್ಟಲಿನಾಕಾರದ ಒಂದು ಕಣಿವೆಯಲ್ಲಿ ನೆಲೆಗೊಂಡಿದೆ. ಈ ಕಣಿವೆಯಲ್ಲಿ ಸುರು ಎಂಬ ಪ್ರಮುಖ ನದಿಯ ಉಪನದಿಗಳಾದ ನಕ್ಪೊಚು ಮತ್ತು ಕರ್ಟ್ಸೆಗಳು ಹರಿಯುತ್ತವೆ.
ಈ ಸ್ಥಳವು ಇಲ್ಲಿರುವ ಕರ್ಪೊ-ಖಾರ್ ಸಮಾಧಿಯ ಕಾರಣವಾಗಿ ಪ್ರವಾಸಿಗರ ವಲಯದಲ್ಲಿ ಭಾರೀ ಜನಪ್ರಿಯತೆಯನ್ನು ಪಡೆದಿದೆ. ಈ ಸಮಾಧಿಯನ್ನು ಸಯದ್ ಮೀರ್ ಹಶೀಮ್ರವರಿಗಾಗಿ ನಿರ್ಮಿಸಲಾಗಿದೆ. ಇವರು ಒಬ್ಬ ಇಸ್ಲಾಮಿಕ್ ಸಂತ ಮತ್ತು ವಿದ್ವಾಂಸರಾಗಿದ್ದರು. ಇವರು 16ನೇ ಶತಮಾನದಲ್ಲಿ ಇಸ್ಲಾಮಿನ ಭೋದನೆಯನ್ನು ನೀಡಲು ಬೌದ್ಧ ರಾಜನಾದ ಥಿ-ನಂಗ್ಯಾಲ್ರವರನ್ನು ಕರೆದರಂತೆ. ಇವರಿಂದ ಪ್ರಭಾವಿತನಾದ ಥಿ-ನಂಗ್ಯಾಲ್ ತಾನು ಬೌದ್ಧ ಧರ್ಮದಿಂದ ಇಸ್ಲಾಂ ಧರ್ಮಕ್ಕೆ ಮತಾಂತರ ಹೊಂದಿದನಂತೆ. ಯಾತ್ರಾರ್ಥಿಗಳು ಕರ್ಪೊ-ಖಾರ್ ಸಮಾಧಿಗೆ ಭೇಟಿಕೊಟ್ಟು ಸಂತರಿಗೆ ಪ್ರಾರ್ಥನೆಗಳನ್ನು ಸಲ್ಲಿಸುತ್ತಾರೆ.
ಸಂಕೂಗೆ ಹೋದಾಗ ಪ್ರವಾಸಿಗರು ಈ ನಗರಕ್ಕೆ ಸಮೀಪದಲ್ಲಿರುವ ಕಾಡಿನಲ್ಲಿ ಸುತ್ತಾಡಬಹುದು. ಪ್ರವಾಸಿಗರು ಇಲ್ಲಿ ದೇವದಾರು ಮತ್ತು ವಿಲ್ಲೋ ಮರಗಳ ಜೊತೆಗೆ ವಿವಿಧ ಬಗೆಯ ಮರಗಳನ್ನು ಕಾಣಬಹುದು. ಈ ಸ್ಥಳವು ವಾರಂತ್ಯವನ್ನು ಕಳೆಯಲು ಹೇಳಿ ಮಾಡಿಸಿದ ತಾಣವಾಗಿದೆ.
ಪ್ರವಾಸಿಗರು ಸಂಕೂಗೆ ವಿಮಾನ, ರೈಲು ಮತ್ತು ರಸ್ತೆ ಮಾರ್ಗವಾಗಿ ಸುಲಭವಾಗಿ ತಲುಪಬಹುದು. ಲೇಹ್ ವಿಮಾನ ನಿಲ್ದಾಣ ಮತ್ತು ಶ್ರೀ ನಗರ್ ವಿಮಾನ ನಿಲ್ದಾಣಗಳು ಇಲ್ಲಿಗೆ ಸಮೀಪದ ವಿಮಾನ ನಿಲ್ದಾಣಗಳಾಗಿವೆ. ಇವುಗಳು ಔರಂಗಬಾದ್, ಜಮ್ಮು, ದೆಹಲಿ, ಬೆಂಗಳೂರು ಮತ್ತು ಪುಣೆ ವಿಮಾನ ನಿಲ್ದಾಣಗಳ ಜೊತೆಗೆ ಉತ್ತಮ ಸಂಪರ್ಕವನ್ನು ಹೊಂದಿವೆ. ಪ್ರವಾಸಿಗರು ಈ ವಿಮಾನ ನಿಲ್ದಾಣಗಳಿಂದ ಟ್ಯಾಕ್ಸಿ ಅಥವಾ ಬಸ್ಸಿನ ಮೂಲಕ ಸಂಕೂವನ್ನು ತಲುಪಬಹುದು.
ಸಂಕೂಗೆ ರೈಲಿನಲ್ಲಿ ತಲುಪಲು ಇಚ್ಛಿಸುವ ಪ್ರವಾಸಿಗರು ಜಮ್ಮುವಿನ ತಾವಿ ರೈಲು ನಿಲ್ದಾಣದವರೆಗೆ ರೈಲಿನಲ್ಲಿ ಬರಬಹುದು. ಇದು ಸಂಕೂಗೆ ಸಮೀಪದ ರೈಲು ನಿಲ್ದಾಣವಾಗಿದೆ. ಈ ನಿಲ್ದಾಣವು ನವದೆಹಲಿ, ಬೆಂಗಳೂರು, ತ್ರಿವೇಂಡ್ರಂ ಮತ್ತು ಚೆನ್ನೈನಂತಹ ಸ್ಥಳಗಳ ಜೊತೆಗೆ ಉತ್ತಮ ರೈಲು ಸಂಪರ್ಕವನ್ನು ಹೊಂದಿದೆ. ಲೇಹ್ ಮತ್ತು ಕಾರ್ಗಿಲ್ನಿಂದ ಹಾಗು ಸುರು ಕಣಿವೆಯ ಕೆಲವು ಪ್ರಾಂತ್ಯಗಳಿಂದ ಸಹ ಸಂಕೂಗೆ ದೈನಂದಿನ ಬಸ್ಸುಗಳ ಸೌಲಭ್ಯವಿದೆ.
ಸಂಕೂ ಪ್ರಾಂತ್ಯದಲ್ಲಿ ವರ್ಷ ಪೂರ್ತಿ ವಿಪರೀತವೆನ್ನುವಂತಹ ಹವಾಮಾನವಿರುತ್ತದೆ. ಇಲ್ಲಿ ಬೇಸಿಗೆಯಲ್ಲಿ ಸುಡುವ ಬಿಸಿಲು ಮತ್ತು ಚಳಿಗಾಲದಲ್ಲಿ ಹೆಪ್ಪುಗಟ್ಟುವಷ್ಟು ಚಳಿಯಿರುತ್ತದೆ. ಆದರೆ ಏಪ್ರಿಲ್ನಿಂದ ಸೆಪ್ಟೆಂಬರ್ ನಡುವಿನ ಅವಧಿಯು ಇಲ್ಲಿ ಆಹ್ಲಾದಕರವಾದ ಉಷ್ಣಾಂಶವಿರುತ್ತದೆ. ಈ ಅವಧಿಯು ಸಂಕೂಗೆ ಭೇಟಿಕೊಡಲು ಹೇಳಿ ಮಾಡಿಸಿದ ಸಮಯವಾಗಿದೆ.
