ಹಿಮಾಚಲ ಪ್ರದೇಶದಲ್ಲಿ ಭಾರಿ ಮಳೆ: ಪ್ರವಾಸಿಗರಿಗೆ ಆರೆಂಜ್ ಅಲರ್ಟ್, ಈ ರೂಟ್‌ನಲ್ಲಿ ಹೋಗ್ಬೇಡಿ!

ಹಿಮಾಚಲ ಪ್ರದೇಶದಲ್ಲಿ ಈ ವಾರ ಹವಾಮಾನದಲ್ಲಿ ಭಾರಿ ಏರುಪೇರಾಗುವ ಸಾಧ್ಯತೆಯಿದೆ. ಈ ಹಿನ್ನೆಲೆಯಲ್ಲಿ ಭಾರತೀಯ ಹವಾಮಾನ ಇಲಾಖೆ (IMD) ಇಂದು 'ಯೆಲ್ಲೋ ಅಲರ್ಟ್' ಘೋಷಿಸಿದೆ. ಅಷ್ಟೇ ಅಲ್ಲದೆ, ಜೂನ್ 18 ರಂದು ರಾಜ್ಯದ ಪ್ರಮುಖ ಜಿಲ್ಲೆಗಳಲ್ಲಿ 'ಆರೆಂಜ್ ಅಲರ್ಟ್' ಇರಲಿದೆ ಎಂದು ಎಚ್ಚರಿಸಿದೆ. ಶಿಮ್ಲಾ, ಮನಾಲಿ ಮತ್ತು ಧರ್ಮಶಾಲಾಗೆ ಭೇಟಿ ನೀಡುವ ಪ್ರವಾಸಿಗರು ಪ್ರಯಾಣದಲ್ಲಿ ವಿಳಂಬವಾಗುವ ಸಾಧ್ಯತೆ ಇರುವುದರಿಂದ ಮುನ್ನೆಚ್ಚರಿಕೆ ವಹಿಸುವುದು ಒಳಿತು. ಗುಡ್ಡಗಾಡು ಪ್ರದೇಶಗಳಲ್ಲಿ ಭಾರಿ ಮಳೆಯಿಂದಾಗಿ ಹಠಾತ್ ಭೂಕುಸಿತ ಸಂಭವಿಸುವ ಅಪಾಯ ಹೆಚ್ಚಿದೆ.

ವಿಶೇಷವಾಗಿ ಚಂಬಾ, ಕಾಂಗ್ರಾ, ಕುಲ್ಲು ಮತ್ತು ಮಂಡಿ ಜಿಲ್ಲೆಗಳಲ್ಲಿ ಆರೆಂಜ್ ಅಲರ್ಟ್ ಘೋಷಿಸಲಾಗಿದೆ. ಇನ್ನು ಗುರುವಾರ ಶಿಮ್ಲಾ, ಸೋಲನ್ ಮತ್ತು ಸಿರ್ಮೌರ್ ಜಿಲ್ಲೆಗಳಲ್ಲೂ ಭಾರಿ ಮಳೆಯಾಗುವ ಮುನ್ಸೂಚನೆ ಇದೆ. ಇಂತಹ ಹವಾಮಾನದ ಸಂದರ್ಭದಲ್ಲಿ ಮಂಡಿ-ಕುಲ್ಲು ರಾಷ್ಟ್ರೀಯ ಹೆದ್ದಾರಿಯಲ್ಲಿ ರಸ್ತೆ ಸಂಚಾರ ಸ್ಥಗಿತಗೊಳ್ಳುವುದು ಸಾಮಾನ್ಯ. ಹೀಗಾಗಿ, ಮಳೆ ಹೆಚ್ಚಿರುವ ಸಮಯದಲ್ಲಿ ಪ್ರಯಾಣಿಕರು ಔಟ್-ಬಂಜಾರ್-ಜಲೋರಿ ಪಾಸ್ ಮಾರ್ಗದಲ್ಲಿ ಸಂಚರಿಸುವುದನ್ನು ತಪ್ಪಿಸಬೇಕು. ಈ ರಸ್ತೆಗಳಲ್ಲಿ ಮೇಲಿಂದ ಕಲ್ಲುಗಳು ಮತ್ತು ಮಣ್ಣು ಕುಸಿಯುವ ಅಪಾಯ ಹೆಚ್ಚಿರುತ್ತದೆ.

