ಈ ಕಲ್ಲೀಲ ಭಗವತಿ ದೇವಿಗೆ ಕಲ್ಲೆ ಗೋಪುರ!

ಭಗವತಿ

ಈ ಭಗವತಿ ದೇವಿಯು ಕರುಣಾಮಯಿ ದೇವಿ ಎಂದೆ ಪ್ರಸಿದ್ಧಳಾಗಿದ್ದಾಳೆ. ಕಲ್ಲೊಳಗಿರುವ ಈಕೆ ಕರುಣಾಮಯಿ ಆಗಿರುವುದಕ್ಕೂ ಕಾರಣ ಇಲ್ಲದಿಲ್ಲ. ಇಲ್ಲಿಗೆ ಭೇಟಿ ನೀಡುವ ಅಪಾರ ಸಂಖ್ಯೆಯ ಭಕ್ತರ ನಂಬಿಕೆಯಂತೆ ಈ ಭಗವತಿ ದೇವಿ ಬೇಡಿದ ಎಲ್ಲ ವರಗಳನ್ನು ಭಕ್ತರಿಗೆ ಅನುಗ್ರಹಿಸುತ್ತಾಳಂತೆ.

ಚಿತ್ರಕೃಪೆ: Ranjithsiji

ಬರಿಗೈಯಿಂದ ಮರಳಲಾರರು

ಈ ಭಗವತಿ ದೇವಿಯ ದರ್ಶನ ಪಡೆದು ಯಾರೆ ಆಗಲಿ ಬರಿಗೈಯಿಂದ ಮರಳಲು ಸಾಧ್ಯವೆ ಇಲ್ಲವೆಂದು ಹೇಳಲಾಗುತ್ತದೆ. ಹಾಗಾಗಿ ಈ ಶಕ್ತಿ ದೇವಿಯನ್ನು ಕರುಣಾಮಯಿ ಎಂದೆ ಜನರು ಕೊಂಡಾಡುತ್ತಾರೆ. ಇನ್ನೂ ಹೆಸರಿಗೆ ಸಂಬಂಧಿಸಿದಂತೆ ಈ ದೇವಿಯು ಅತಿ ಪ್ರಾಚೀನವಾದ ಬೃಹದಾಕಾರದ ಕಲ್ಲಿನಲ್ಲಿ ವಾಸವಾಗಿದ್ದಾಳೆ. ಅಂತೆಯೆ ಇವಳನ್ನು ಕಲ್ಲೀಲ ಭಗವತಿ ದೇವಿ ಎಂದು ಕರೆಯಲಾಗಿದೆ.

ಚಿತ್ರಕೃಪೆ: Ranjithsiji

ದಂತಕಥೆ

ಈ ಕ್ಷೇತ್ರಕ್ಕೆ ಸಂಬಂಧಿಸಿದ ದಂತಕಥೆಯಂತೆ, ಒಂದೊಮ್ಮೆ ಈ ಪ್ರದೇಶದಲ್ಲಿ ವಾಸಿಸುತ್ತಿದ್ದ ಬುಡಕಟ್ಟು ಜನಾಂಗದವರು ಕಾಡಿನಲ್ಲಿ ಅಲೆಯುತ್ತ ಒಣ ಕಟ್ಟಿಗೆ, ಹಣ್ಣು ಹಂಪಲಗಳನ್ನು ಹುಡುಕುತ್ತ ಜೀವನ ಸಾಗಿಸುತ್ತಿದ್ದರು. ಆದರೆ ಒಮ್ಮೆ ಬರಗಾಲದ ಸ್ಥಿತಿ ಎದುರಾಗಿ ಅವರಿಗೆ ತಿನ್ನಲು ಎನ್ನು ದಕ್ಕದಾಯಿತು.

