ಗಿರಿಡೀಹ್ ನ ತುಂಡಿ ರಸ್ತೆಯಲ್ಲಿ ಸಾಗುವಾಗ ಉಸ್ರಿ ಜಲಪಾತಕ್ಕೆ ಭೇಟಿ ನೀಡಬಹುದಾಗಿದೆ. ಪಟ್ಟಣದ ಪಶ್ಚಿಮಕ್ಕೆ ಸುಮಾರು 13 ಕಿ.ಮೀ ದೂರದಲ್ಲಿ ಈ ಜಲಪಾತ ಕೇಂದ್ರವಿದೆ. ಈ ತಾಣ ಪಟ್ಟಣದ ಜನತೆ ಹಾಗು ಪ್ರವಾಸಿಗರಿಗೆ ಒಂದು ಹೇಳಿಮಾಡಿಸಿದ ಪಿಕ್ನಿಕ್ ಸ್ಥಳವಾಗಿ ಜನಪ್ರಿಯವಾಗಿದೆ. ಇಲ್ಲಿ ಹರಿದಿರುವ ನದಿಯು ಮೂರು ಭಾಗಗಳಲ್ಲಿ ವಿಂಗಡಣೆಗೊಳ್ಳುತ್ತ 40 ಅಡಿ ಆಳಕ್ಕೆ ಬೀಳುವುದರ ಮೂಲಕ ಈ ಸುಂದರ ಜಲಪಾತ ಸೃಷ್ಟಿಯಾಗಿದೆ. ಈ ಜಲಪಾತ ತಾಣವು ಪಾರ್ಸನಾಥ್ ದಟ್ಟ ಅರಣ್ಯದಿಂದು ಸುತ್ತುವರೆದಿದ್ದು, ಭೋರ್ಗೆರೆಯುತ್ತ ಹರಿಯುತ್ತಿರುವ ನದಿಯ ದೃಶ್ಯಾವಳಿಗಳಿಂದ ನಯನ ಮನೋಹರವಾಗಿ ಗೋಚರಿಸುತ್ತದೆ.
ಇಲ್ಲಿಗೆ ತಲುಪಲು ಬಯಸಿದರೆ ಹತ್ತಿರದಲ್ಲಿರುವ ಗಿರಿಡೀಹ್ ರೈಲು ನಿಲ್ದಾಣಕ್ಕೆ ಮೊದಲು ತಲುಪಬೇಕು. ಅಲ್ಲಿಂದ ನಿಮಗಿಷ್ಟವಾದ ಟಾಂಗಾ ಅಥವಾ ರಿಕ್ಷಾಗಳ ಮೂಲಕ ಈ ತಾಣಕ್ಕೆ ತೆರಳಬಹುದು. ಇನ್ನು ಬಸ್ ನಿಲ್ದಾಣದಿಂದ ಕೂಡ ಅನೇಕ ಬಸ್ಸುಗಳು ಪ್ರವಾಸಿಗರನ್ನು ಇಲ್ಲಿಗೆ ತಲುಪಿಸಲು ಸದಾ ಸನ್ನದ್ಧವಾಗಿರುತ್ತವೆ. ಪ್ರಸ್ತುತ ರಾಜ್ಯ ಸರ್ಕಾರವು, ಉಸ್ರಿ ಜಲಪಾತ, ಖೊಂಡೋಲಿ ಡ್ಯಾಮ್ ಮತ್ತು ಪಾರ್ಸನಾಥ್ ಕಾಡು ಈ ಮೂರೂ ತಾಣಗಳನ್ನು ಇನ್ನಷ್ಟು ಜನಪ್ರಿಯಗೊಳಿಸಲು ಕ್ರಮ ಕೈಗೊಂಡಿದೆ.