Click it and Unblock the Notifications
ತುರಾ ಶೃಂಗವು ಮೇಘಾಲಯದ ಪಶ್ಚಿಮ ಗರೊ ಬೆಟ್ಟಗಳಲ್ಲಿರುವ ಟುರು ಪರ್ವತ ಶ್ರೇಣಿಗಳಲ್ಲಿನ ಅತ್ಯಂತ ಪ್ರಸಿದ್ಧವಾದ ಶೃಂಗವಾಗಿದೆ. ಈ ಅದ್ಭುತವಾದ ಶೃಂಗವು ಸಮುದ್ರ ಮಟ್ಟದಿಂದ 872 ಮೀಟರ್ ಎತ್ತರದಲ್ಲಿ ನೆಲೆಗೊಂಡಿದೆ. ಇದನ್ನು ನೊಕ್ರೆಕ್ ರಾಷ್ಟ್ರೀಯ ಉದ್ಯಾನವನದವರು ನಿರ್ವಹಿಸಿಕೊಂಡು ಬರುತ್ತಿದ್ದಾರೆ.
ದಂತ ಕಥೆಗಳ ಪ್ರಕಾರ ಈ ಶೃಂಗವು ಒಂದಾನೊಂದು ಕಾಲದಲ್ಲಿ ಡುರ ಎಂದು ಕರೆಯಲ್ಪಡುತ್ತಿದ್ದ, ದೇವತೆಗಳ ನಿವಾಸವಾಗಿತ್ತಂತೆ. ಬ್ರಿಟೀಷರು ಈ ಹೆಸರನ್ನು ಟುರ ಎಂದು ತಪ್ಪಾಗಿ ಗ್ರಹಿಸಿದರು. ಮುಂದೆ ಇದೇ ಹೆಸರೇ ಚಾಲ್ತಿಗೆ ಬಂತು. ಈ ಶೃಂಗದ ಮೇಲಿನಿಂದ ಪ್ರವಾಸಿಗರು ಬ್ರಹ್ಮ ಪುತ್ರ ನದಿಯ ಕಣಿವೆಗಳನ್ನು ಮತ್ತು ಬಾಂಗ್ಲಾದೇಶ್ ಭೂಭಾಗವನ್ನು ಸಹ ನೋಡಬಹುದು. ಈ ಶೃಂಗದ ಮೇಲೆ ಒಂದು ಪ್ರವಾಸಿ ಮಂದಿರ, ವೀಕ್ಷಣಾಲಯ ಮತ್ತು ಸಿಂಕೋನ ತೋಟಗಳನ್ನು ನಾವು ಕಾಣಬಹುದು. ಇದಲ್ಲದೆ ಈ ಪರ್ವತದ ಬುಡದಿಂದ ತುದಿಯವರೆಗೆ ಒಂದು ಕಾಲು ಹಾದಿಯಿದ್ದು, ಚಾರಣಿಗರಿಗೆ ಮತ್ತು ಪರ್ವತಾರೋಹಿಗಳಿಗೆ ರೋಮಾಂಚನವನ್ನುಂಟು ಮಾಡುತ್ತದೆ.
ಇಲ್ಲಿಗೆ ತಲುಪಲು ಶಿಲ್ಲಾಂಗ್ನಿಂದ ಪ್ರವಾಸಿ ಬಸ್ ಮೂಲಕ ಬರುವುದು ಉತ್ತಮ ಹಾಗು ಸುರಕ್ಷಿತವಾದ ಮಾರ್ಗವಾಗಿದೆ.