ಚಿತ್ರಕೃಪೆ: Sreejith K

ಜೀವನ ನಿರ್ವಹಣೆ

ಯಾರ ಉಸಾಬರಿಗೂ ಹೋಗದ, ಕೇವಲ ತಮ್ಮ ಜೀವನ ನಿರ್ವಹಣೆಯನ್ನು ಸರಳವಾಗಿ ಮಾಡಿಕೊಂಡಿದ್ದ ಆ ಜನರು ಬರಗಾಲದಿಂದ ಬೇಸತ್ತು ತಮ್ಮ ದೇವರನ್ನು ಕುರಿತು ದಿನವೂ ಪ್ರಾರ್ಥಿಸುತ್ತಿದ್ದರು. ಅವರ ಕಷ್ಟ ಕಂಡು ಮರುಗಿದ ದೇವಿಯು ಅವರನ್ನು ಉದ್ಧರಿಸಲು ನಿರ್ಧರಿಸಿದಳು.

ಚಿತ್ರಕೃಪೆ: Dpradeepkumar

ಸ್ತ್ರೀ ಪ್ರತ್ಯಕ್ಷ

ಹೀಗೊಂದು ದಿನ ಆ ಬುಡಕಟ್ಟು ಜನರು ಎಂದಿನಂತೆ ಕಾಡಿನಲ್ಲಿ ಕಟ್ಟಿಗೆಗಳನ್ನು ಹುಡುಕುತ್ತ ಅಲೆಯುತ್ತಿದ್ದಾಗ ದೈವ ಕಾಂತಿ ಹೊಂದಿದ್ದ ಒಬ್ಬ ಸ್ತ್ರೀಯು ಬೃಹದಾಕಾರದ ಬಂಡೆಗಲೊಂದಿಗೆ ನಿರಾಯಾಸವಾಗಿ ಆಡುತ್ತಿರುವುದನ್ನು ಗಮನಿಸಿದರು.

ಚಿತ್ರಕೃಪೆ: Ranjithsiji

ಕಾಂತಿಯುಕ್ತ

ಆಕೆಯ ಮುಖವು ಬಲು ತೇಜಸ್ಸಿನಿಂದ ಕೂಡಿತ್ತು. ದೇಹವು ಪ್ರಭಾವಳಿಯಿಂದ ಸುತ್ತುವರೆದಿತ್ತು. ದೈತ್ಯ ಗಾತ್ರದ ಕಲ್ಲುಗಳನ್ನು ಮಕ್ಕಳು ಆಟಿಕೆ ಆಡುವಂತೆ ಅವುಗಳೊಂದಿಗೆ ಆಡುತ್ತಿದ್ದುದನ್ನು ಗಮನಿಸಿದ ಆ ಬುಡಕಟ್ಟು ಜನರು ದಿಗ್ಭ್ರಾಂತರಾಗಿ ಆಕೆಯ ಮುಂದೆ ಬಂದರು.

ಚಿತ್ರಕೃಪೆ: Ranjithsiji

ಛಾವಣಿ

ಹಾಗೆ ಆ ಬುಡಕಟ್ಟು ಜನರು ಮುಂದೆ ಬರುತ್ತಿದ್ದಂತೆಯೆ ಆ ಸ್ತ್ರೀಯು ಒಂದು ಹೆಬ್ಬಂಡೆಯನ್ನು ಛಾವಣಿಯನ್ನಾಗಿ ಮಾಡಿಕೊಂಡು ಇನ್ನೊಂದು ಬಂಡೆಯನ್ನು ತನ್ನ ಹಾಸಿಗೆಯನ್ನಾಗಿ ಮಾಡಿಕೊಂಡು ಅದರಲ್ಲಿ ಪ್ರವೇಶಿಸಿ ಬಿಟ್ಟಳು. ನಂತರ ಅವರಿಗೆ ತಾನು ಯಾರು ಎಂಬುದನ್ನು ಒಳಗಿನಿಂದಲೆ ಹೇಳಿ ಆಶೀರ್ವಾದಿಸಿದಳು.

