ಮೋಹಕ ಸೂರ್ಯೋದಯ ಹಾಗು ಸೂರ್ಯಾಸ್ತಗಳು

ಕನ್ಯಾಕುಮಾರಿ:

ತಮಿಳುನಾಡು ರಾಜ್ಯದ ದಕ್ಷಿಣದ ತುದಿ ಕನ್ಯಾಕುಮಾರಿ ಪಟ್ಟಣದ ಸೂರ್ಯಾಸ್ತವು ನೋಡಲು ಅತ್ಯಂತ ಮನಮೋಹಕ. ಪಶ್ಚಿಮದಲ್ಲಿ ಅಸ್ತಂಗತನಾಗುವ ಸೂರ್ಯ ಮನಸ್ಸಿನ ಒತ್ತಡವನ್ನು ನಿವಾರಿಸುತ್ತ ಹಗುರವಾದ ಭಾವನೆಯನ್ನು ಮೂಡಿಸುತ್ತ "ಮತ್ತೆ ಭೇಟಿಯಾಗೋಣ" ಎನ್ನುವ ರೀತಿಯಲ್ಲಿ ಜಾರಿ ಹೋಗುತ್ತಾನೆ.

ಚಿತ್ರಕೃಪೆ: Senthil.elt

ಅಲೆಪಿ:

ಕೇರಳ ರಾಜ್ಯದಲ್ಲಿರುವ ಅಲೆಪಿಯು ಒಂದು ಗಮ್ಯ ಪ್ರವಾಸಿ ತಾಣ. ಇಲ್ಲಿನ ಸುಮಧುರ ಹಿನ್ನೀರಿನ ಪ್ರದೇಶದಲ್ಲಿ ನೋಡಲು ಲಭಿಸುವ ಸೂರ್ಯಾಸ್ತದ ಅಂದ ಚೆಂದವೆ ವಿಶೇಷ.

ಚಿತ್ರಕೃಪೆ: Arian Zwegers

ಮಂಗಳೂರು:

ಕರ್ನಾಟಕದ ಮಂಗಳೂರು ಅಥವಾ ದಕ್ಷಿಣ ಕನ್ನಡ ಜಿಲ್ಲೆಯು ಒಂದು ನೆಚ್ಚಿನ ಪ್ರವಾಸಿ ತಾಣ. ಇಲ್ಲಿನ ಕಡಲ ತೀರಗಳು ಪ್ರವಾಸಿಗರನ್ನು ವಿಶೇಷವಾಗಿ ಆಕರ್ಷಿಸುತ್ತವೆ. ಉಲ್ಲಾಳ ಸೇತುವೆಯ ಸೂರ್ಯಾಸ್ತದ ನೋಟವು ಎಂತಹವರನ್ನೂ ಮೂಕವಿಸ್ಮಿತರನ್ನಾಗಿಸುತ್ತದೆ.

ಚಿತ್ರಕೃಪೆ: Nithin Bolar k

ಆಗುಂಬೆ:

"ಆಗುಂಬೆಯ....ಪ್ರೇಮ ಸಂಜೆಯ.... " ಎಂಬ ಅಣ್ಣಾವ್ರ ಹಾಡು ಯಾರಿಗೆ ತಾನೆ ಗೊತ್ತಿಲ್ಲ. ಆಗುಂಬೆಯ ಸೂರ್ಯಾಸ್ತದ ನೋಟವೆ ಹಾಗೆ. ದೂರವಿರುವ ಎರಡು ಹೃದಯಗಳನು ಒಂದು ಮಾಡುವ ನೋಟವದು.

ಚಿತ್ರಕೃಪೆ: ಪ್ರಶಾಂತ ಸೊರಟೂರ

ಗೋವಾ:

ಭವ್ಯ ಕಡಲ ತೀರಗಳು, ಪಾರ್ಟಿಗಳು, ಉಲ್ಲಾಸ, ಉತ್ಸಾಹ ಇವೆಲ್ಲವು ಸೇರಿದಾಗ ಗೋವಾ ಎಂಬ ಹದಿಹರೆಯದವರ ನೆಚ್ಚಿನ ಪ್ರವಾಸಿ ತಾಣ ನೆನಪಾಗುವುದು ಸಹಜ. ಸೂರ್ಯಾಸ್ತದ ವಿಹಂಗಮ ನೋಟವನ್ನು ಕಣ್ಮನಗಳಲ್ಲಿ ತುಂಬಿಕೊಳ್ಳಲು ಸಾಕಷ್ಟು ಕಡಲ ತೀರಗಳಿವೆ ಗೋವಾದಲ್ಲಿ.

