ಯೇರ್ಕಾಡ್ ಎಂಬ ಸೊಗಸಾದ ಗಿರಿಧಾಮದಲ್ಲಿ...

ಯೇರ್ಕಾಡ್:

ಪೂರ್ವ ಘಟ್ಟಗಳ ಶಿವರೋಯಿ (ತಮಿಳಿನಲ್ಲಿ ಶೆರ್ವರಾಯನ್) ಗಿರಿ ಶ್ರೇಣಿಗಳಲ್ಲಿ ನೆಲೆಸಿರುವ ಈ ಗಿರಿಧಾಮವು ಸಮುದ್ರ ಮಟ್ಟದಿಂದ ಸುಮಾರು 1515 ಮೀ (4970 ಅಡಿಗಳು) ಗಳಷ್ಟು ಎತ್ತರದಲ್ಲಿದೆ. ಈ ಪ್ರವಾಸಿ ವಿಶೇಷತೆಯ ಗಿರಿಧಾಮದ ಅತಿ ಎತ್ತರದ ಸ್ಥಳವೆಂದರೆ ಶೆರ್ವರಾಯನ ದೇವಸ್ಥಾನ.

ಚಿತ್ರಕೃಪೆ: varun suresh

ಯೇರ್ಕಾಡ್:

ಸಹಸ್ರಾರು ಗಿಡ ಮರಗಳಿಂದ ತುಂಬಿ ಹೋದ ಸ್ಥಳ ಇದಾಗಿದ್ದು ಸುಂದರವಾದ ಕೆರೆಯಿಂದ ಕಂಗೊಳಿಸುವುದರಿಂದ ಇದಕ್ಕೆ ಯೇರ್ಕಾಡ್ ಎಂಬ ಹೆಸರು ಬಂದಿದೆ ಎನ್ನಲಾಗಿದೆ. "ದಕ್ಷಿಣದ ರತ್ನ" ಎಂದು ಜನಜನಿತವಾಗಿರುವ ಈ ಗಿರಿಧಾಮ ಪಟ್ಟಣವು ರಾಷ್ಟ್ರೀಯ ಹೆದ್ದಾರಿ ಸಂಖ್ಯೆ 28 ರ ಮೂಲಕ ಸೇಲಂನೊಂದಿಗೆ ಸಂಪರ್ಕ ಹೊಂದಿದೆ.

ಚಿತ್ರಕೃಪೆ: Mithun Kundu

ಯೇರ್ಕಾಡ್:

ಈ ಸೊಗಸಾದ ಗಿರಿಧಾಮ ಪಟ್ಟಣದಲ್ಲಿ ವಾತಾವರಣದ ತಾಪಮಾನವು ಎಂದಿಗೂ 29 ಡಿಗ್ರಿ ಸೆಲ್ಶಿಯಸ್ ದಾಟುವುದಿಲ್ಲ ಹಾಗು 13 ಸೆಲ್ಶಿಯಸ್ ಕೆಳಗೆ ಇಳಿಯುವುದಿಲ್ಲ. ಆದುದರಿಂದ ಇಲ್ಲಿ ಹೆಚ್ಚಾಗಿ ಆರೇಂಜ್, ಪೀರ್, ಹಲಸು, ಬಾಳೆ ಹಣ್ಣುಗಳ ಜೊತೆ ಕಾಫಿಯನ್ನೂ ಸಹ ಬೆಳೆಯಲಾಗುತ್ತದೆ.

ಚಿತ್ರಕೃಪೆ: Jai Kumara Yesappa

ಯೇರ್ಕಾಡ್:

ಪ್ರಾಕೃತಿಕ ಸೌಂದರ್ಯದಿಂದ ಜಗಮಗಿಸುವ ಈ ಗಿರಿಧಾಮವು ಅದ್ಭುತ ದೃಶ್ಯಾವಳಿಗಳನ್ನು ಒಳಗೊಂಡಿದ್ದು ಎಂದಿಗೂ ಮರೆಯಲಾಗದಂತಹ ಅದ್ಭುತ ಆನಂದವನ್ನು ಕರುಣಿಸುತ್ತದೆ.

ಚಿತ್ರಕೃಪೆ: Aruna

ಯೇರ್ಕಾಡ್:

ರಕ್ಷಿತ ಅರಣ್ಯವನ್ನು ಒಳಗೊಂಡು ಯೇರ್ಕಾಡ್ ಒಟ್ಟು 382.67 ಚ.ಕಿಮೀ ವಿಸ್ತೀರ್ಣದಲ್ಲಿ ಹರಡಿದೆ. ಇಲ್ಲಿ ಚಾರಣ ಮಾಡುವುದು ಒಂದು ಅಮೋಘ ಅನುಭವವಾಗಿದೆ.

