ಸಮೀರ್ ಪೇಟ್ ಎಂಬುದು ಹೈದರಬಾದಿನ ಹೊರಗೆ ನೆಲೆಗೊಂಡಿರುವ ಒಂದು ಉಪನಗರವಾಗಿದ್ದು, ಇದು ಸಿಕಂದರಬಾದಿನಿಂದ 20 ಕಿ.ಮೀ ದೂರದಲ್ಲಿ ನೆಲೆಸಿದೆ. ಈ ಸ್ಥಳವು ವಾಸಕ್ಕೆ ಅನುಕೂಲಕರವಾಗಿದೆ. ಅಲ್ಲದೆ ಈ ಪ್ರದೇಶದಲ್ಲಿ ಬಿರ್ಲಾ ತಾಂತ್ರಿಕ ವಿಙ್ಞಾನ ಸಂಸ್ಥೆ, ಪಿಲಾನಿ- ಹೈದರಬಾದ್, ನಲ್ಸಾರ್ ಕಾನೂನು ವಿಶ್ವವಿದ್ಯಾನಿಲಯ, ಜೆನೋಮ್ ವ್ಯಾಲಿಗಳು ಸಹ ನೆಲೆಗೊಂಡಿವೆ. ಸಮೀರ್ ಪೇಟ್ ಕೆರೆ ಸಹ ಇದೇ ಜಿಲ್ಲೆಯಲ್ಲಿ ನೆಲೆಗೊಂಡಿದೆ. ಈ ಮಾನವ ನಿರ್ಮಿತಕೆರೆಯನ್ನು ನಿಜಾಮರ ಆಳ್ವಿಕೆಯ ಅವಧಿಯಲ್ಲಿ ನಿರ್ಮಾಣ ಮಾಡಲಾಯಿತು. ಈ ಕೆರೆಯು ಶಾಲಾ/ಕಾಲೇಜು ವಿಹಾರಕ್ಕೆ ಮತ್ತು ಕೌಟುಂಬಿಕ ವಿಹಾರಗಳಿಗೆ ಹೇಳಿ ಮಾಡಿಸಿದ ತಾಣವಾಗಿದೆ.
ಈ ಕಾರಣಕ್ಕಾಗಿ ಇದು ಸ್ಥಳೀಯ ಜನರ ಅತ್ಯಂತ ಜನಪ್ರಿಯ ತಾಣವಾಗಿದೆ. ಇಲ್ಲಿ ಬಂದಾಗ ಇಂತಹ ತಂಡಗಳನ್ನು ನೀವೂ ಸಹ ಕಾಣಬಹುದು. ಅಲ್ಲದೆ ಈ ಕೆರೆಯ ಸುತ್ತಮುತ್ತ ಹಲವಾರು ಉಪಾಹಾರ ಗೃಹಗಳು ಇದ್ದು ವಾರಂತ್ಯದ ವಿಹಾರಗಳಿಗೆ ಬರುವವರಿಗೆ ಅನುಕೂಲವನ್ನು ಒದಗಿಸುತ್ತಿವೆ. ಇದರೊಂದಿಗೆ ಈ ಕೆರೆಯ ಬಳಿ ಒಂದು ಕ್ಲಬ್ ಮತ್ತು ರೆಸಾರ್ಟ್ ಸಹ ಇದೆ. ಸಮೀರ್ ಪೇಟ್ನಲ್ಲಿ ಒಂದು ಜಿಂಕೆ ಉದ್ಯಾನವನ ಸಹ ಇದೆ. ಈ ಉದ್ಯಾನವನದಲ್ಲಿ ಜಿಂಕೆಗಳ ಜೊತೆಗೆ ನವಿಲು ಒಳಗೊಂಡಂತೆ ಹಲವಾರು ಪಕ್ಷಿಗಳನ್ನು ಸಹ ಇಡಲಾಗಿದೆ. ಈ ಉದ್ಯಾನವನವು ಸಮೀರ್ ಪೇಟ್ ಕೆರೆಗೆ ಅತ್ಯಂತ ಸನೀಹದಲ್ಲಿದೆ. ಹಲವಾರು ತೆಲುಗು ಚಲನಚಿತ್ರಗಳು ಈ ಕೆರೆ, ಉದ್ಯಾನವನದ ಸುತ್ತಮುತ್ತ ಚಿತ್ರೀಕರಣಗೊಂಡಿವೆ.