ಮವ್‍ಸ್ಮೈ ಜಲಪಾತವು ಮೇಘಾಲಯದ ಅತ್ಯಂತ ನಯನ ಮನೋಹರವಾದ ಜಲಪಾತವಾಗಿದೆ. ಇದು ಚಿರಾಪುಂಜಿಗೆ ಹೋಗುವ ಹಾದಿಯಲ್ಲಿ, ಮವ್‍ಸ್ಮೈ ಗ್ರಾಮಕ್ಕೆ ಸಮೀಪದಲ್ಲಿ ನೆಲೆಗೊಂಡಿದೆ. ಮವ್‍ಸ್ಮೈ ಜಲಪಾತವು ನೊಹ್ಸಿಂಗಿತಿಯಾಂಗ್ ಜಲಪಾತವೆಂದು ಸಹ ಕರೆಯಲ್ಪಡುತ್ತದೆ. 315 ಮೀಟರ್ ಎತ್ತರದಿಂದ ಧುಮ್ಮಿಕ್ಕುವ ಈ ಜಲಪಾತವು ಭಾರತದ ನಾಲ್ಕನೆಯ ಎತ್ತರವಾದ ಜಲಪಾತವಾಗಿದೆ. ಈ ಜಲಪಾತವು " ಸೆವೆನ್ ಸಿಸ್ಟರ್ ಫಾಲ್ಸ್" ಎಂದೆ ಜನಜನಿತವಾಗಿದೆ. ಏಕೆಂದರೆ ಇಲ್ಲಿ ಏಳು ಚಿಕ್ಕ ಚಿಕ್ಕ ಜಲಪಾತಗಳು ಸುಣ್ಣದ ಕಲ್ಲಿನಿಂದ ಕೂಡಿದ ಬೆಟ್ಟದ ತುದಿಯಿಂದ ಕೆಳಗೆ ಧುಮ್ಮಿಕ್ಕುತ್ತವೆ.

ಬಿಸಿಲಿನಿಂದ ಕೂಡಿದ ಮಳೆ ರಹಿತ ದಿನಗಳಲ್ಲಿ ಈ ಜಲಪಾತವು ನೋಡುಗರ ಕಣ್ಣಿಗೆ ಆನಂದವನ್ನುಂಟು ಮಾಡುತ್ತದೆ. ಆಗ ಇಲ್ಲಿ ಧುಮ್ಮಿಕ್ಕುವ ನೀರು ತನ್ನ ವಿರುದ್ಧ ದಿಕ್ಕಿನಲ್ಲಿ ಬಣ್ಣ ಬಣ್ಣದ ಚಿತ್ತಾರವನ್ನು ಮೂಡಿಸುತ್ತದೆ. ಹಾಗೆಂದು ಮಳೆ ಬೀಳುವಾಗ ಈ ಜಲಪಾತವು ಸುಂದರವಾಗಿ ಕಾಣುವುದಿಲ್ಲ ಎಂದು ಭಾವಿಸಬೇಡಿ. ಆಗ ಜಲಪಾತದ ಬಳಿಯಲ್ಲಿ ಅಥವಾ ನಿಮ್ಮ ಕಾಲ ಅಡಿಯಲ್ಲಿಯೇ ಮೋಡಗಳು ಹಾದು ಹೋಗುವ ಸೋಜಿಗವನ್ನು ನೀವು ಇಲ್ಲಿ ನೋಡಬಹುದು. ಶಿಲ್ಲಾಂಗ್‍ನಿಂದ ಬಸ್ ಅಥವಾ ಕ್ಯಾಬ್ ಮಾಡಿಕೊಂಡು ಬರುವುದು ಇಲ್ಲಿಗೆ ತಲುಪಲು ಅತ್ಯುತ್ತಮ ಮಾರ್ಗವಾಗಿದೆ.