ಸುಖ್ ನಿವಾಸ್ ಅರಮನೆಯು ಇಂದೋರಿನ ವಾಸ್ತುಶಿಲ್ಪದ ಮತ್ತೊಂದು ಅಧ್ಬುತವಾಗಿದೆ. ಈ ಅರಮನೆಯು ಹೋಳ್ಕರ್ ರಾಜ ಮನೆತನದವರ ಬೇಸಿಗೆ ಅರಮನೆಯಾಗಿ ಬಳಕೆಯಾಗುತ್ತಿತ್ತು. ಈ ಭವ್ಯವಾದ ಅರಮನೆಯು ಭಾರತೀಯ ಮತ್ತು ಪಾಶ್ಚಿಮಾತ್ಯ ವಾಸ್ತುಶಿಲ್ಪದ ಸಮ್ಮಿಲನವನ್ನು ಹೊಂದಿದೆ. ಈ ವಾಸ್ತುಶಿಲ್ಪವು ಹೋಳ್ಕರ್ ರಾಜ ಮನೆತನದವರ ಅಭಿರುಚಿ ಮತ್ತು ವೈಭವಯುತವಾದ ಜೀವನ ಶೈಲಿಯನ್ನು ಪ್ರತಿನಿಧಿಸುತ್ತಿದೆ. ಇಲ್ಲಿ ಒಂದು ಸುರಂಗ ಮಾರ್ಗವಿದ್ದು, ಇದು ಈ ಅರಮನೆಯ ಪ್ರಮುಖ ಆಕರ್ಷಣೆಯಾಗಿ ಉಳಿದಿದೆ.
ಈ ಸುರಂಗ ಮಾರ್ಗವು ಸುಖ್ ನಿವಾಸ್ ಅರಮನೆ ಮತ್ತು ಹೋಳ್ಕರ್ ರಾಜರ ಹಳೆಯ ಅರಮನೆಯ ನಡುವಿನ ಸಂಪರ್ಕ ಸೇತುವೆಯಾಗಿ ನಿಂತಿದೆ. ಸುಖ್ನಿವಾಸ್ ಅರಮನೆಯ ಅಂದವು ಅಲ್ಲಿರುವ ಹಚ್ಚ ಹಸಿರಿನಿಂದ ಕೂಡಿದ ಉದ್ಯಾನವನದಿಂದ ಮತ್ತಷ್ಟು ಹೆಚ್ಚಾಗಿದೆ. ಈ ಐತಿಹಾಸಿಕ ಅರಮನೆಯು ತನ್ನ ಪಾರಂಪರಿಕ ಹಿನ್ನಲೆಯಿಂದಾಗಿ ಇಂದು ಒಂದು ಅತ್ಯುತ್ತಮ ವಿಹಾರ ತಾಣವಾಗಿ ಗುರುತಿಸಿಕೊಂಡಿದೆ. ಇಂದೋರನ್ನು ಆಳಿದ ಹೋಳ್ಕರ್ ರಾಜರ ನೆನಪನ್ನು ತರುವ ಈ ಅರಮನೆಯನ್ನು ವೀಕ್ಷಿಸಲು ಪ್ರವಾಸಿಗರು ಇಂದಿಗು ಸಹ ತಂಡೋಪತಂಡವಾಗಿ ಇಲ್ಲಿಗೆ ಆಗಮಿಸುತ್ತಿರುತ್ತಾರೆ.