Click it and Unblock the Notifications
ಹುಂಡ್ರು ಜಲಪಾತವು ರಾಂಚಿಯಿಂದ 45 ಕಿ.ಮೀ ದೂರದಲ್ಲಿ ನೆಲೆಗೊಂಡಿದೆ. ಈ ಸುಂದರವಾದ ಜಲಪಾತವು ರಾಂಚಿ ಪುರುಲಿಯ ಹೆದ್ದಾರಿಯಲ್ಲಿ ನೆಲೆಗೊಂಡಿದೆ. ಪರಿಶುಭ್ರವಾದ ಸ್ವರ್ಣ ರೇಖಾ ನದಿಯು 320 ಅಡಿ ಎತ್ತರದಿಂದ ಧುಮ್ಮಿಕ್ಕುವುದನ್ನು ಇಲ್ಲಿ ನೋಡಬಹುದು. ಈ ಜಲಪಾತದ ತಳವು ಸಹ ಅತ್ಯಂತ ಸ್ವಚ್ಛವಾಗಿದೆ. ಇಲ್ಲಿನ ತಳದಲ್ಲಿ ಒಂದು ಕೊಳವಿದ್ದು, ಪ್ರವಾಸಿಗರು ಇಲ್ಲಿ ಒಂದು ಚೇತೋಹಾರಿಯಾದ ಸ್ನಾನವನ್ನು ಮಾಡಬಹುದು.
ಈ ಸ್ಥಳವು ಈ ರಾಜ್ಯದ ಅತ್ಯಂತ ಪ್ರಸಿದ್ಧ ಚಾರಣ ಕೇಂದ್ರವಾಗಿ ಗುರುತಿಸಲ್ಪಟ್ಟಿದೆ. ಹಾಗಾಗಿ ಸಾಹಸ ಮನೋಭಾವದವರು ಹುಂಡ್ರು ಜಲಪಾತಕ್ಕೆ ನಿಯಮಿತವಾಗಿ ಭೇಟಿ ಕೊಡುತ್ತಿರುತ್ತಾರೆ. ಮಳೆಗಾಲದಲ್ಲಿ ಈ ಜಲಪಾತವು ರುದ್ರ ರಮಣೀಯವಾಗಿ ಧುಮ್ಮಿಕ್ಕುತ್ತದೆ. ಆದರೆ ಬೇಸಿಗೆಯಲ್ಲಿ ಈ ತಾಣವು ಮುದ ನೀಡುವ ವಿಹಾರ ತಾಣವಾಗಿರುತ್ತದೆ. ಬ್ರಿಟೀಷ್ ಆಡಳಿತಾವಧಿಯಲ್ಲಿ " ಗೆಝೆಟಿಯರ್ ಆಫ್ ಇಂಡಿಯಾ" ರಚಿಸಿದ ಲೇಖಕನು ಈ ಸ್ಥಳವನ್ನು ಬಹುವಾಗಿ ಕೊಂಡಾಡಿದ್ದಾನೆ. ಅವನ ಪ್ರಕಾರ ಪಾಶ್ಚಿಮಾತ್ಯರು ಈ ಕುಗ್ರಾಮದಲ್ಲಿ ಇರುವ ಜಲಪಾತಕ್ಕೆ ತಪ್ಪದೇ ಭೇಟಿ ಕೊಡಬೇಕು ಎಂದು ಸೂಚಿಸಿದ್ದಾನೆ.