ಚಿತ್ರಕೃಪೆ: Ranjithsiji

ಎಲ್ಲರಲ್ಲೂ ಸಂತಸ

ಆಕೆ ಹೇಳಿದ ಪ್ರಕಾರ ಆಕೆಯೆ ಭಗವತಿ ದೇವಿ ಎಂದೂ ಹಾಗೂ ಅವಳು ಆ ಜನರ ಸಕಲ ಕಷ್ಟಗಳನ್ನು ನಿವಾರಿಸಲು ಬಂದಿರುವುದಾಗಿ ತಿಳಿದುಬಂದಿತು. ಇದರಿಂದ ಸಂತಸಗೊಂಡ ಆ ಜನರು ಆಕೆಯನ್ನು ಆರಾಧಿಸುತ್ತ ಅಲ್ಲಿಯೆ ನಿವಾಸಿಸಬೇಕೆಂದು ಪ್ರಾರ್ಥಿಸಿಕೊಂಡರು.

ಚಿತ್ರಕೃಪೆ: Ranjithsiji

ಅಂದಿನಿಂದ ಪ್ರಸಿದ್ಧ

ಇದಕ್ಕೊಪ್ಪಿದ ಆ ಭಗವತಿ ದೇವಿಯು ತಾನು ಎಂದಿಗೂ ಇಲ್ಲಿಯೆ ವಾಸವಿರುವುದಾಗಿಯೂ, ತನ್ನನ್ನು ಅರಸಿಕೊಂಡು ಬರುವವರ ಸಕಲ ಕಷ್ಟ-ಕಾರ್ಪಣ್ಯಗಳನ್ನು ನಿವಾರಿಸುವುದಾಗಿಯೂ ಅಭಯ ನೀಡಿದಳು. ಅಂದಿನಿಂದೆ ಕಲ್ಲಿನ ಗುಹೆಯೊಳಗಿರುವ ಕಲ್ಲೀಲ ಭಗವತಿ ದೇವಿಯಾಗಿ ಪ್ರಸಿದ್ಧಳಾದಳು.

ಚಿತ್ರಕೃಪೆ: Ranjithsiji

ರಚನೆಗಳನ್ನು ನಿರ್ಮಿಸಲಾಗಿದೆ

ಹೌದು, ಇದೊಂದು ಬಂಡೆ ದೇವಾಲಯ. ಒಂದು ಬಂಡೆಯು ದೇವಿಯ ಗೋಪುರವಾಗಿಯೂ ಇನ್ನೊಂದು ಬಂಡೆಯು ಆಕೆ ನೆಲೆಸಿರುವ ಕಲ್ಲು ಹಾಸಿಗೆಯಾಗಿಯೂ ಕಾರ್ಯ ನಿರ್ವಹಿಸುತ್ತದೆ. ಕ್ರಮೇಣ ಇದಕ್ಕೆ ಹೊಂದಿಕೊಂಡಂತೆ ಕೆಲವು ರಚನೆಗಳನ್ನು ನಿರ್ಮಿಸಲಾಗಿದೆ.

ಚಿತ್ರಕೃಪೆ: Ranjithsiji

ಮೂರನೇಯ ಶತಮಾನ

ಇನ್ನೂ ಐತಿಹಾಸಿಕವಾಗಿ ಇಲ್ಲಿ ದೊರೆತಿರುವ ಕೆತ್ತನೆಗಳು ಹಾಗೂ ಇತಿಹಾಸಕಾರರ ಪ್ರಕಾರ ಹೇಳಬೇಕೆಂದರೆ ಇದು ಮೂರನೇಯ ಶತಮಾನಕ್ಕೆ ಸಂಬಂಧಿಸಿದ ಗುಹಾ ಬಂಡೆಯಾಗಿದೆ. ಜೈನ ಸನ್ಯಾಸಿಗಳು ಈ ಬಂಡೆಯ ರಚನೆಗಳನ್ನು ಆರಾಧಿಸುತ್ತಿದ್ದರೆಂದು ತಿಳಿದುಬರುತ್ತದೆ.

