Click it and Unblock the Notifications
ಎಂಜಿ ರಸ್ತೆ ಗ್ಯಾಂಗ್ಟಾಕ್ ಪ್ರಮುಖ ಹಾಗೂ ಅತೀ ಮುಖ್ಯ ರಸ್ತೆಯಾಗಿದೆ. ಈ ರಸ್ತೆ ವರ್ಷವಿಡೀ ಪ್ರವಾಸಿಗರಿಂದ ತುಂಬಿ ತುಳುಕುತ್ತಿರುತ್ತದೆ. ಉಗುಳುವಿಕೆ ಮತ್ತು ಕಸ ಎಸೆಯುವುದಕ್ಕೆ ನಿಷೇಧವಿರುವ ರಾಷ್ಟ್ರದ ಏಕೈಕ ರಸ್ತೆ ಇದಾಗಿದೆ. ಈ ರಸ್ತೆಗೆ ವಾಹನಗಳಿಗೂ ಪ್ರವೇಶ ನಿಷಿದ್ಧ!
ಈ ರಸ್ತೆ ಹಲವಾರು ಆಕರ್ಷಣೆಗೆ ಕಾರಣವಾಗಿದೆ. ಸಂಜೆಯಾಗುತ್ತಲೇ ಈ ರಸ್ತೆಯಲ್ಲಿ ತಿರುಗಾಡಬೇಕು. ರಸ್ತೆಯ ಇಕ್ಕೆಲಗಳಲ್ಲಿ ಹಲವಾರು ಅಂಗಡಿಗಳಿವೆ. ಇದು ಶಾಪಿಂಗ್ ಗೆ ಹೇಳಿ ಮಾಡಿಸಿದ ಸ್ಥಳವಾಗಿದೆ. ಟೈಟಾನಿಕ್ ಪಾರ್ಕ್ ಎನ್ನುವ ಜಾಗದಲ್ಲಿ ಪ್ರವಾಸಿಗಳ ಸಂಖ್ಯೆ ಅಧಿಕವಾಗಿರುವಾಗ ಸಂಗೀತ ನುಡಿಸಲಾಗುತ್ತದೆ. ಇಲ್ಲಿ ಪ್ರವಾಸಿಗಳು ಕುಳಿತು ಸಂಗೀತ ಕೇಳಿ ವಿಶ್ರಾಂತಿ ಪಡೆಯಬಹುದು.
ಗ್ಯಾಂಗ್ಟಾಕ್ ನ ಆಹಾರ ಮತ್ತು ಸಂಸ್ಕೃತಿ ಹಬ್ಬ ಇಲ್ಲಿ ನಡೆಯುತ್ತದೆ. ಡಿಸೆಂಬರ್ ತಿಂಗಳಲ್ಲಿ ನಡೆಯುವ ಈ ಹಬ್ಬದ ವೇಳೆ ಸಿಕ್ಕಿಂನ ವಿವಿಧ ತಿಂಡಿತಿನಿಸುಗಳ ರುಚಿ ನೋಡಬಹುದು. ಸಾಂಸ್ಕೃತಿಕ ಮೇಳವು ನಡೆಯುತ್ತದೆ. ಇದು ಸಿಕ್ಕಿಂನ ಅತ್ಯಂತ ಜನಪ್ರಿಯ ಹಬ್ಬಗಳಲ್ಲಿ ಒಂದಾಗಿದೆ.
