Click it and Unblock the Notifications
ಕೈನ್ರೆಮ್ ಜಲಪಾತವು ಭಾರತದ ಏಳನೆಯ ಅತಿ ಎತ್ತರ ಹೊಂದಿರುವ ಜಲಪಾತವಾಗಿದೆ. ಸೊಹ್ರಾದ (ಚಿರಾಪುಂಜಿ) ಬೆಟ್ಟಗಳಿಂದ ಈ ಜಲಪಾತವು ಮೂರು ಹಂತಗಳಲ್ಲಿ ಧುಮ್ಮಿಕ್ಕುತ್ತದೆ. ಮಳೆಗಾಲದಲ್ಲಿ ಕೈನ್ರೆಮ್ ಜಲಪಾತಕ್ಕೆ ಸಮಾನಾಂತರವಾಗಿ ಹಲವಾರು ಸಣ್ಣ ಪುಟ್ಟ ಜಲಪಾತಗಳು ಧುಮುಕುವ ದೃಶ್ಯವು ವರ್ಣನೆಗೆ ನಿಲುಕದಂತಹವುಗಳಾಗಿವೆ. ಈ ಜಲಪಾತದ ಸೌಂದರ್ಯವನ್ನು ಸವಿಯಲು ತಂಗ್ಖಾರಂಗ್ ಉದ್ಯಾನವನವು ಹೇಳಿ ಮಾಡಿಸಿದ ಸ್ಥಳವಾಗಿದೆ. ಆದರೆ ಸಾಹಸಿಗರಾದವರು ಚಿರಾಪುಂಜಿಯನ್ನು ಬಾಂಗ್ಲದೇಶ್ ಜೊತೆಗೆ ಸಂಪರ್ಕಿಸುವ ರಸ್ತೆಯ ಮೂಲಕ ಹಾದು ಈ ಜಲಪಾತದ ಬುಡವನ್ನು ತಲುಪಬಹುದು.
ಚಿರಾಪುಂಜಿಯು ಅತಿಯಾದ ಮಳೆಗೆ ಖ್ಯಾತಿ ಪಡೆದಿದೆ. ಇಲ್ಲಿ ಅವ್ಯಾಹತವಾಗಿ ಸುರಿಯುವ ಮಳೆಯು ಯಾವ ಬೆಟ್ಟದ ಮೇಲೆ ಬಿದ್ದರು ಅದು ಕೆಳಗೆ ಬಂಡೆಗಳ ಮೇಲೆ ಹರಿದು ಹೋಗುವಾಗ ಒಂದು ಜಲಪಾತವನ್ನು ಸೃಷ್ಟಿಸುತ್ತದೆ. ಸದಾ ಸುರಿಯುವ ಮಳೆಯು ಈ ಜಲಪಾತಗಳನ್ನು ಜೀವಂತವಾಗಿಡುತ್ತದೆ. ಕೈನ್ರೆಮ್ ಜಲಪಾತವನ್ನು ವೀಕ್ಷಿಸಲು ಮಳೆಗಾಲವು ಹೇಳಿ ಮಾಡಿಸಿದ ಸಮಯವಾಗಿರುತ್ತದೆ. ಚಳಿಗಾಲದಲ್ಲಿ ಈ ಜಲಪಾತವು ಬತ್ತಿ ಹೋಗುತ್ತದೆ. ಅಲ್ಲದೆ ಮಳೆಗಾಲದಲ್ಲಿ ಸಮೀಪದಲ್ಲಿ ಹೇಳ ಹೆಸರಿಲ್ಲದಂತೆ ಧುಮ್ಮಿಕ್ಕುವ, ಅನಾಮಧೇಯ ಜಲಪಾತಗಳು ನಿಮ್ಮ ಮನಸೂರೆಗೊಳ್ಳುತ್ತವೆ.
ಕೈನ್ರೆಮ್ ಜಲಪಾತ ಅಥವಾ ತಂಗ್ಖಾರಂಗ್ ಉದ್ಯಾನವನ ತಲುಪಲು ಶಿಲ್ಲಾಂಗ್ನಿಂದ ಹೊರಡುವ ಮೇಘಾಲಯ ಪ್ರವಾಸೋದ್ಯಮ ಇಲಾಖೆಯ ಬಸ್ ಅಥವ ಕ್ಯಾಬ್ಗಳು ಉತ್ತಮ ಆಯ್ಕೆಯಾಗಿವೆ.
