ಐ. ಜಿ. ಪಾರ್ಕ್ ಅಥವಾ ಇಂದಿರಾ ಗಾಂಧಿ ಪಾರ್ಕ್ ತನ್ನದೇ ಆದ ಸೌಂದರ್ಯದಿಂದ ಎಲ್ಲರನ್ನು ಆಕರ್ಷಿಸುತ್ತಿದೆ. ಸುಮಾರು 10.60 ಎಕರೆಯಷ್ಟು ವಿಸ್ತೀರ್ಣವನ್ನು ಹೊಂದಿರುವ ಈ ಉದ್ಯಾನವನವು ಪ್ರವಾಸಿಗರ ವಲಯದಲ್ಲಿ ಭಾರೀ ಹೆಸರುವಾಸಿಯಾಗಿರುವ ಸ್ಥಳವಾಗಿದೆ. ಇದು ಭುಬನೇಶ್ವರದಲ್ಲಿರುವ ಎ.ಜಿ ಚೌಕದಲ್ಲಿ ನೆಲೆಗೊಂಡಿದೆ. ಈ ಉದ್ಯಾನವನದ ಹಿಂದೆ ರಾಜ್ಯದ ವಿಧಾನ ಸಭೆ ಕಟ್ಟಡವು ನೆಲೆಗೊಂಡಿದೆ.

ಹಿಂದೆ ಈ ಸ್ಥಳದಲ್ಲಿ ಪೆರೇಡ್‍ಗಳನ್ನು ನಡೆಸಲಾಗುತ್ತಿತ್ತು. ನಂತರ ಇದನ್ನು ಉದ್ಯಾನವನವನ್ನಾಗಿ ಪರಿವರ್ತಿಸಿ, ಸಾರ್ವಜನಿಕರಿಗಾಗಿ ಅರ್ಪಿಸಲಾಯಿತು. ಈ ಉದ್ಯಾನವನವು ಐತಿಹಾಸಿಕ ಹಿನ್ನಲೆಯನ್ನು ಹೊಂದಿದೆ. ನಮ್ಮ ಮಾಜಿ ಪ್ರಧಾನಿಯಾದ ಶ್ರೀಮತಿ. ಇಂದಿರಾಗಾಂಧಿಯವರು 1984 ಸೆಪ್ಟೆಂಬರ್ 30 ರಂದು ಇಲ್ಲಿ ಬಹಿರಂಗ ಸಾರ್ವಜನಿಕ ಭಾಷಣವನ್ನು ಮಾಡಿದ್ದರು. ಮುಂದೆ ಇದೇ ಅವರ ಕಡೆಯ ಭಾಷಣವಾಯಿತು. ಈ ಉದ್ಯಾನವನದ ಒಳಗೆ ಇಂದಿರಾಗಾಂಧಿಯವರ ವಿಗ್ರಹವನ್ನು ನಾವು ನೋಡಬಹುದು. ಈ ಉದ್ಯಾನವನದ ಸೊಬಗನ್ನು ಸವಿಯಲು ಪ್ರವಾಸಿಗರು ವರ್ಷದ ಯಾವುದೇ ಭಾಗದಲ್ಲಿ ಬೇಕಾದರು ಇಲ್ಲಿಗೆ ಆಗಮಿಸಬಹುದು.