Click it and Unblock the Notifications
ಸೋಲಾಪುರದಿಂದ 45 ಕಿ.ಮೀ. ದೂರದಲ್ಲಿದೆ ನಲದುರ್ಗ ಕೋಟೆ. ಇದೊಂದು ಐತಿಹಾಸಿಕ ತಾಣ. ಇದು ಮಹಾರಾಷ್ಟ್ರ ರಾಜ್ಯದ ಒಸ್ಮಾನಾಬಾದ್ ಜಿಲ್ಲೆಯ ವ್ಯಾಪ್ತಿಗೆ ಒಳಪಡುತ್ತದೆ. ಈ ಕೋಟೆ ಹಿಂದೆ ಯೆರಲ್ ಎಂಬ ಹೆಸರಿನಿಂದ ಕರೆಯಲ್ಪಡುತ್ತಿತ್ತು. ಆ ಸಂದರ್ಭದಲ್ಲಿ ಇದು ಬಹುಮನಿ ಸುಲ್ತಾನರ ಹಿಡಿತದಲ್ಲಿತ್ತು. ನಂತರ ಮುಘಲರ ಆಳ್ವಿಕೆಗೆ ಒಳಪಟ್ಟಿತು.
ಈ ಕೋಟೆಯ ಭಾಗವು ಅತ್ಯಂತ ಜನಪ್ರಿಯವಾಗಿರುವುದಕ್ಕೆ ಇಲ್ಲಿನ ಜಲಪಾತ ಕಾರಣ. ಇದನ್ನು ನರ ಮುಡಿ ಎಂದು ಕರೆಯಲಾಗುತ್ತದೆ. ಇಲ್ಲಿ ನರ ಶಬ್ಧವು ಪುರುಷ ಅಂತಲೂ ಮುಡಿ ಶಬ್ಧವು ಸ್ತ್ರೀ ಅಂತಲೂ ಇಲ್ಲಿನ ಸ್ಥಳೀಯ ಭಾಷೆಯಲ್ಲಿ ಪರಿಗಣಿಸಲಾಗುತ್ತದೆ. ಈ ಜಲಪಾತದ ವಿಹಂಗಮ ನೋಟ ಸವಿಯಬೇಕೆಂದರೆ ಅದು ಮಳೆಗಾಲದಲ್ಲಿ ಸಾಧ್ಯ. ಅಲ್ಲದೆ ಮಳೆಗಾಲ ಮುಗಿದ ತಕ್ಷಣದಲ್ಲಿ ಬಂದರೂ ಅತ್ಯುತ್ತಮ ನೋಟ ಸವಿಯಬಹುದು. ಬೃಹತ್ ಬೆಟ್ಟ ಗುಡ್ಡಗಳ ನಡುವಿನಿಂದ ಹರಿದು ಬಂದು ಹಸಿರು ಪರಿಸರದಲ್ಲಿ ಪರ್ವತವನ್ನೇ ಸೀಳಿಕೊಂಡು ಧಾರೆಯಾಗಿ ನೆಲಕ್ಕುರುಳುವ ನೀರನ್ನು ನೋಡುವುದು ಮಹದಾನಂದ. ಈ ಕೋಟೆಯು ಕೂಡ ಒಂದು ಐತಿಹಾಸಿಕ ಪ್ರಸಿದ್ಧ ತಾಣ. ಇಂಡೊ-ಇಸ್ಲಾಮಿಕ್ ಶೈಲಿಯ ವಾಸ್ತುಶಿಲ್ಪದಲ್ಲಿ ಇದು ನಿರ್ಮಾಣಗೊಂಡಿದೆ. ಈ ವಾಸ್ತುಶಿಲ್ಪವು ಅತ್ಯಂತ ವಿಭಿನ್ನ ಹಾಗೂ ಅಪರೂಪದ್ದಾಗಿದ್ದು ಇದನ್ನು ವೀಕ್ಷಿಸಲೆಂದೆ ಹಲವರು ಬರುತ್ತಾರೆ. ಮಹಾರಾಷ್ಟ್ರದ ಅತ್ಯಂತ ಪ್ರಸಿದ್ಧ ತಾಣಗಳಲ್ಲಿ ಇದೂ ಒಂದೆನಿಸಿದೆ.