ಚಿತ್ರಕೃಪೆ: Vvijayakumar

ಯೇರ್ಕಾಡ್:

ಗಿರಿಧಾಮದ ಕೇಂದ್ರ ಭಾಗದಲ್ಲಿ ಸುಂದರವಾದ ಕೆರೆಯಿದ್ದು ಸುತ್ತಲೂ ಕಾಡಿರುವುದರಿಂದ ಇದಕ್ಕೆ ಯೇರ್ಕಾಡ್ ಎಂಬ ಹೆಸರು ಬಂದಿದೆ ಎನ್ನಲಾಗುತ್ತದೆ. ಇನ್ನೊಂದು ನಂಬಿಕೆಯ ಪ್ರಕಾರ, ಏಳ್ ಎಂದರೆ ತಮಿಳಿನಲ್ಲಿ ಏಳು ಎಂದಾಗುತ್ತದೆ. ಏಳು ಕಾಡುಗಳಿಂದ ಇದಕ್ಕೆ ಯೇರ್ಕಾಡ್ ಎಂಬ ಹೆಸರು ಬಂದಿದೆ ಎನ್ನಲಾಗುತ್ತದೆ.

ಚಿತ್ರಕೃಪೆ: Mithun Kundu

ಯೇರ್ಕಾಡ್:

ಯೇರ್ಕಾಡ್ ಕೆರೆಯಿಂದ ಐದು ಕಿ.ಮೀ ದೂರದಲ್ಲಿರುವ ಸೇರ್ವರಾಯನ್ ಗಿರಿಗಳಲ್ಲಿ ಶಿಲಾಯುಗಕ್ಕೆ ಸಂಬಂಧಿಸಿದ ಕೆಲವು ವಸ್ತುಗಳು ಪತ್ತೆಯಾಗಿರುವುದರಿಂದ ಪುರಾತತ್ವ ಶಾಸ್ತ್ರಜ್ಞರಿಗೂ ಇದೊಂದು ಆಸಕ್ತಿಕರ ತಾಣವಾಗಿದೆ.

ಚಿತ್ರಕೃಪೆ: PeriasamySakthivel

ಯೇರ್ಕಾಡ್:

ಮದ್ರಾಸ್ ಪ್ರೆಸಿಡೆನ್ಸಿ ಸಮಯದಲ್ಲಿ ಸೇಲಂ ಜಿಲ್ಲೆಯ ಸ್ಕಾಟ್ ಲ್ಯಾಂಡ್ ಮೂಲದ ಕಲೆಕ್ಟರ್ ಆಗಿದ್ದ ಡೆವಿಡ್ ಕಾಕ್ ಬರ್ನ್ ಎಂಬುವವರನ್ನು ಯೇರ್ಕಾಡಿನ ಪಿತಾಮಹ ಎಂದು ಕರೆಯಲಾಗುತ್ತದೆ. ಏಕೆಂದರೆ ಇವರು ಈ ಒಂದು ಪ್ರದೇಶವನ್ನು ಅಭಿವೃದ್ಧಿ ಪಡಿಸಿ ಪೀರ್ಸ್, ಸೇಬು, ಕಾಫಿ ಬೆಳೆಗಳನ್ನು ಪರಿಚಯಿಸಿದ್ದರು.

ಚಿತ್ರಕೃಪೆ: Mithun Kundu

ಯೇರ್ಕಾಡ್:

ಸಾಂಬಾರು ಪದಾರ್ಥವಾದ ದಾಲ್ಚಿನಿ (Cinnamon) ಯನ್ನು ರಿಚರ್ಡ್‍ಸನ್ ಎಂಬುವವರು ಈ ಪ್ರದೇಶದಲ್ಲಿ ಸುಮಾರು 1840 ಸಮಯದಲ್ಲಿ ಇಲ್ಲಿ ಪ್ರಪ್ರಥಮವಾಗಿ ಪರಿಚಯಿಸಿದ್ದರು.

ಚಿತ್ರಕೃಪೆ: Kurumban

ಯೇರ್ಕಾಡ್:

ರಾಷ್ಟ್ರೀಯ ಆರ್ಕಿಡೇರಿಯಮ್ ಹಾಗು ಬೊಟಾನಿಕಲ್ ಉದ್ಯಾನಗಳನ್ನು ಯೇರ್ಕಾಡಿನಲ್ಲಿ ಕಾಣಬಹುದು. ಈ ಬೊಟಾನಿಕಲ್ ಉದ್ಯಾನವು ದಕ್ಷಿಣ ವಲಯದ ಬೊಟಾನಿಕಲ್ ಸರ್ವೆ ಆಫ್ ಇಂಡಿಯಾದಿಂದ ನಿರ್ವಹಿಸಲ್ಪಡುತ್ತದೆ.