ಚಿತ್ರಕೃಪೆ: Mark Sheffield

ಭೀಗವನ್:

ಮಹಾರಾಷ್ಟ್ರದ ಪುಣೆ ನಗರದಿಂದ 95 ಕಿ.ಮೀ ದೂರದಲ್ಲಿರುವ ಭೀಗವನ್ ಎಂಬ ಉಜನಿ ಜಲಾಶಯದ ಜಲಾನಯನ ಪ್ರದೇಶವು ಸೂರ್ಯಾಸ್ತಕ್ಕೆ ಹೆಸರುವಾಸಿಯಾಗಿದೆ.

ಚಿತ್ರಕೃಪೆ: Sunder Iyer

ರಣ್ ಆಫ್ ಕಚ್:

ಗುಜರಾತ್ ರಾಜ್ಯದಲ್ಲಿರುವ ಕಚ್ ನ ರಣ್ ಪ್ರದೇಶವು ಲವಣ ಪ್ರದೇಶಕ್ಕೆ ಭಾರತದಲ್ಲೆ ಹೆಸರುವಾಸಿಯಾಗಿದೆ. ಹಿಮ ಪ್ರದೇಶದಂತೆ ಗೋಚರಿಸುವ ಈ ಲವಣ ಮರಳುಗಾಡಿನಲ್ಲಿ ಸೂರ್ಯಾಸ್ತದ ಸುಂದರ ನೋಟವು ವಿಶೇಷವಾದ ಮೆರುಗನ್ನು ನೀಡುತ್ತದೆ.

ಚಿತ್ರಕೃಪೆ: Bhargavinf

ಮೌಂಟ್ ಅಬು:

ಮರಭೂಮಿ ರಾಜ್ಯ ರಾಜಸ್ಥಾನದಲ್ಲಿ ಕಂಡುಬರುವ ಸುಂದರವಾದ ಗಿರಿಧಾಮ ಪ್ರದೇಶ ಮೌಂಟ್ ಅಬು. ಇದು ರಾಜ್ಯದ ಇತರೆ ಸ್ಥಳಗಳ ಜೊತೆಯಾಗಿ ನೆಚ್ಚಿನ ಪ್ರವಾಸಿ ಸ್ಥಳವಾಗಿರುವುದೂ ನಿಜ. ಇಲ್ಲಿ ಕಂಡುಬರುವ ಸೂರ್ಯಾಸ್ತದ ನೋಟವು ಅವಿಸ್ಮರಣೀಯವಾದ ಅನುಭವವನ್ನು ಒದಗಿಸುತ್ತದೆ.

ಚಿತ್ರಕೃಪೆ: T.sujatha

ಪುಷ್ಕರ್:

ರಾಜಸ್ಥಾನದ ಅಜ್ಮೇರ್ ಜಿಲ್ಲೆಯಲ್ಲಿರುವ ಪುಷ್ಕರ್ ಪಟ್ಟಣವು ಒಂದು ಗಮ್ಯ ಪ್ರವಾಸಿ ಸ್ಥಳವಾಗಿದೆ. ಇಲ್ಲಿರುವ ಪುಷ್ಕರ್ ಕೆರೆಯಿಂದಾಗಿ ಪ್ರಖ್ಯಾತಿಯನ್ನು ಪಡೆದಿದೆ. ಈ ಕೆರೆಯ ಹಿನ್ನಿಲೆಯಲ್ಲಿ ಕಂಡುಬರುವ ಸೂರ್ಯಾಸ್ತದ ನೋಟವು ನೋಡಲು ಬಲು ಚೆಂದವಾಗಿರುತ್ತದೆ.

ಚಿತ್ರಕೃಪೆ: Nicholas Kenrick

ದಿಬ್ರುಗಡ್:

ಅಸ್ಸಾಂ ರಾಜ್ಯದಲ್ಲಿರುವ ದಿಬ್ರುಗಡ್ ನಗರವನ್ನು "ಭಾರತದ ಚಹಾ ನಗರ" ಎಂತಲೂ ಕೂಡ ಸಂಬೋಧಿಸಲಾಗುತ್ತದೆ. ಈ ಸುಂದರ ಚಹಾ ನಗರವು ತನ್ನ ಮೋಹಕ ಸೂರ್ಯಾಸ್ತದ ನೋಟಕ್ಕೂ ಹೆಸರುವಾಸಿಯಾಗಿದೆ.

