ಮೆಹ್ತಬ್ ಬಾಗ್ ಅಥವಾ ಚಂದ್ರನ ಬೆಳಕಿನ ಉದ್ಯಾನವನವನ್ನು 1631 ರಿಂದ 1635ರೊಳಗೆ ನಿರ್ಮಾಣ ಮಾಡಲಾಯಿತು.ಯಮುನಾ ನದಿಯ ದಂಡೆಯ ಮೇಲೆ ನೆಲೆಗೊಂಡಿರುವ ಈ ಅತ್ಯಾಕರ್ಷಕವಾದ ಉದ್ಯಾನವನವು ಸುಮಾರು 25 ಎಕರೆಗಳಷ್ಟು ವಿಸ್ತಾರವನ್ನು ಹೊಂದಿದೆ. ಇದು ತಾಜ್ ಮಹಲಿನ ವಿನ್ಯಾಸಕ್ಕೆ ಸಮರೂಪವನ್ನು ಹೊಂದಿದೆ. ಏಕೆಂದರೆ ಇದರ ಅಗಲವು ತಾಜ್ ಮಹಲಿನ ಅಗಲಕ್ಕೆ ಅಕ್ಷರಶಃ ಸರಿಹೊಂದುವಂತೆ ಇದೆ.
ಈ ಉದ್ಯಾನವನದ ಕೇಂದ್ರಭಾಗದಲ್ಲಿ ಅಷ್ಟಭುಜಾಕೃತಿಯ ಕೊಳವಿದೆ. ಈ ಕೊಳವು ತಾಜ್ ಮಹಲಿನ ಬಿಂಬವನ್ನು ಪ್ರತಿಬಿಂಬಿಸುತ್ತದೆ. ಇದನ್ನು ನೋಡಲು ಯಾತ್ರಿಕರ ದಂಡೆ ನೆರೆದಿರುತ್ತದೆ. ಈ ಕೊಳಕ್ಕೆ ನೀರನ್ನು ಕೃತಕವಾಗಿ ನಿರ್ಮಿಸಲಾಗಿರುವ ಜಲಪಾತದ ಮೂಲಕ ಹಾಯಿಸಲಾಗುತ್ತದೆ.
ಈ ಉದ್ಯಾನವನವು ಯಮುನಾ ನದಿಯ ಪ್ರವಾಹಕ್ಕೆ ಸುಲಭವಾಗಿ ಸಿಕ್ಕಿಕೊಳ್ಳುವ ಸ್ಥಳದಲ್ಲಿ ನೆಲೆಗೊಂಡಿರುವುದರಿಂದಾಗಿ, ಮೊಘಲರ ಅವಧಿಯಿಂದ ಇಂದಿನವರೆಗು ಹಲವಾರು ಪ್ರವಾಹಗಳಲ್ಲಿ ಇದು ಮುಳುಗೆದ್ದಿದೆ. ಇದರ ಮೂಲ ಸ್ವರೂಪವು ಪ್ರವಾಹದ ಹೊಡೆತದಲ್ಲಿ ಕೊಚ್ಚಿ ಹೋಗಿದೆ. ಹಾಗಾಗಿ ಪ್ರಸ್ತುತ ಇದು ಶಿಥಿಲಾವಸ್ತೆಯನ್ನು ತಲುಪಿದೆ.
ಈ ಉದ್ಯಾನವನದ ಪ್ರತಿ ಮೂಲೆಯಲ್ಲಿ ನಾಲ್ಕು ಮರಳುಗಲ್ಲಿನ ಗೋಪುರಗಳು ಇದ್ದವು. ಆದರೆ ಪ್ರವಾಹದ ಹೊಡೆತಕ್ಕೆ ಸಿಕ್ಕಿ ಇಂದು ಕೇವಲ ಒಂದು ಗೋಪುರ ಮಾತ್ರ ಉಳಿದುಕೊಂಡಿದೆ. ಕೊಳದ ಉತ್ತರ ಮತ್ತು ದಕ್ಷಿಣ ದಿಕ್ಕಿನಲ್ಲಿ ನಾವು ಎರಡು ಕಟ್ಟಡಗಳ ಬುನಾದಿಯನ್ನು ಗಮನಿಸಬಹುದು. ಮೂಲತಃ ಇವು ಈ ಉದ್ಯಾನವನದ ಮೊಗಸಾಲೆಗಳಾಗಿದ್ದವು ಎಂದು ತಿಳಿದು ಬಂದಿದೆ.