Click it and Unblock the Notifications
ಟೀ ತೋಟಗಳು ಅಸ್ಸಾಂನ ಅತ್ಯಂತ ಹೆಮ್ಮೆಯ ತಾಣಗಳಾಗಿವೆ. ಅಸ್ಸಾಂ ತನ್ನಲ್ಲಿ ಬೆಳೆಯುವ ವಿಶೇಷ ಸ್ವಾದದ ಮತ್ತು ಪರಿಮಳದ ಟೀಗೆ ಜನಪ್ರಿಯಗೊಂಡಿದೆ. ಕಾಜಿರಂಗಾ ರಾಷ್ಟ್ರೀಯ ಉದ್ಯಾನವನಕ್ಕೆ ಭೇಟಿ ನೀಡುವ ಪ್ರವಾಸಿಗರು ತಪ್ಪದೆ ಇಲ್ಲಿಗೆ ಸಮೀಪದ ಟೀ ತೋಟಗಳಿಗೆ ಭೇಟಿ ನೀಡುವುದು ಉತ್ತಮ.
ಇಲ್ಲಿರುವ ಹಚ್ಚ ಹಸಿರಿನಿಂದ ಕೂಡಿದ ಟೀ ಗಿಡಗಳಿಂದ ಕೂಡಿದ ಬೆಟ್ಟ-ಗುಡ್ಡಗಳನ್ನು ಪ್ರತಿಯೊಬ್ಬರು ತಮ್ಮ ಜೀವಿತಾವಧಿಯಲ್ಲಿ ಒಮ್ಮೆಯಾದರು ನೋಡಿ ಕಣ್ತುಂಬಿಕೊಳ್ಳಬೇಕು. ಈ ಟೀ ಎಸ್ಟೇಟ್ಗಳಿಗೆ ಸಾರ್ವಜನಿಕರ ಪ್ರವೇಶಾವಕಾಶ ಸಹ ಇದ್ದು, ಅಲ್ಲಿನವರ ಆತೀಥ್ಯವು ನಿಮ್ಮನ್ನು ಸೆಳೆಯುವುದರಲ್ಲಿ ಯಾವುದೇ ಸಂಶಯವಿಲ್ಲ. ಕಾಜಿರಂಗಾ ರಾಷ್ಟ್ರೀಯ ಉದ್ಯಾನವನಕ್ಕೆ ಸಮೀಪದಲ್ಲಿ ಮೆಥೊನಿ, ಹತ್ಕುಲಿ, ಡಿಫಾಲು, ಬೊರ್ಚಪೊರಿ ಮತ್ತು ಬೆಹೊರಗಳೆಂಬ ಟೀ ತೋಟಗಳು ನೆಲೆಗೊಂಡಿವೆ.
ಈ ಟೀ ತೋಟಗಳಿಗೆ ಹಗಲಿನ ಹೊತ್ತು ಭೇಟಿ ನೀಡುವುದು ಉತ್ತಮ. ಕೆಲವು ಟೀ ತೋಟಗಳಲ್ಲಿ ರಾತ್ರಿ ತಂಗಲು ಅವಕಾಶವಿದೆ. ಈ ರಾಷ್ಟ್ರೀಯ ಉದ್ಯಾನವನವನ್ನು ಕೆಲವು ದಿನಗಳ ಕಾಲ ಸುತ್ತಾಡಿ ನೋಡಲು ಬಯಸುವವರಿಗಾಗಿ ಈ ಟೀ ತೋಟಗಳು ಒಳ್ಳೆಯ ತಂಗುದಾಣಗಳಾಗಿ ಕಾರ್ಯ ನಿರ್ವಹಿಸುತ್ತವೆ. ಏಕೆಂದರೆ ಹಲವಾರು ಟೀ ತೋಟಗಳು ಈ ರಾಷ್ಟ್ರೀಯ ಉದ್ಯಾನವನಕ್ಕೆ ಸಮೀಪದಲ್ಲಿ ನೆಲೆಗೊಂಡಿರುವುದರಿಂದ ಇಲ್ಲಿಗೆ ತಲುಪವುದು ಅಷ್ಟೇನು ತ್ರಾಸದಾಯಕವಲ್ಲ.