ಚಿತ್ರಕೃಪೆ: Iampartha

ಉಮಿಯಮ್ ಕೆರೆ, ಮೇಘಾಲಯ:

ವಿವಿಧ ಬಣ್ಣ ಚಿತ್ತಾರಗಳಿಂದ ಕಂಗೊಳಿಸುತ್ತದೆ ಉಮಿಯಮ್ ಕೆರೆಯ ಸೂರ್ಯಾಸ್ತದ ನೋಟ. ಮೇಘಾಲಯದ ಶಿಲಾಂಗ್ ನಗರದ ಉತ್ತರಕ್ಕೆ 15 ಕಿ.ಮೀ ದೂರದಲ್ಲಿದೆ ಈ ಸುಂದರ ತಾಣ. ಇಲ್ಲಿ ಸಾಕಷ್ಟು ಜಲಕ್ರೀಡೆಗಳೂ ಕೂಡ ಲಭ್ಯವಿದೆ.

ಚಿತ್ರಕೃಪೆ: Vikramjit Kakati

ತಾಜ್ ಮಹಲ್, ಆಗ್ರಾ:

ಆಗ್ರಾ ನಗರದಲ್ಲಿ ಕಂಡುಬರುವ ಅತಿ ಶ್ರೇಷ್ಠ ಪ್ರವಾಸಿ ಸ್ಮಾರಕವೆಂದರೆ ತಾಜ್ ಮಹಲ್. ತಾಜ್ ಮಹಲ್ ಜೊತೆಗಿನ ಬೆಳಿಗ್ಗೆಯ ಸೂರ್ಯೋದಯ ನೋಟವೂ ಕೂಡ ಮನಸ್ಸಾಳದಿಂದ ಮರೆಯಾಗುವುದು ಕಷ್ಟ.

ಚಿತ್ರಕೃಪೆ: Ekabhishek

ಟೈಗರ್ ಹಿಲ್, ದಾರ್ಜೀಲಿಂಗ್:

ದಾರ್ಜೀಲಿಂಗ ಪಟ್ಟಣದಿಂದ 11 ಕಿ.ಮೀ ದೂರದಲ್ಲಿರುವ ಟೈಗರ್ ಹಿಲ್ಲ್ ಬೆಟ್ಟವು ಕಂಚನಜುಂಗಾ ಬೆಟ್ಟದ ಭವ್ಯ ನೋಟವನ್ನು ಕರುಣಿಸುತ್ತದೆ. ಅದರಲ್ಲೂ ಸೂರ್ಯೋದಯದ ನೋಟವಂತೂ ಮನದಾಳದಲ್ಲಿ ಅಚ್ಚಳಿಯದೆ ಉಳಿಯುತ್ತದೆ.

ಚಿತ್ರಕೃಪೆ: Shizhao

ಅರೂರ್:

ಕೇರಳದ ಅಲಪುಳಾ ಜಿಲ್ಲೆಯಲ್ಲಿರುವ ಒಂದು ಪುಟ್ಟ ಪಟ್ಟಣವೆ ಅರೂರ್. ಇಲ್ಲಿನ ಅರೂರ್ ಸೇತುವೆಯ ಸೂರ್ಯೋದಯದ ನೋಟವು ಚುಂಬಕದಂತೆ ಸೆಳೆಯುತ್ತದೆ.

ಚಿತ್ರಕೃಪೆ: Augustus Binu

ನರಸಾಪುರ್, ಪಶ್ಚಿಮ ಗೋದಾವರಿ:

ಆಂಧ್ರಪ್ರದೇಶದ ಪಶ್ಚಿಮ ಗೋದಾವರಿ ಜಿಲ್ಲೆಯ ನರಸಾಪುರ್ ಪಟ್ಟಣವು ಸುಂದರವಾದ ಸೂರ್ಯೋದಯದ ನೋಟವನ್ನು ಕರುಣಿಸುತ್ತದೆ.

ಚಿತ್ರಕೃಪೆ: Anna Frodesiak