ಮರ್ ದೋಮ ದೇಗುಲ ಅಥವಾ ಮರ್ ದೋಮ ಪೊಂಟಿಫಿಕಲ್ ದೇಗುಲವು ಕೊಡುಂಗಲ್ಲೂರಿನಲ್ಲಿರುವ ಐತಿಹಾಸಿಕ ಚರ್ಚ್ ಆಗಿದೆ. ಈ ಚರ್ಚ್ ಸೆಂಟ್ ಥಾಮಸ್ ಭಾರತಕ್ಕೆ ಪಾದಾರ್ಪಣೆ ಮಾಡಿದ ಸ್ಥಳವೆಂದು ಭಾವಿಸಲಾಗಿರುವ ಅಳಿಕೋಡ್ ಎಂಬ ಸ್ಥಳದಲ್ಲಿದೆ. ಈ ಚರ್ಚಿನ ಇತಿಹಾಸವು ಕೇರಳದಲ್ಲಿ ಕ್ರಿಶ್ಚಿಯನ್ ಧರ್ಮ ತಳವೂರಿದ ಕಾಲಕ್ಕೆ ನಮ್ಮನ್ನು ಕೊಂಡೊಯ್ಯುತ್ತದೆ. ಅಲ್ಲದೆ ಈ ಸ್ಥಳವು ಐತಿಹಾಸಿಕವಾಗಿ ಮತ್ತು ಧಾರ್ಮಿಕವಾಗಿ ಮಹತ್ವದ ಸ್ಥಾನಮಾನವನ್ನು ಪಡೆದಿದೆ.
ಇಂಡೋ- ಪರ್ಷಿಯನ್ ಶೈಲಿಯಲ್ಲಿರುವ ಈ ಚರ್ಚ್ ಅತ್ಯುತ್ತಮವಾದ ವಾಸ್ತುಶಿಲ್ಪ ಮತ್ತು ಕಲಾತ್ಮಕತೆಯನ್ನು ಹೊಂದಿದೆ. ಸೆಂಟ್ ಥಾಮಸ್ರವರ ಪವಿತ್ರ ಅಸ್ತಿಗಳನ್ನು ಇಲ್ಲಿನ ಪೂಜಾಸ್ಥಳದಲ್ಲಿ ಸಂರಕ್ಷಿಸಿಡಲಾಗಿದೆ. ಕೆಲವೊಂದು ಆಯ್ದ ದಿನಗಳಂದು ಇವುಗಳನ್ನು ಸಾರ್ವಜನಿಕರ ದರ್ಶನಕ್ಕೆ ಇಡಲಾಗುತ್ತದೆ.
ವೀಕ್ಷಕರಿಗೆ ಸೆಂಟ್ ಥಾಮಸರ ಕುರಿತಾದ ಒಂದು ಕಿರುಚಿತ್ರವನ್ನು ಪ್ರದರ್ಶಿಸಲಾಗುತ್ತದೆ. ಈ ಚರ್ಚಿನ ಮುಂಭಾಗದಲ್ಲಿ ಕ್ರೈಸ್ತ ಧರ್ಮದ ಖ್ಯಾತ ಪ್ರವರ್ತಕನಾದ ಸೆಂಟ್ ಥಾಮಸರ ಬೃಹತ್ ವಿಗ್ರಹವನ್ನು ಸ್ಥಾಪಿಸಲಾಗಿದೆ. ಸೆಂಟ್ ಥಾಮಸ್ ಭಾರತಕ್ಕೆ ಆಗಮಿಸಿದ ಸಂಗತಿಯನ್ನು ವಿವರಿಸುವ ವರ್ಣಚಿತ್ರಗಳು ಈ ಚರ್ಚಿನ ಮತ್ತೊಂದು ಆಕರ್ಷಣೆಯಾಗಿದೆ. ಇಲ್ಲಿನ ಪ್ರಮುಖ ಉತ್ಸವವನ್ನು ಪ್ರತಿವರ್ಷ ನವೆಂಬರ್ 21ರಂದ ಆಚರಿಸಲಾಗುತ್ತದೆ.