ಚಿತ್ರಕೃಪೆ: Pradeepraj

ಯೇರ್ಕಾಡ್:

18.4 ಹೆಕ್ಟೇರ್ ಪ್ರದೇಶದಲ್ಲಿ ವಿಶಾಲವಾಗಿ ಹರಡಿರುವ ಆರ್ಕಿಡೇರಿಯಮ್ ನಲ್ಲಿ 3000 ಗಿಡಗಳು, 1800 ಬಳ್ಳಿಗಳನ್ನು ಕಾಣಬಹುದು. ಕೀಟಭಕ್ಷಕ ಪಿಚರ್ ಸಸ್ಯ ಈ ಬೊಟಾನಿಕಲ್ ಉದ್ಯಾನದ ಪ್ರವಾಸಿ ಆಕರ್ಷಣೆಯಾಗಿದೆ.

ಚಿತ್ರಕೃಪೆ: Thangaraj Kumaravel

ಯೇರ್ಕಾಡ್:

ಇಲ್ಲಿನ ನೈಸರ್ಗಿಕ ಕಾಡುಗಳಲ್ಲಿ ಈ ಪ್ರದೇಶಕ್ಕಷ್ಟೆ ಸೀಮಿತವಾದ ಕೆಲವು ಬಗೆಯ ಸಸ್ಯ ರಾಶಿಗಳನ್ನು ಕಾಣಬಹುದು. ಪ್ರಮುಖ ಪ್ರವಾಸಿ ಆಕರ್ಷಣೆಯಾದ ಯೇರ್ಕಾಡ್ ಕೆರೆ ನೋಡಲು ಮನಮೋಹಕವಾಗಿದ್ದು, ಆನಂದಮಯ ದೋಣಿ ಸವಾರಿಯನ್ನು ಅನುಭವಿಸಬಹುದು.

ಚಿತ್ರಕೃಪೆ: Mithun Kundu

ಯೇರ್ಕಾಡ್:

ಇಲ್ಲಿರುವ ಮತ್ತೊಂದು ಜನಪ್ರಿಯ ಸ್ಥಳ ಲೇಡಿ ಸ್ ಸೀಟ್. ಇಲ್ಲಿ ದೂರದರ್ಶಕವೊಂದನ್ನು ಅಳವಡಿಸಲಾಗಿದ್ದು, ಈ ಗಿರಿಧಾಮದ ಸುಂದರ ದೃಶ್ಯಾವಳಿಗಳ ವಿಹಂಗಮ ನೋಟವನ್ನು ಇದರಲ್ಲಿ ಕಾಣಬಹುದು.

ಚಿತ್ರಕೃಪೆ: Mandayamr

ಯೇರ್ಕಾಡ್:

ಈ ಗಿರಿಧಾಮದ ಎತ್ತರದ ಸ್ಥಳವಾದ ಸೇರ್ವರಾಯನ್ ಬೆಟ್ಟದಲ್ಲಿ ನೆಲೆಸಿದೆ ಸೇರ್ವರಾಯನ ದೇವಸ್ಥಾನ. ಪ್ರತಿ ವರ್ಷ ಮೇ ತಿಂಗಳಿನಲ್ಲಿ ಅದ್ದೂರಿಯಾಗಿ ಉತ್ಸವವನ್ನು ಇಲ್ಲಿ ಆಚರಿಸಲಾಗುತ್ತದೆ.

ಚಿತ್ರಕೃಪೆ: Tamal Das

ಯೇರ್ಕಾಡ್:

ಯೇರ್ಕಾಡ್ ಭೇಟಿ ನೀಡಿದಾಗ ನೋಡಬಹುದಾದ ಮತ್ತೊಂದು ಜನಪ್ರಿಯ ಆಕರ್ಷಣೆಯೆಂದರೆ ಕಿಳಿಯೂರ್ ನೀರಿನ ಜಲಪಾತ. 90 ಅಡಿಗಳಷ್ಟು ಎತ್ತರದಿಂದ ಧುಮುಕುವ ಈ ಜಲಪಾತ ಎಂಥವರನ್ನು ಮೈಮರೆಯುವಂತೆ ಮಾಡುತ್ತದೆ.

ಚಿತ್ರಕೃಪೆ: Antkriz

ಯೇರ್ಕಾಡ್:

ಯೇರ್ಕಾಡ್ ಸೇಲಂ ನಗರದಿಂದ ಕೇವಲ 36 ಕಿ.ಮೀ ಅಂತರದಲ್ಲಿದೆ. ಸೇಲಂ ಪಟ್ಟಣವು ಚೆನ್ನೈ ಹಾಗು ಬೆಂಗಳೂರಿನಂತಹ ಪ್ರಮುಖ ನಗರಗಳಿಗೆ ಉತ್ತಮವಾದ ರಸ್ತೆ ಹಾಗು ರೈಲು ಸಂಪರ್ಕವನ್ನು ಹೊಂದಿದೆ.

ಚಿತ್ರಕೃಪೆ: Santhoshj