Click it and Unblock the Notifications
ದೈನ್-ಥ್ಲೆನ್ ಜಲಪಾತವು ಚಿರಾಪುಂಜಿಯಲ್ಲಿರುವ ಮತ್ತೊಂದು ಮಂತ್ರಮುಗ್ಧಗೊಳಿಸುವಂತ ಜಲಪಾತವಾಗಿದೆ. "ಥ್ಲೆನ್" ಎಂದರೆ ಹೆಬ್ಬಾವು ಎಂದರ್ಥ. ಈ ಜಲಪಾತಕ್ಕೆ ಈ ಪ್ರಾಂತ್ಯದ ಗುಹೆಗಳಲ್ಲಿ ಕಂಡುಬರುವ "ಥ್ಲೆನ್" ಅಂದರೆ ಹೆಬ್ಬಾವಿನಿಂದಾಗಿ ಈ ಹೆಸರು ಬಂದಿದೆ. ಸ್ಥಳೀಯ ನಂಬಿಕೆಗಳ ಪ್ರಕಾರ ಇಲ್ಲಿನ ಹಳ್ಳಿಯವರು ಈ ಹೆಬ್ಬಾವಿನ ಭೀತಿಯನ್ನು ಹೋಗಲಾಡಿಸಲು ಅದನ್ನು ಹಿಡಿದು, ಸಂಹರಿಸಿದರಂತೆ. ನಂತರ ಅವರು ಅದರ ಮಾಂಸವನ್ನು ಭಕ್ಷಿಸಿದರಂತೆ. ಈ ಹೆಬ್ಬಾವನ್ನು ಎಲ್ಲಿ ಸಂಹರಿಸಲಾಯಿತೊ, ಆ ಸ್ಥಳಕ್ಕೆ ಸಮೀಪದಲ್ಲಿ ದೈನ್-ಥ್ಲೆನ್ ಜಲಪಾತವಿತ್ತು. ಈ ದಂತ ಕತೆಯಿಂದಾಗಿ ಈ ಜಲಪಾತದ ಜನಪ್ರಿಯತೆ ಮತ್ತಷ್ಟು ಹೆಚ್ಚಾಯಿತು.
ಈಸುಂದರವಾದ ಜಲಪಾತವನ್ನು ನೋಡಲು ವಿಶ್ವದ ನಾನಾ ಮೂಲೆಗಳಿಂದ ಜನರು ಇಲ್ಲಿಗೆ ಆಗಮಿಸುತ್ತಿರುತ್ತಾರೆ. ಈ ಜಲಪಾತಕ್ಕೆ ಸಮೀಪದಲ್ಲಿ ನೈಸರ್ಗಿಕವಾಗಿರುವ ಬಂಡೆಗಳ ಮೇಲೆ ಕೆತ್ತಲಾಗಿರುವ ಕೆತ್ತನೆಗಳಿಂದ ಥ್ಲೆನ್ ಮತ್ತು ಹಳ್ಳಿಯವರ ನಡುವಿನ ಸಮರದ ಚಿತ್ರಣವನ್ನು ನಾವು ಮನಗಾಣಬಹುದು. ಇಲ್ಲಿ ಥ್ಲೆನ್ ಭ್ರಷ್ಟಾಚಾರ, ಲೋಭ ಮತ್ತು ದುಷ್ಟತೆಯ ಸಂಕೇತವಾಗಿ ಚಿತ್ರಣಗೊಂಡಿದೆ.
ದೈನ್-ಥ್ಲೆನ್ ಚಿರಾಪುಂಜಿಯಿಂದ ಐದು ಕಿಲೋ ಮೀಟರ್ ದೂರದಲ್ಲಿ ನೆಲೆಗೊಂಡಿದೆ. ಶಿಲ್ಲಾಂಗ್ನಿಂದ ಕ್ಯಾಬ್ ಅಥವಾ ಬಸ್ ಮೂಲಕ ಇಲ್ಲಿಗೆ ಸುಲಭವಾಗಿ ತಲುಪಬಹುದು.
