ನೀಲಿಮಲ ವೀಕ್ಷಣಾ ಸ್ಥಳವು ವಯನಾಡಿನಲ್ಲಿ ಪ್ರವಾಸಿಗರಿಂದ ತುಂಬಿ ತುಳುಕುವ ಪ್ರವಾಸಿ ತಾಣಗಳಲ್ಲಿ ಒಂದಾಗಿದೆ. ಸಾಹಸ ಮನೋಭಾವ ಮತ್ತು ಕ್ರೀಡಾ ಚಟುವಟಿಕೆಗಳಲ್ಲಿ ಆಸಕ್ತಿ ಹೊಂದಿರುವ ಪ್ರವಾಸಿಗರಿಗೆ ಈ ಸ್ಥಳವು ಹೇಳಿ ಮಾಡಿಸಿದ ತಾಣವಾಗಿದೆ. ಇದು ಚಾರಣಕ್ಕೆ ಅತ್ಯಂತ ಸೂಕ್ತ ಸ್ಥಳವಾಗಿದ್ದು, ನೀವು ಮೇಲೆ ಮೇಲೆ ಆರೋಹಣ ಮಾಡಿದಂತೆಲ್ಲ ಸುಂದರವಾದ ಪರಿಸರದ ದೃಶ್ಯವೈಭವವನ್ನು ಕಾಣಬಹುದು. ನಿಮಗೆ ಸಮಯಾವಕಾಶವಿದ್ದರೆ ಇಲ್ಲಿ ಚಾರಣದ ಜೊತೆಗೆ ಶಿಬಿರಗಳನ್ನು ಹಾಕಿಕೊಂಡು ಸಮಯ ಕಳೆಯಲು ಅವಕಾಶವಿದೆ. ಈ ವೀಕ್ಷಣಾ ಸ್ಥಳದ ಸುತ್ತ ಹಲವಾರು ಕಾಡು ಹಾದಿಗಳು ಇದ್ದು, ಸಾಹಸ ಚಟುವಟಿಕೆಗಳನ್ನು ಕೈಗೊಳ್ಳಲು ಬಯಸುವ ಉತ್ಸಾಹಿಗಳಿಗೆ ವಿಪುಲ ಅವಕಾಶಗಳನ್ನು ಒದಗಿಸುತ್ತವೆ.
ಈ ಕಾಡು ಹಾದಿಗಳು ಕಾಫಿ ತೋಟಗಳ ನಡುವೆ ಸಾಗಿ ಶಿಖಾರಾರೋಹಣದ ಮೋಜನ್ನು ಒದಗಿಸುತ್ತವೆ. ಸಾಹಸಿಗರು ಮೇಲಕ್ಕೆ ಸಾಗಿದಂತೆಲ್ಲ ಕಾಫಿ ಬೀಜಗಳ ಜೊತೆಗೆ ಶುಂಠಿ ಮತ್ತು ಅಡಿಕೆಗಳ ಸುಗಂಧವನ್ನು ಆಸ್ವಾದಿಸಬಹುದು.
ನೀಲಿಮಲ ವೀಕ್ಷಣಾ ಸ್ಥಳದಿಂದ ನೀವು ಈ ತನ್ಮಯಗೊಳಿಸುವ ಕಣಿವೆಯ ಹಲವಾರು ಮನಮೋಹಕ ಜಲಪಾತಗಳನ್ನು, ಸುಂದರವಾದ ಬೆಟ್ಟಗಳನ್ನು, ಹಿಮಾಚ್ಛಾಧಿತವಾದ ದಟ್ಟ ಕಾಡುಗಳನ್ನು ಕಣ್ಣು ತುಂಬಿಕೊಳ್ಳಬಹುದು. ಅಲ್ಲದೆ ಇಲ್ಲಿಂದ ಮೀನ್ ಮಟ್ಟಿ ಜಲಪಾತದ ಅತ್ಯದ್ಭುತವಾದ ನೋಟವನ್ನು ಕಾಣಬಹುದು.