ಚಿತ್ರಕೃಪೆ: Ranjithsiji

ಜೈನ ತೀರ್ಥಂಕರರು

ಇದಕ್ಕೆ ಪೂರಕವೆಂಬಂತೆ ಇಲ್ಲಿನ ಬಂಡೆಗಳ ಮೇಲೆ ಕೆತ್ತಲಾಗಿರುವ ಜೈನ ಪವಿತ್ರ 24 ತೀರ್ಥಂಕರರ ರಚನೆಗಳನ್ನು ಕಾಣಬಹುದು. ಅಲ್ಲದೆ ಜೈನರು ಇಲ್ಲಿ ಮುಖ್ಯ ದೇವಿಯಾಗಿ ಪದ್ಮಾವತಿಯನ್ನು ಆರಾಧಿಸುತ್ತಿದ್ದರೆಂದು ತಿಳಿದುಬರುತ್ತದೆ.

ಚಿತ್ರಕೃಪೆ: Ranjithsiji

ಹಿಂದು ದೇವಾಲಯ

ಕಾಲಕ್ರಮೇಣ ಇಲ್ಲಿ ಜೈನ ಪ್ರಭಾವ ಕಡಿಮೆಯಾಗಿ ಇದು ಹಿಂದು ದೇವಾಲಯವಾಗಿ ಪರಿವರ್ತಿತವಾಯಿತೆನ್ನಲಾಗಿದೆ. ಪದ್ಮಾವತಿ ದೇವಿಯನ್ನೆ ಜನರು ಭಗವತಿ ದೇವಿಯನ್ನಾಗಿ ಆರಾಧಿಸತೊಡಗಿದರು ಎನ್ನುತ್ತಾರೆ ಇತಿಹಾಸಕಾರರು.

ಚಿತ್ರಕೃಪೆ: Ranjithsiji

ಇಬ್ಬರಿಗೂ ಪವಿತ್ರ

ಹಾಗಾಗಿ ಕೇರಳದ ಅತಿ ಪ್ರಾಚೀನ ಜೈನ ದೇವಾಲಯಗಳ ಪೈಕಿ ಕಲ್ಲೀಲ ದೇವಾಲಯವನ್ನೂ ಸಹ ಒಂದಾಗಿ ಗುರುತಿಸಲಾಗುತ್ತದೆ. ಸತ್ಯ ಏನೆ ಇರಲಿ ಇಂದಿಗೂ ಈ ಕ್ಷೇತ್ರಕ್ಕೆ ಜೈನರು ಹಾಗೂ ಹಿಂದುಗಳಿಬ್ಬರೂ ಸಹ ಭೇಟಿ ನೀಡುತ್ತಾರೆ ಹಾಗೂ ದೇವಿಯನ್ನು ಪ್ರಾರ್ಥಿಸುತ್ತಾರೆ.

ಚಿತ್ರಕೃಪೆ: Ranjithsiji

ಎರ್ನಾಕುಲಂ

ಈ ದೇವಾಲಯವು ಎರ್ನಾಕುಲಂ ಜಿಲ್ಲೆಯ ಪೆರುಂಬವೂರು ಎಂಬಲ್ಲಿದ್ದು ಕಾಲಡಿ ಕ್ಷೇತ್ರದಿಂದ 22 ಕಿ.ಮೀ ಹಾಗೂ ಎರ್ನಾಕುಲಂ ನಗರದಿಂದ 53 ಕಿ.ಮೀ ಗಳಷ್ಟು ದೂರವಿದೆ. ತೆರಳಲು ಬಸ್ಸುಗಳು ಹಾಗೂ ಬಾಡಿಗೆ ಕಾರುಗಳು ದೊರೆಯುತ್ತವೆ. ಈ ದೇವಾಲಯವು 22 ಎಕರೆಗಳಷ್ಟು ವಿಸ್ತಾರವಾದ ದಟ್ಟಾರಣ್ಯದ ಮಧ್ಯದಲ್ಲಿ ಸ್ಥಿತವಿರುವುದು ವಿಶೇಷ. ಹಾಗಾಗಿ ಸುತ್ತಲೂ ಅದ್ಭುತ ಪ್ರಾಕೃತಿಕ ಸೌಂದರ್ಯವನ್ನು ಅನುಭವಿಸಬಹುದು.

ಚಿತ್ರಕೃಪೆ: Challiyan