ಹಿಮಾಚಲ ಹವಾಮಾನ ಅಲರ್ಟ್: ರಸ್ತೆ ಸುರಕ್ಷತೆಗಾಗಿ ಈ ಕ್ರಮಗಳನ್ನು ಪಾಲಿಸಿ

ಮಳೆಗಾಲ ಅಥವಾ ಮುಂಗಾರು ಪೂರ್ವ ಮಳೆಯ ಸಮಯದಲ್ಲಿ ರಾತ್ರಿ ವೇಳೆ ವಾಹನ ಚಾಲನೆ ಮಾಡುವುದು ಅತ್ಯಂತ ಅಪಾಯಕಾರಿ. ಸೂರ್ಯ ಮುಳುಗಿದ ನಂತರ ಧರ್ಮಶಾಲಾ-ಪಾಲಂಪುರ ರಸ್ತೆಯಲ್ಲಿ ದೃಷ್ಟಿ ಮಂದವಾಗುವ (Visibility) ಸಾಧ್ಯತೆ ಇರುತ್ತದೆ. ನದಿ ತೀರದ ತಗ್ಗು ಪ್ರದೇಶಗಳಲ್ಲಿ ಕ್ಷಣಾರ್ಧದಲ್ಲಿ ಪ್ರವಾಹ ಉಂಟಾಗಬಹುದು. ನಿಮ್ಮ ವಾಹನದ ಟೈರ್ ಮತ್ತು ಫಾಗ್ ಲೈಟ್‌ಗಳು ಸುಸ್ಥಿತಿಯಲ್ಲಿವೆಯೇ ಎಂದು ಖಚಿತಪಡಿಸಿಕೊಳ್ಳಿ. ರಸ್ತೆಗಳು ಬಂದ್ ಆಗುವ ಸಾಧ್ಯತೆ ಇರುವುದರಿಂದ ಯಾವಾಗಲೂ ಹೆಚ್ಚುವರಿ ಆಹಾರ ಮತ್ತು ನೀರನ್ನು ಜೊತೆಯಲ್ಲಿಟ್ಟುಕೊಳ್ಳಿ.

ಹವಾಮಾನ ವೈಪರೀತ್ಯದ ವೇಳೆ ಹೋಟೆಲ್ ಬುಕಿಂಗ್ ಬಗ್ಗೆ ಗಮನವಿರಲಿ

ಹವಾಮಾನ ವೈಪರೀತ್ಯದಿಂದಾಗಿ ನಿಮ್ಮ ಪ್ರಯಾಣ ಅರ್ಧಕ್ಕೆ ನಿಂತರೆ ತಕ್ಷಣ ಹೋಟೆಲ್ ಸಿಬ್ಬಂದಿಯನ್ನು ಸಂಪರ್ಕಿಸಿ. ಅಧಿಕೃತ ಹವಾಮಾನ ಅಲರ್ಟ್ ಇದ್ದಾಗ ಅನೇಕ ಹೋಟೆಲ್‌ಗಳು ಬುಕಿಂಗ್ ದಿನಾಂಕ ಬದಲಾವಣೆಗೆ ಅವಕಾಶ ನೀಡುತ್ತವೆ. ಬುಕಿಂಗ್ ಮಾಡುವಾಗ ನೈಸರ್ಗಿಕ ವಿಕೋಪದ ಸಂದರ್ಭದಲ್ಲಿ ಹಣ ಮರುಪಾವತಿ (Refund) ಮಾಡುವ ನಿಯಮಗಳಿವೆಯೇ ಎಂದು ಪರಿಶೀಲಿಸಿ. ಗುಡ್ಡಗಾಡು ರಸ್ತೆಗಳು ಬಂದ್ ಆಗಿದ್ದರೆ, ಉನಾ ಮತ್ತು ಬಿಲಾಸಪುರದಂತಹ ತಗ್ಗು ಪ್ರದೇಶದ ನಗರಗಳಲ್ಲಿ ತಂಗುವುದು ಸುರಕ್ಷಿತ.

ಸ್ಥಳೀಯ ಸುದ್ದಿ ಸಂಸ್ಥೆಗಳು ಮತ್ತು ರಾಜ್ಯ ಪೊಲೀಸರ ಅಧಿಕೃತ ಸಾಮಾಜಿಕ ಜಾಲತಾಣಗಳ ಮಾಹಿತಿಯನ್ನು ಗಮನಿಸುತ್ತಿರುವುದು ಬಹಳ ಮುಖ್ಯ. ಜೂನ್ ತಿಂಗಳಲ್ಲಿ ಹಿಮಾಲಯದ ಹವಾಮಾನ ಕ್ಷಣಕ್ಷಣಕ್ಕೂ ಬದಲಾಗುತ್ತದೆ. ಪ್ರವಾಸದ ವೇಳಾಪಟ್ಟಿಗಿಂತ ನಿಮ್ಮ ಸುರಕ್ಷತೆಗೆ ಮೊದಲ ಆದ್ಯತೆ ನೀಡಿ. ಯಾವುದೇ ಬೆಟ್ಟ ಹತ್ತುವ ಮೊದಲು ಅಥವಾ ಪ್ರಯಾಣ ಆರಂಭಿಸುವ ಮುನ್ನ ಹವಾಮಾನ ಇಲಾಖೆಯ (IMD) ಇತ್ತೀಚಿನ ವರದಿಗಳನ್ನು ತಪ್ಪದೇ ಪರಿಶೀಲಿಸಿ.