ಪ್ರವಾಸದಲ್ಲಿ ಖುಷಿಯಾಗಿರಬೇಕೇಂದ್ರೆ ಸರಿಯಾಗಿ ಬ್ಯಾಗ್‌ ಪ್ಯಾಕ್ ಮಾಡುವುದು ಮುಖ್ಯ, ಹಾಗಾದ್ರೆ ಯಾವುದನ್ನು ಒಯ್ಯಬೇಕು, ಒಯ್ಯಬಾರದು?

ನಾವು ಪ್ರವಾಸಕ್ಕೆ ತಯಾರಿಯನ್ನು ಅದೆಷ್ಟೇ ತಿಂಗಳಿಗೆ ಮುಂಚಿತವಾಗಿ ಮಾಡಿದರೂ ಯಾವಾಗಲೂ ಏನಾದರೂ ಒಂದನ್ನು ಮರೆಯುತ್ತೇವೆ ಅಥವಾ ತೆಗೆದುಕೊಂಡು ಹೋಗಬಹುದಾದ ವಸ್ತುಗಳ ಬಗ್ಗೆಯೂ ಐಡಿಯಾ ಬರುವುದಿಲ್ಲ. ನಿಮಗೂ ಈ ರೀತಿ ಎಂದಾದರೂ ಆಗಿರುವುದನ್ನು ನೀವು ಗಮನಿಸಿದ್ದೀರಾ. ದೊಡ್ಡ ದೊಡ್ಡ ವಸ್ತುಗಳು ಬಿಡಿ... ಕೆಲವೊಮ್ಮೆ ಬಟ್ಟೆ, ಪಾದರಕ್ಷೆ, ಅಗತ್ಯ ಔಷಧಗಳನ್ನೇ ಮರೆತು ಬಿಡುತ್ತೇವೆ. ಇದರಿಂದಾಗಿ ಕೆಲವೊಮ್ಮೆ ಪ್ರಯಾಣದ ಮೋಜು ಮಾಡಲು ಸಾಧ್ಯವಾಗುವುದೇ ಇಲ್ಲ. ಆದರೆ ಈ ಸಮಸ್ಯೆಯನ್ನು ತಪ್ಪಿಸಲು ಉತ್ತಮ ಮಾರ್ಗವೆಂದರೆ ಪ್ಯಾಕಿಂಗ್ ಮಾಡುವ ಮೊದಲು ಅಗತ್ಯ ವಸ್ತುಗಳ ಪಟ್ಟಿಯನ್ನು ತಯಾರಿಸುವುದು ಮತ್ತು ಅದಕ್ಕೆ ಅನುಗುಣವಾಗಿ ವಸ್ತುಗಳನ್ನು ಬ್ಯಾಗ್‌ನಲ್ಲಿ ಇಟ್ಟುಕೊಳ್ಳುವುದು. ಇದು ಈ ಮೇಲಿನ ಸಮಸ್ಯೆಗೆ ಮೊದಲ ಪರಿಹಾರವೆಂದೇ ಹೇಳಬಹುದು.

ಇನ್ನು ಉದ್ಭವಿಸುವ ಎರಡನೇ ಸಮಸ್ಯೆ ಎಂದರೆ ಪ್ಯಾಕಿಂಗ್‌ನಲ್ಲಿ ನಿಮ್ಮೊಂದಿಗೆ ಏನನ್ನು ಇಡಬೇಕು ಮತ್ತು ಯಾವುದನ್ನು ಇಡಬಾರದು. ಈ ಬಗ್ಗೆ ತಿಳಿವಳಿಕೆ ಇಲ್ಲದ ಕಾರಣ ಹಲವು ಬಾರಿ ಬ್ಯಾಗ್‌ ಭಾರವಾಗುವುದರಿಂದ ಅದನ್ನು ಸಾಗಿಸಲು ಕಷ್ಟವಾಗುತ್ತದೆ. ಸ್ಥಳಾವಕಾಶಕ್ಕೆ ಅನುಗುಣವಾಗಿ ನಿಮ್ಮ ಬ್ಯಾಗ್ ಸಿದ್ಧಪಡಿಸುವುದು ‌ಕೂಡ ಅತಿ ಮುಖ್ಯ. ಇದೇ ರೀತಿ ಪ್ರವಾಸಕ್ಕೆ ತೆರಳುವ ಮುನ್ನ ನಾವು ಯಾವ ವಸ್ತುಗಳನ್ನು ಮರೆಯಬಾರದು? ಬ್ಯಾಕ್‌ ಪ್ಯಾಕ್‌ ತಯಾರಿ ಹೇಗಿರಬೇಕು ಎಂಬಿತ್ಯಾದಿಗಳ ಬಗ್ಗೆ ನೋಡೋಣ ಬನ್ನಿ...

ಬೀಚ್‌ಗಳತ್ತ ಹೊರಟಾಗ....

