ಲಿಂಗರಾಜ ದೇವಸ್ಥಾನವು ಭುಬನೇಶ್ವರದಲ್ಲಿರುವ ಅತಿ ದೊಡ್ಡ ದೇವಾಲಯವಾಗಿದೆ. ಅನೇಕ ಕಾರಣಗಳಿಗಾಗಿ ಈ ದೇವಳವು ಮಹತ್ವವನ್ನು ಪಡೆದಿದೆ. ಇದು ನಗರದ ಅತಿ ಪುರಾತನ ದೇವಾಲಯಗಳಲ್ಲೊಂದು. ಇದು ಸುಮಾರು 10 ನೆಯ ಅಥವಾ 11 ನೆಯ ಶತಮಾನದಲ್ಲಿ ಕಟ್ಟಲ್ಪಟ್ಟಿತು. ಈ ದೇವಸ್ಥಾನವು ನಗರದ ಒಂದು ಹೆಗ್ಗುರುತಾಗಿದೆ. ಈ ದೇವಸ್ಥಾನವು ಭಗವಾನ್ ಶಿವನ ಒಂದು ರೂಪವಾದ ಹರಿಹರನಿಗೆ ಅರ್ಪಿತವಾಗಿದೆ. ಈ ಸುಂದರ ದೇವಸ್ಥಾನದ ವಾಸ್ತುಶಿಲ್ಪ, ಶಿಲ್ಪಕಲೆಯು ಯಾವುದೇ ಒಂದು ದೃಶ್ಯಕಾವ್ಯಕ್ಕೆ, ಮಹಾಕಾವ್ಯಕ್ಕೆ ಕಡಿಮೆಯೇನೂ ಇಲ್ಲ. ಇದು ಭಾರತ ದೇಶದಲ್ಲಿರುವ ಅತ್ಯಂತ ಮನೋಹರವಾದ ಹಿಂದೂ ದೇವಾಲಯಗಳಲ್ಲಿ ಒಂದಾಗಿದೆ.
ಈ ದೇವಸ್ಥಾನದ ಎತ್ತರವು 55 ಮೀ. ಗಳಷ್ಟಿದ್ದು ಲಿಂಗರಾಜ ದೇವಸ್ಥಾನದ ಪ್ರತಿಯೊಂದು ಇಂಚೂ ಸಹ ಸವಿಸ್ತಾರವಾದ, ಕುಂದಿಲ್ಲದ, ಪರಿಪೂರ್ಣ ಕೆತ್ತನೆಗಳನ್ನು ಹೊಂದಿದೆ. ಈ ದೇವಸ್ಥಾನವು ಕೆಲವು ಕಟ್ಟುನಿಟ್ಟಾದ ಸಂಪ್ರದಾಯಗಳನ್ನು ಅನುಸರಿಸುತ್ತದೆ. ಹಿಂದೂ ಧರ್ಮಗಳಲ್ಲದವರು (ಅನ್ಯಧರ್ಮೀಯರು) ಈ ದೇವಳವನ್ನು ಪ್ರವೇಶಿಸುವಂತಿಲ್ಲ. ಆದರೂ ಕೂಡ ದೇವಸ್ಥಾನದ ಒಂದು ಗೋಡೆಯ ಪಕ್ಕದಲ್ಲಿ ಎತ್ತರವಾದ ವೇದಿಕೆಯನ್ನು ನಿರ್ಮಿಸಲಾಗಿದ್ದು, ಅನ್ಯಧರ್ಮೀಯರು ಅಲ್ಲಿಂದಲೇ ದೇವಸ್ಥಾನವನ್ನು ನೋಡಬಹುದಾಗಿದೆ. ದೇವಸ್ಥಾನವು ವರ್ಷದುದ್ದಕ್ಕೂ ಯಾತ್ರಾರ್ಥಿಗಳು ಮತ್ತು ಪ್ರವಾಸಿಗರನ್ನು ಆಕರ್ಷಿಸುತ್ತದೆ.