ನೀವು ಬೀಚ್ ಕಡೆ ತೆರಳಲು ಪ್ಲಾನ್‌ ಮಾಡುತ್ತಿದ್ದರೆ ನಿಮ್ಮ ಬಟ್ಟೆಗಳನ್ನು ಸಾಧ್ಯವಾದಷ್ಟು ಹಗುರವಾಗಿರುವಂತೆ ನೋಡಿಕೊಳ್ಳಿ. ಕಡಲತೀರದ ತಾಣದ ಹವಾಮಾನವು ಸಾಮಾನ್ಯವಾಗಿ ಆಹ್ಲಾದಕರವಾಗಿರುತ್ತದೆ, ಆದ್ದರಿಂದ ಅಂತಹ ಸ್ಥಳಕ್ಕೆ ಪೂರ್ಣ ತೋಳುಗಳು, ಜಾಕೆಟ್, ಬೂಟುಗಳನ್ನು ಸಾಗಿಸುವ ಅಗತ್ಯವಿಲ್ಲ. ಹತ್ತಿ, ಶಿಫಾನ್, ಜಾರ್ಜೆಟ್ ಬಟ್ಟೆಗಳನ್ನು ಪ್ಯಾಕ್ ಮಾಡಿ, ಇದರಿಂದ ಬ್ಯಾಗ್‌ನಲ್ಲಿ ಸಹ ಕಡಿಮೆ ಜಾಗ ಹಿಡಿಯುತ್ತದೆ ಮತ್ತು ಬ್ಯಾಗ್‌ ಹಗುರವಾಗಿರುತ್ತದೆ. ಇನ್ನು ಪಾದರಕ್ಷೆಗಳ ವಿಚಾರಕ್ಕೆ ಬರುವುದಾದರೆ ಫ್ಲಾಟ್ ಸ್ಲಿಪ್ಪರ್ ಒಯ್ಯಿರಿ. ಏಕೆಂದರೆ ಹೀಲ್ಸ್ ಅಥವಾ ಬೂಟುಗಳನ್ನು ಧರಿಸಿ ಸಮುದ್ರತೀರದಲ್ಲಿ ನಡೆಯಲು ಕಷ್ಟವಾಗುತ್ತದೆ ಮತ್ತು ಅಷ್ಟು ಆರಾಮದಾಯಕ ಅನಿಸುವುದಿಲ್ಲ.

ಗಿರಿಧಾಮಕ್ಕೆ ತೆರಳುವ ಮುನ್ನ

ನೀವು ಗಿರಿಧಾಮಕ್ಕೆ ಹೋಗುತ್ತಿದ್ದರೆ, ಪ್ಯಾಕಿಂಗ್ ಮಾಡುವಾಗ ನೀವು ಯಾವ ಋತುವಿನಲ್ಲಿ ಹೋಗುತ್ತೀರಿ ಎಂಬುದನ್ನು ನೆನಪಿನಲ್ಲಿಡಿ. ಮೇ-ಜೂನ್ ತಿಂಗಳುಗಳಲ್ಲಿ, ಗಿರಿಧಾಮದ ಹವಾಮಾನವು ಹೇಗಿರುತ್ತದೆ ಎಂದರೆ ನೀವು ಸಾಮಾನ್ಯ ಬಟ್ಟೆಗಳನ್ನು ಧರಿಸಿ ಸಹ ಆನಂದಿಸಬಹುದು, ಆದರೆ ನೀವು ಚಳಿಗಾಲದಲ್ಲಿ ಇಲ್ಲಿಗೆ ಭೇಟಿ ನೀಡಲು ಯೋಜಿಸುತ್ತಿದ್ದರೆ, ಉಣ್ಣೆಯ ಬಟ್ಟೆಗಳು ಹೆಚ್ಚು ಅಗತ್ಯವಿರುತ್ತದೆ. ನೆನಪಿಡಿ ಗಿರಿಧಾಮಗಳಿಗೆ ಹೊರಟಾಗ ನಿಮ್ಮ ಬ್ಯಾಗ್‌ನಲ್ಲಿ ಉತ್ತಮ ಗುಣಮಟ್ಟದ ಶೂಗಳನ್ನು ಪ್ಯಾಕ್ ಮಾಡಿ. ವಿಶೇಷವಾಗಿ ನೀವಿಲ್ಲಿ ಚಾರಣ ಮಾಡಲು ಯೋಜಿಸುತ್ತಿದ್ದರೆ, ಖಂಡಿತವಾಗಿಯೂ ನೀರಿನ ಬಾಟಲಿ, ಆರೋಗ್ಯಕರ ತಿಂಡಿಗಳು, ಸ್ಟಿಕ್‌ಗಳು, ಟಾರ್ಚ್‌ನಂತಹ ವಸ್ತುಗಳನ್ನು ಕೊಂಡೊಯ್ಯಿರಿ.

ವನ್ಯಜೀವಿ ತಾಣಗಳಲ್ಲಿ

ನೀವು ಯಾವುದೇ ವನ್ಯಜೀವಿ ತಾಣವನ್ನು ಅನ್ವೇಷಿಸಲು ಹೋದರೆ, ಫುಲ್ ತೋಳಿನ ಬಟ್ಟೆಗಳನ್ನು ಪ್ಯಾಕ್ ಮಾಡಿ. ಹಸಿರು ಬಣ್ಣ ಇದ್ದರೆ ಇನ್ನು ಚೆನ್ನ. ಅಂತಹ ಸ್ಥಳಗಳಲ್ಲಿ ಸುರಕ್ಷಿತವಾಗಿರಲು, ಶೂ ಅಥವಾ ಉತ್ತಮ ಗುಣಮಟ್ಟದ ಬೂಟುಗಳನ್ನು ಒಯ್ಯಿರಿ. ಇಂತಹ ಸ್ಥಳಗಳಲ್ಲಿ ಅನೇಕ ಬಾರಿ ನೆಟ್‌ವರ್ಕ್ ಸಮಸ್ಯೆ ಉಂಟಾಗುತ್ತದೆ, ಆದ್ದರಿಂದ ಅಲ್ಲಿಗೆ ಹೋಗುವ ಮೊದಲು ಸಂಪೂರ್ಣ ವ್ಯವಸ್ಥೆಯ ಬಗ್ಗೆ ಚೆಕ್‌ ಮಾಡಿಕೊಳ್ಳಿ.

ಇವೆಲ್ಲಾ ಗಮನದಲ್ಲಿರಲಿ...

· ಒಂದು ವೇಳೆ ನೀವು ಹೋಟೆಲ್‌ ಬುಕಿಂಗ್‌ ಮಾಡಿದ್ದರೆ ನಿಮ್ಮ ಬ್ಯಾಗ್‌ನಲ್ಲಿ ಟವೆಲ್, ಸಾಬೂನು, ಶಾಂಪೂ ಒಯ್ಯುವ ಅಗತ್ಯವಿಲ್ಲ. ಹೋಟೆಲ್ ಮಾಲೀಕರು ಈ ಎಲ್ಲ ವಸ್ತುಗಳನ್ನು ಒದಗಿಸುತ್ತಾರೆ.

· ಇದಲ್ಲದೇ ಹೊಟೇಲ್ ನಲ್ಲಿ ಕವರ್ ಸೇರಿದಂತೆ ಬೆಡ್ ಶೀಟ್ ಗಳು ಕೂಡ ಇರುವುದರಿಂದ ಅನಗತ್ಯವಾಗಿ ಬ್ಯಾಗ್ ನಲ್ಲಿ ತುಂಬಿಕೊಂಡು ಅದರ ತೂಕ ಹೆಚ್ಚಿಸಬೇಡಿ.

· ಪ್ರಯಾಣ ಮಾಡುವಾಗ ನೀವು ಸಾಕಷ್ಟು ಬಾರಿ ಧರಿಸಬಹುದಾದಂತಹ ಬಟ್ಟೆಗಳನ್ನು ವಿವಿಧ ರೀತಿಯಲ್ಲಿ ಪ್ಯಾಕ್ ಮಾಡಿ.

· ನಿಮ್ಮ ಪ್ರವಾಸದ ಮೊದಲು ಹವಾಮಾನ ಮುನ್ಸೂಚನೆಯನ್ನು ಪರಿಶೀಲಿಸಿ ಮತ್ತು ಅದಕ್ಕೆ ಅನುಗುಣವಾಗಿ ಬಟ್ಟೆಗಳನ್ನು ಪ್ಯಾಕ್ ಮಾಡಿ.

· ನಿಮ್ಮ ಔಷಧಿಗಳನ್ನು ನಿಮ್ಮೊಂದಿಗೆ ಕೊಂಡೊಯ್ಯಿರಿ. ಜೊತೆಗೆ ಎಷ್ಟು ಬೇಕೋ ಅಷ್ಟು ಪ್ರಮಾಣದಲ್ಲಿ ಪ್ಯಾಕ್ ಮಾಡಿ

· ನಿಮ್ಮ ಪ್ರವಾಸದ ಸಮಯದಲ್ಲಿ ತುರ್ತು ಸಂಪರ್ಕಗಳ ಪಟ್ಟಿಯನ್ನು ಇರಿಸಿ.

ಸ್ವಲ್ಪ ತಯಾರಿ ಮತ್ತು ಯೋಜನೆಯೊಂದಿಗೆ ಪ್ರಯಾಣವನ್ನು ಅದ್ಭುತ ಅನುಭವವಾಗಿಸಬಹುದು. ಹಾಗೆಯೇ ನಿಮ್ಮ ಪ್ರವಾಸವನ್ನು ಹೆಚ್ಚು ಆನಂದದಾಯಕ ಮತ್ತು ಸ್ಮರಣೀಯವಾಗಿಸಬಹುದು.